Sirako 46 - Revised Samoan Catholic Bible

O Iosua

1O lē pito ane ‘iā Mose i le sologa o le ‘au perofeta,

o Iosua, le atali‘i o Nuno, o le toa i le tau‘a;

e tusa ma lona igoa, na ta‘uleleia o ia.

2Na sili o ia i le fa‘aola le nu‘u filifilia o le Atua,

i le tete‘e atu i fili na osofia a‘i i latou,

‘ina ‘ia maua mai ai le tofi o Isaraelu.

3E! ‘ua ‘ese lona mamalu ‘ina ‘ua si‘i a‘e ona lima,

ma fa‘aloaloa atu lona tao i ‘a‘ai.

4Po o ai na muamua ‘iā te ia i le tau le tau‘a e pei o ia?

A ‘ua ta‘ita‘iina mai pea ni isi fili e le Ali‘i lava ia.

5Po ‘ua lē tāofia ‘ea le lā lava ia i lona loto filigā,

ma na faia le aso e tasi e pei o ni aso se lua?

6‘Ua na vala‘au atu lava i lē Silisili‘ese lona mana,

‘ina ‘ua tau ma le fili i ona itū uma;

ma ‘ua fa‘afofoga mai ‘iā te ia le Atua mamana ma le pa‘ia,

i ni ma‘a uato‘a ‘ua ‘ese lava le masau ma le malō.

7‘Ua oso lava ia i le ‘au a le fili, ‘ua na fa‘aumatia i le vanu o ē sa tete‘e mai ‘iā te ia. Kalepo

8‘Ina ‘ia iloa e nu‘u ‘ese le mana o le Ali‘i ma ‘ua lē o se mea faigofie le tau le tau‘a ma le Atua.

Na mulimuli atu pea ia i lē Silisili‘ese lona mana.

9I lo o aso lava o Mose na fa‘aali ai e i lā‘ua ma Kalepo, le atali‘i o Iefune, lo la agaalofa,

‘ua la tutū e tete‘e atu i le fili, ‘ua la lavea‘i i le nu‘u,

‘ia ‘aua le agasala i latou ma ‘ua la titina o le muimui a ē loto leaga.

10O lea na filifilia ai i lā‘ua ‘ia ai le ono selau afe o tagata sāvavali,

‘ina ‘ia fa‘asaoina i fa‘alavelave, ‘ia la ta‘ita‘iina le nu‘u i lona tofi,

i le fanua ‘ua tafe ai le suāsusu ma le meli.

11Ma ‘ua foa‘i mai ‘iā Kalepo e le Ali‘i lava ia le loto tele,

‘ua tumau lona malosi e o‘o i lona toeaina,

na a‘e ai lava ia i le atumauga, ‘ua faia lava ma tofi o lona gafa,

12‘ina ‘ia iloatino e le fānau uma a Isaraelu o le mea lelei le ‘ana‘ana atu i le Atua pa‘ia.

O le ‘au Fa‘amasino

13O fa‘amasino fo‘i, i o latou igoa ta‘ito‘atasi,

o ē ‘ua lē fa‘aleagaina o latou loto, ‘ua lē ‘alo ‘ese i latou i le Atua,

14‘ina ‘ia vi‘ia le fa‘amanatuina o i latou,

‘ia fua mai ni fua i o latou ivi i o latou tu‘ugamau.

15‘Ia tūtūmau o latou igoa e o‘o i le fa‘avavau,

‘ia tūtūmau ‘iā latou fānau o le mamalu o tagata pa‘ia.

O Samuelu

16Sa alofagia e le Ali‘i, lona Atua, o Samuelu le perofeta a le Ali‘i,

‘ua toe fuata‘iina e ia le mālō,

‘ua na fa‘au‘uina o ta‘ita‘i o lona nu‘u.

17‘Ua na fa‘amasinoina le fa‘apotopotoga i le tulafono a le Ali‘i

ma ‘ua silasila ifo i ai le Atua o Iakopo;

o lona fa‘amaoni na mautinoa ai o ia o le perofeta.

18‘Ua tino mai lona fa‘amaoni i ana lava ‘upu,

auā na iloa atu e ia le Atua o le malamalama.

19Na ia vala‘au atu i le Ali‘i e ona le mana uma,

‘ina ‘ua si‘omia o ia e ona fili i ona itū uma ‘ua momoli ai le tama‘i mamoe ‘ua sao lona lelei,

20ma ‘ua fa‘apā mai e le Ali‘i le faititili mai le lagi,

ma ‘ua fa‘ao‘o mai lona si‘ufofoga ma le ta‘alili tele lava.

21Ma ‘ua ia fa‘ata‘ape‘apeina o ta‘imua o Turo ma ta‘ita‘i uma o Filisitia.

22A o le‘i o‘o i aso o le i‘uga o lona ola ma ona tausaga,

‘ua ia fai lana ta‘utinoga i luma o le Ali‘i ma lē ‘ua na fa‘au‘uina,

“‘Ua na lē talia mai i se tasi o se tupe, e o‘o lava i sina nonoa se‘evae;”

ma ‘ua lē ai se to‘atasi ‘ua na molia o ia.

23‘Ona moe lea o ia ma ‘ua na faia se fa‘aaliga i le tupu

ma ‘ua fa‘ailoa atu ‘iā te ia le i‘uga o lona ola;

‘ua ‘alaga mai nai le ‘ele‘ele lana valo‘aga ‘ia sōloi‘esea le solitulafono a le nu‘u.