Pese 2 - Revised Samoan Catholic Bible

1O a‘u o le fuga o le la‘au i Sarona,

o le susana i vanu.

Ali‘i.

2E pei o le susana i totonu o la‘au talatala,

o lo‘o fa‘apea la‘u uō i teine.

Tama‘ita‘i.

3E pei o le moli i totonu o la‘au o le vao,

o lo‘o fa‘apea lo‘u manamea i taulele‘a.

Na ‘ou fiafia i lona paolo ma ‘ou nofo ai,

na suamalie fo‘i ona fua i lo‘u gutu.

4Na ia ‘aumaia a‘u i le fale uaina,

o lana fu‘a i o‘u luga, o le alofa lea.

5‘Ia ‘outou fa‘amalosia a‘u i pōtoi vine;

‘inā fofola mai ia o moli;

auā o a‘u ‘ua ‘ou vaivai i lo‘u alofa atu.

6‘Ua i lalo o lo‘u ulu lona lima tauagavale,

‘ua fusi mai fo‘i ‘iā te a‘u lona lima taumatau.

7Tama fafine o Ierusalema e,

‘ou te fai atu ‘iā te ‘outou, ‘ia tautō mai i sevi ma ‘aila o le vao,

tou te lē tātātuli pe fafagu i la‘u pele, se‘ia faitalia o ia.

O le Lua o PeseTama‘ita‘i.

8O le leo o lo‘u manamea.

Fa‘auta o lo‘o sau o ia, o lo‘o osooso i luga o mauga,

o lo‘o matuā osooso fo‘i i mea maupu‘epu‘e.

9E pei o se sevi

po o se tama‘i ‘aila lo‘u manamea.

Fa‘auta, o lo‘o tu mai o ia i tuāpā o le tatou fale.

O lo‘o silasila mai i fa‘amalama,

o lo‘o pupula mai lona tino i le mea fa‘amata‘upega.

10Na tautala mai lo‘u manamea, ‘ua fa‘apea mai ‘iā te a‘u.

Ali‘i.

“Si a‘u uō e, si ‘ou lālelei e,

‘inā tula‘i mai ia oe, ‘inā sau ia.

11Auā, fa‘auta mai ia, ‘ua mavae le tausaga ma‘alili,

‘ua mavae le timuga, ‘ua te‘a ia.

12‘Ua iloa atu fuga i le fanua,

‘ua o‘o mai le tau e teuteu ai vine,

‘ua lagona fo‘i le leo o le manutagi i lo tatou nu‘u.

13‘Ua matuā fua le mati sa moto;

‘ua pua‘iina fo‘i le nanamu o vine ‘ua fuga.

Si a‘u uō e, si ‘ou lālelei e,

‘inā tula‘i ia oe, ‘inā sau ia.

14La‘u lupe e,

‘ua i ana o papa ma lafitaga o i mato.

‘Inā fa‘aali mai ia ou mata ‘iā te a‘u,

so‘u fa‘alogo i lou leo auā o le leo malie lou leo,

e lālelei ou mata.

15‘Inā ‘outou pupu‘e ia mā tatou o alope, o alope iti,

o ē fa‘amaumau i vine auā ‘ua fua o tatou vine.”

Tama‘ita‘i.

16O lo‘u manamea, o lo‘u lava ia, e fai fo‘i a‘u mōna.

‘Ua ia fafaga i lona lafu i totonu o susana.

17Lo‘u manamea e, ‘inā fo‘i mai ia se‘ia gafoa le ata,

ma mavae le pogisā.

‘Ia ‘avea oe e fa‘apei o se sevi,

po o se tama‘i ‘aila i mauga o Petere.