Salāmo 102 - Revised Samoan Catholic Bible

O le Manatu i le Alofa o le Atua ‘ua Fa‘amafanafanaina ai lē ‘ua TigāinaO le tatalo a lē ‘ua puapuagātia pe a fa‘avaivai o ia ma ‘ua matuā tagi atu o ia i le ALI‘I

1Le ALI‘I e,

fa‘afofoga mai ia i la‘u tatalo,

ma ‘ia o‘o atu la‘u ‘alaga ‘iā te oe.

2‘Aua le ‘alo ou fofoga ‘iā te a‘u

i le aso e puapuagātia ai a‘u;

‘ia liliu mai ou fofoga ‘iā te a‘u;

‘ia ta‘alise ‘ona e tali mai ‘iā te a‘u i le aso ‘ou te vala‘au atu ai ‘iā te oe.

3Auā ‘ua mavae o‘u aso fa‘apei o le asu,

o o‘u ivi fo‘i ‘ua mū e pei o le motumotu.

4‘Ua sasaina ma ‘ua magumagu lo‘u loto pei o le vao iti;

o lea ‘ua galo ai ‘iā te a‘u ‘ona ‘ai i la‘u mea e ‘ai.

5O le leo o lo‘u mapuitigā

‘ua pipi‘i ai o‘u ivi i lo‘u ‘a‘ano.

6‘Ua tusa a‘u ma le kati o le vao;

‘ua ‘avea a‘u pei o le kusa i mea ‘ua fa‘atafunaina.

7O lo‘o ‘ou mataala ma ‘ua ‘avea a‘u e pei o le manu itiiti

e nofo to‘atasi i luga o le fale.

8O le aso ‘atoa ‘ua gaogao mai ai o ē ita mai ‘iā te a‘u;

o ē ‘ua fa‘avalemalosi mai ‘iā te a‘u

‘ua tautō i latou e agaleaga ‘iā te a‘u.

9Auā o lo‘o ‘aina e a‘u o le lefulefu e pei o le mea e ‘ai,

‘ua ‘ou filogia fo‘i la‘u mea e inu ma le tagi,

10‘ona o lou to‘atama‘i ma lou to‘asā.

Auā na e si‘itia a‘u i luga,

na e lafotūina fo‘i a‘u i lalo.

11O o‘u aso ‘ua pei o le ata ‘ua lafoia;

o a‘u nei fo‘i ‘ua pei o le vao iti ‘ona magumagu.

12A o oe, le ALI‘I e,

e afio oe e fa‘avavau lava,

ma le fa‘amanatuga ‘iā te oe, e āu tupulaga lava lea.

13‘E te tula‘i mai oe, e mutimutivale lou alofa i Siona;

auā ‘ua o‘o mai ona po e alofaina ai o ia,

‘ua o‘o lava i ona aso na tu‘upoina.

14Auā o lo‘o fiafia au ‘au‘auna i ona ma‘a,

o lo‘o alolofa lava i lona efuefu.

15E matata‘u fo‘i nu‘u ‘ese i le suafa o le ALI‘I,

ma tupu uma o le lalolagi e matata‘u i lou mamalu.

16Auā e atiina a‘e Siona e le ALI‘I,

e iloa mai o ia i lona mamalu.

17E liuliu alo mai o ia i le tatalo a lē ‘ua mativa,

e lē ‘ino‘ino fo‘i o ia i la latou tatalo.

18E tusia lenei mea mo le tupulaga amulī;

o le nu‘u fo‘i e faia, latou te vivi‘i atu i le ALI‘I.

19Auā ‘ua silasila mai o ia mai lugā i lona afio‘aga pa‘ia;

‘ua silasila le ALI‘I mai le lagi i le lalolagi.

20‘Ina ‘ia fa‘afofoga o ia i le ōi o lē ‘ua noanoatia;

‘ina ‘ia tālaina e ia o ē na tu‘u e oti.

21E ta‘uta‘u atu ai le suafa o le ALI‘I i Siona,

ma lona vi‘iga i Ierusalema;

22pe a fa‘apotopotoina fa‘atasi o nu‘u,

ma mālō e ‘au‘auna ai i le ALI‘I.

23Na ia fa‘avaivaia lo‘u malosi i le ala,

na ia fa‘aitiitiina fo‘i o‘u aso.

24Na ‘ou fai atu,

“Lo‘u Atua e,” “‘aua le ‘ave‘eseina a‘u i le tautuluaga o o‘u aso;

e au tupulaga lava o‘u tausaga.”

25O anamua na e fa‘avaeina ai le lalolagi;

o le lagi fo‘i o le galuega lea a ou ‘a‘ao.

26E fa‘aumatia ia mea a o oe, ‘e te tumau pea;

e pala ia mea uma e pei o le ‘ofu tele,

‘e te liua ia e pei o le ‘ofu, ‘ona liua lava lea.

27A o oe, e fa‘apea lava pea oe;

e le i‘u lava ou tausaga.

28E nofo mau atali‘i o au ‘au‘auna,

o la latou fānau fo‘i e fa‘atumauina ia i ou luma.