Neemia 9 - Revised Samoan Catholic Bible

O le Anapogi a Isaraelu ma la Latou Tatalo

1O le aso fo‘i e luafulu ma le fa o lea masina sa fa‘apotopotoina ai le fānauga a Isaraelu, ‘ua anapopogi ma lavalava ‘ie talatala, ma le ‘ele‘ele i luga ‘iā te i latou.‘Ua Vivi‘i atu le Nu‘u i le Ali‘i

6“O oe, na o oe lava o le ALI‘I;

na e faia le lagi o le lagi o lagi,

ma ‘au uma o i ai o le lalolagi ma mea uma o i ai.

O le sami ma mea uma o i ai,

‘ua e fa‘aola fo‘i ‘iā te i latou uma.

‘Ua ifo fo‘i ‘iā te oe ‘au a le lagi.

7O oe lava o le ALI‘I le Atua, o lē na filifilia Aperamo,

ma ‘aumai ‘iā te ia a‘i Uro i Kaletaia,

ma e fa‘aigoa ‘iā te ia i le igoa o Aperaamo.

8Na e silafia fo‘i lona loto sa fa‘amaoni i ou luma,

na e faia le feagaiga ma ia e foa‘i mai le nu‘u o sa Kananā.

O sa Hetī, o sa Amorī, ma sa Perisē,

ma sa Iepusē, ma sa Kirekasē,

e foa‘i mai i lana fānau,

e fa‘ataunu‘u fo‘i au afioga.

Auā o oe o le amiotonu.

9“Na e silafia fo‘i le puapuagā o matou tamā i Aikupito,

na e fa‘afofogaina fo‘i la latou ‘alaga i le sami Ulaula.

10Na e faia fo‘i fa‘ailoga ma vāvega ‘iā Farao,

ma ana ‘au‘auna uma ma tagata uma o lona nu‘u,

auā na e silafia ‘ua latou fa‘amaualuga ‘iā te i latou.

Sa fa‘apea ‘ona e maua le vi‘iga e pei ‘ona fai i le aso nei.

11Na e vavaeina fo‘i i o latou luma le sami,

‘ia latou ui atu i totonu o le sami i le ‘iliti tai matūtū.

A o ē na tuliloa ‘iā te i latou, na e lafoina i le loloto,

e pei o se ma‘a i le sami sousou.

12O le ao fa‘aniutū na e ta‘ita‘iina ai i latou i le ao,

o le afi fa‘aniutū fo‘i i le po,

e fa‘amalamalama a‘i ‘iā te i latou i le ala latou te ō atu ai.

13Na e afio ifo fo‘i i luga i le mauga o Sinai,

ma fetalai mā i latou mai le lagi,

na e tu‘u mai fo‘i ‘iā te i latou fa‘amasinoga tonu,

ma tulafono fa‘amaoni o sauniga ma poloa‘iga lelei.

14Na e fa‘ailoa mai fo‘i ‘iā te i latou o lou sapati pa‘ia,

ma ‘ua poloa‘i mai ‘iā te i latou o poloa‘iga,

ma sauniga ma tulafono ‘iā Mose lau ‘au‘auna.

15Na e foa‘i mai fo‘i ‘iā te i latou le mea e ‘ai mai le lagi,

i lo latou fia ‘a‘ai ma fa‘apuna mai ‘iā te i latou le vai mai le papa i lo latou fia inu.

‘Ua fetalai mai fo‘i ‘iā te i latou, latou te ō atu,

e fai mo latou le nu‘u na e si‘i atu ai lou ‘a‘ao,

‘e te foa‘iina mai ‘iā te i latou.

16“A o i latou ma o matou tamā, na latou fa‘amaualuga,

ma fa‘ama‘a‘a i o latou ua ma ‘ua latou lē fa‘alogo i au poloa‘iga.

17Ma ‘ua latou lē mafafai ‘ona usiusita‘i,

‘ua latou lē manatua fo‘i i ou vāvega na e faia ‘iā te i latou.

A ‘ua latou fa‘ama‘a‘a i o latou ua,

o lo latou fouvale fo‘i ‘ua latou tofia ai le ta‘ita‘i e fo‘i atu ai i latou ‘ia nofo pologa.

A o oe o le Atua e fa‘amāgaloina sala,

o lē alofa fua ma lē alofa mutimutivale,

e telegese lou to‘asā ma ‘ua tele lou alofa,

‘ua e lē lafoa‘iina fo‘i i latou.

18E moni, ‘ua latou faia mo i latou le tama‘i povi auro,

ma ‘ua latou fai atu, ‘O lou atua lea o lē na ‘aveina a‘e ‘iā te oe mai Aikupito;’

ma latou faia mea fa‘a‘ono‘ono e tele.

19A o oe, o lou alofa mutimutivale e tele,

na e lē tu‘ua ai i latou i le vao.

‘Ua lē te‘a ma i latou le ao fa‘aniutū i le ao, e ta‘ita‘iina i latou i le ala,

ma le afi fa‘aniutū i le po e fa‘amalamalama a‘i i latou i le ala latou te ō atu ai.

20Na e foa‘i mai fo‘i lou Agaga lelei e a‘oa‘o ‘iā te i latou,

na e lē tāofia fo‘i lau manai a‘i o latou gutu,

na e foa‘i mai fo‘i ‘iā te i latou le vai i lo latou fia inu.

21O tausaga fo‘i e fagafulu na e tausia ai i latou i le vao,

‘ua lē matitiva i latou, e le‘i pala o latou ‘ofu,

o latou vae fo‘i e le‘i fulafula.

22Na e foa‘iina fo‘i ‘iā te i latou o mālō ma nu‘u,

na e vaevaeina fo‘i i latou i itū nu‘u.

‘Ua latou fai fo‘i mo i latou le nu‘u o Sekono,

ma le nu‘u o le tupu o Hesepona ma le nu‘u o Oko le tupu o Vasana.

23O a latou fānau fo‘i na e fa‘ato‘ateleina i latou e pei o fetū o le lagi,

‘ua e fa‘ao‘o fo‘i ‘iā te i latou i le nu‘u na e fetalai mai ai i o latou tamā,

latou te o‘o i ai e fai mo latou.

24‘Ua o‘o mai fo‘i le fānau,

‘ua fai fo‘i mo i latou le nu‘u.

Na e fa‘ato‘ilaloina fo‘i i o latou luma,

o ē sa mau i le nu‘u o sa Kananā.

Na e tu‘uina mai fo‘i i latou i o latou lima,

o latou tupu ‘atoa ma tagata o le nu‘u,

‘ia fai i latou ‘iā te i latou e tusa ma o latou loto.

25‘Ua faoa e i latou o ‘a‘ai nofo ‘olo ma lau‘ele‘ele lafulemū,

‘ua latou fai fo‘i mo i latou o fale sa tūtūmu i mea lelei uma,

o vai‘eli ‘ua ‘elia, o tōvine, ma tōolive, ma la‘au ‘aina e tele.

‘Ua latou ‘a‘ai ma ‘ua mā‘o‘ona ‘ua puputa fo‘i i latou,

ma ‘ua latou fiafia i lou alofa tele.

26“A ‘ua latou vaogatatā ma latou fouvale ‘iā te oe,

‘ua latou lafoa‘iina fo‘i au tulafono i o latou tua.

‘Ua latou fasioti fo‘i au perofeta o ē na a‘oa‘i ‘iā te i latou,

‘ia latou fo‘i mai ‘iā te oe.

‘Ua faia lava e i latou mea fa‘a‘ono‘ono e tele.

27O le mea lea na e tu‘uina atu ai i latou,

i lima o ē ita mai ‘iā te i latou.

‘Ua latou fa‘atigā fo‘i ‘iā te i latou,

o ona po o lo latou tigā,

‘ua latou ‘alalaga atu ai ‘iā te oe.

‘Ona e fa‘afofoga mai lea mai le lagi,

ma e foa‘iina ‘iā te i latou o ē lavea‘i e tusa ma lou alofa mutimutivale ‘ua tele,

na latou fa‘aolaina fo‘i i latou a‘i lima o ē ita mai ‘iā te i latou.

28‘Ua maua e i latou le filemū, ‘ona latou toe faia lea o amio leaga i ou luma,

‘ona e tu‘ua lea o i latou i lima o ē ita mai ‘iā te i latou.

Na latou fa‘ato‘ilaloina ai i latou,

a ‘ua latou toe fo‘i ma ‘alalaga atu ‘iā te oe.

‘Ona e fa‘afofoga mai lea ai le lagi ma lavea‘i so‘o ‘iā te i latou,

e tusa ma lou alofa mutimutivale.

29Na e a‘oa‘i fo‘i ‘iā te i latou,

‘ina ‘ia e fa‘afo‘i mai ‘iā te i latou i lau tulafono.

A ‘ua latou fa‘amaualuga ma ‘ua latou lē fa‘alogo i au poloa‘iga,

‘ua latou agasala fo‘i i au fa‘amasinoga.

(A ‘ana‘ana i ai se tagata e ola ai lava ia,)

a ‘ua ‘alo o latou tau‘au, ma ‘ua latou fa‘ama‘a‘a i o latou ua,

ma ‘ua latou lē fa‘alogo.

30‘Ae tele tausaga na e ‘onosa‘i ai ‘iā te i latou,

ma a‘oa‘i ‘iā te i latou e lou Agaga na i au perofeta.

A ‘ua latou lē fa‘alogo,

‘ona e tu‘u atu ai lea ‘iā te i latou i lima o tagata o ia nu‘u.

31A ‘ona o lou alofa mutimutivale ‘ua tele,

na e lē matuā fa‘aumatia ai i latou,

ma e lē tu‘ulafoa‘i ‘iā te i latou.

Auā o oe o le Atua alofa fua ma le alofa mutimutivale.

32“O lenei, lo matou Atua e, o le Atua silisili,

o lē mana ma le mata‘utia,

o lē tausi le feagaiga ma le alofa.

‘Aua ne‘i e manatu ‘ua itiiti le tigā uma ‘ua o‘o mai ‘iā te i matou,

ma o matou tupu ma o matou ali‘i ma a matou ositaulaga,

ma a matou perofeta ma o matou tamā ma lou nu‘u uma,

talu ona po o tupu o Asuria ‘ua o‘o mai i lenei aso.

33A o oe, ‘ua tonu lava oe i mea uma ‘ua o‘o mai ‘iā te i matou,

auā ‘ua e fa‘amaoni, a o i matou, ‘ua matou amio leaga.

34E le‘i faia fo‘i lau tulafono e o matou tupu,

o matou ali‘i, o a matou ositaulaga ma o matou tamā.

‘Ua latou lē fa‘alogo fo‘i i au poloa‘iga ma au fa‘atonuga,

na e fa‘atonu mai ai ‘iā te i latou.

35Auā na latou lē ‘au‘auna ‘iā te oe i lo latou mālō,

ma lou alofa tele na e foa‘i mai ai ‘iā te i latou ma le nu‘u tele ma le lafulemū.

Na e tu‘uina mai i o latou luma,

ma ‘ua latou le fo‘i mai ‘iā latou amio leaga.

36Fa‘auta, o pologa i matou i le aso nei,

o le nu‘u fo‘i na e foa‘i mai i o matou tamā,

e ‘a‘ai i ona fua ma ana mea lelei, fa‘auta, o pologa i matou i ai.

37E tutupu mai ai fo‘i mea e tele mā tupu,

‘ua e tu‘uina mai e pule ‘iā te i matou ‘ona o a matou agasala.

‘Ua latou pule fo‘i i o matou tino ma a matou manu,

i lo latou faitalia, e tele fo‘i lo matou puapuagā.”

O Tagata sa Latou Sainia le Feagaiga

38‘Ona o ia mea uma fo‘i ‘ua matou fai ai le feagaiga moni ma tusi ai; ‘ua fa‘amaufa‘ailogaina fo‘i e o matou ali‘i, ma o matou tagata sa Levī, ma a matou ositaulaga.