Poto 5 - Revised Samoan Catholic Bible

O Tagata Amiotonu ma Tagata Amio Leaga i le Olaga Atalī

1‘Ona tūtūla‘i ai lea o tagata amiotonu ma le fa‘amoemoe lelei

i luma o ē na fa‘asauā ‘iā te i latou ma fa‘alēaogāina o a latou galuega.

2E iloa atu e tagata amio leaga, ‘ona latou atuatuvale ai lea ma le matuā mata‘utuia;

latou te ofo i le fa‘afuase‘i o lea fa‘aolataga sa latou le fa‘atalitali i ai.

3Latou te fetautalatala‘i ma le loto fa‘anoanoa ma le feoi i le atuatuvale o latou loto,

4“Fa‘auta, o i latou ia sa tatou tauemu i ai,

sa fai i latou ma taunu‘uga o a tatou ulaga!

Matuā vālelea i tatou, sa tāofi ifo o le mea valea lo latou olaga,

o le māsiasi fo‘i o lo latou i‘uga;

5a o lenei ‘ua taulia i latou o le fānau a le Atua,

o lo latou tofi fo‘i ‘ua fa‘atasi ma le ‘au pa‘ia!

6O lea la, ‘ua fesēa‘i i tatou, sa mamao i tatou ma le ala o le ‘upu moni,

e le‘i pupula ‘iā te i tatou le malamalama o le amiotonu,

e le‘i oso a‘e i luga o i tatou le lā o le mafaufau tonu.

7Na lailoa i tatou i le ala o le amio leaga ma le ala e fano ai

ma ‘ua tatou sāvavali i ala faigatā,

a ‘ua tatou lē iloa atu le ala o le Ali‘i.

8Pe a uma ‘ea lo tatou fa‘amaualuga!

Se a se aogā ‘iā i tatou o le mau‘oloa ma le mamapo?

9“‘Ua mavae atu e pei o le ata o mea uma ia,

e pei o le ‘avefe‘au ‘ua ui ane ma le televave;

10e pei lava o le va‘a e ui atu i le vasa sousou,

e lē āu maua se fa‘ailoga o lona mavae atu,

po o le ala o lona tā‘ele i peau o le sami.

11E pei fo‘i o se manulele e lele ane i le vateatea,

e lē toe maua se fa‘ailoga o lona ala,

‘ua na o le gasēsē o ona ‘apa‘au,

o apatā i le savili ma vavae fa‘amalosi sona ala i le vateatea;

‘ua ia sopo atu o tātā ona ‘apa‘au; a mavae atu,

‘ua lē toe maua se fa‘ailoga o lona ala;

12e pei fo‘i o se ū ‘ua fanaina i le manulautī,

‘ona toe soso‘o loa lea le ‘ea sa vaevaeina,

‘ua lē toe iloa le mea na ui atu ai;

13e fa‘apea lava i tatou, ‘ua fānanau mai, ‘ona uma loa lea i tatou;

na tatou le lavā fa‘aali se fa‘ailoga e tasi o le amiotonu,

a ‘ua fa‘aumatia i tatou ‘iā tatou amio leaga.”

14E fa‘apea ‘ona fetautalatala‘i i seoli o tagata agasala;

15auā o le fa‘amoemoe o le tagata agasala,

‘ua pei o le taui fulufulu mamoe e lelea i le matagi,

e pei fo‘i o le piapiā fa‘atauva‘a e fa‘ata‘ape‘apeina i le afā,

e pei o le asu e fa‘ata‘ape‘apeina i le matagi,

e pei o lē na afe mai i le aso e tasi, e galoina lava ia. O le Taui o ē Amiotonu

16A o tagata amiotonu, e ola lava i latou i le fa‘avavau;

o lo latou taui o lo‘o i le Ali‘i,

o lo‘o manatu alofa ‘iā te i latou lē ‘ua silisili ‘ese.

17O le mea lea latou te tali ai le mālō ma le paleali‘i pupula ai le ‘a‘ao o le Ali‘i;

auā e puipui lava ia ‘iā te i latou i lona ‘a‘ao taumatau,

na te lavea‘iina fo‘i i latou i lona aso pa‘ia.

18E ‘ofu o ia i le ‘ofu tau o lona mā‘elegā;

o mea uma na faia e ‘avea ma ‘au‘upega na te taui ma sui a‘i i ona fili.

19E fa‘a‘ofu o ia i le ufi fatafata o le amiotonu,

o le fa‘amasinoga tonu e faia mōna pulou tau;

20na te tago i le amiotonu e pei o se talitā e lē āu faia‘ina ai.

21E fa‘ama‘ama‘ai e ia lona to‘asā mata‘utia e ‘avea ma tao,

‘ona fa‘atasi lea ma ia le lalolagi uma e tau ma tagata vālelea.

22E fanaina tonu o ū o faititili,

mai ao o le lagi ‘ua pei o se ‘aufana ‘ua malosi ‘ona lolo‘u,

latou te lele atu i le tulaga na fa‘atonuina.

23E pei o se ma‘atā o lona to‘atama‘i, na te togi ifo ai le tele o uato‘a;

e lofia ai i latou e peau o le sami,

e feosofi ‘iā te i latou o vaitafe ma le ita tele;

24e oso ‘iā te i latou le matagi o le mana o le Atua,

e pei o se afā tele e fa‘ata‘ape‘ape ‘iā te i latou;

o la latou amio leaga e ‘avea ai le lalolagi uma ma fanua tu‘ufua,

o lo latou loto leaga e fulisia ai o nofoāli‘i o ē malolosi.