1O aso o Salemanesa o le tupu o tagata Asuria, na fa‘aaunu‘ua ai o Topita, o le tagata o le itū‘āiga o Nafatali ma le ‘a‘ai o Nafatali, o lo‘o i mauga o Kalilaia, i gāuta o Naasona, i tala atu o le ala e tau atu i le itū i sisifo, o i lona itū tauagavale le ‘a‘ai o Sefeta.
2‘Ua fa‘aaunu‘ua o ia i aso o Salemanesa le tupu o tagata Asuria; ‘ua ‘avea fa‘atagataotau‘a, ‘ae ‘ua lē tu‘ulafoa‘iina ai e ia le ala o le fa‘amaoni.
3I le o mea uma sa mafai ‘ona ia maua, sa ia fa‘asoaina i aso uma i ona uso o lona gafa sa latou tāfea ma ia.
4E ui fo‘i ‘ina itiiti o ia i tagata uma o le itū‘āiga o Nafatali, a ‘ua leai lava sana amio fa‘atamaitiiti.
5O aso sa gasolo ai o tagata uma i tama‘i povi auro sa gaosi e Ierepoamo, le tupu o Isaraelu, o ia to‘atasi sa ‘alo‘ese ai i tagata uma. O le Fa‘amaoni o Topita i lana Tapua‘iga
6A ‘ua malaga atu o ia i Ierusalema i le malumalu o le Ali‘i, e ifo ai i le Ali‘i le Atua o Isaraelu, o momoli atu ma le fa‘amaoni ana mea fa‘apolopolo uma ma mea e sefulua‘i ana mea.
8O mea ia ma isi mea fa‘apea sa ia tausi i ai talu lona itiiti e tusa ma le tulafono a le Atua.
O le Fa‘amaoni o Topita a o Fa‘aaunu‘ua o Ia9A ‘ua o‘o ‘ina tagata matua o ia, ‘ona ia faiavā lea ‘iā Ana o le teine o lona itū‘āiga, ‘ua fānau ‘iā te ia sona atali‘i ma ‘ua fa‘aigoa ‘iā te ia o Tovia.
10Na a‘oa‘o ‘iā te ia talu ‘ina itiiti i le mata‘u i le Atua ma le ‘alo‘ese i le agasala.
11O lenei, ‘ua ‘avea fa‘atagataotau‘a ‘atoa ma lana avā ma lona atali‘i i le ‘a‘ai o Nineva fa‘atasi ma lona itū‘āiga uma lava.
12Sa ‘a‘ai tagata uma i mea e ‘ai a nu‘u ‘ese, a o ia lea ‘ua na fa‘asao lona agaga ma ‘ua lē fa‘aleagaina o ia ‘iā latou mea e ‘ai.
13‘Ua manatu o ia i le Ali‘i ma lona loto ‘atoa, o le mea fo‘i lea na foa‘i atu ai e le Atua ‘ina ‘ia alofagia o ia e le tupu o Salemanesa.
14‘Ua na tu‘u atu ‘iā te ia le pule e alu i mea uma ‘ua loto i ai, faitalia lava ia i se mea na te faia.
15I le sa aga‘i atu o ia ‘iā te i latou uma sa i le nu‘u o tagataotau‘a, sa lapata‘i ‘iā te i latou i mea tau le olataga.
16Na o‘o atu o ia i Rakai, le ‘a‘ai o tagata Metai, o ‘iā te ia o taleni ario e sefulu, o le mea alofa na fa‘aaloaloina a‘i o ia e le tupu.
17‘Ua na iloa atu, i le vao tagata e to‘atele o lona nu‘u, o lo‘o mativa o Kapaelu, o le tagata o lona itū‘āiga, ‘ona tu‘u atu lea ‘iā te ia le tupe ario na se‘i ta‘ua nei.
O le Fesoasoani a Topita i Tagata o lona Nu‘u18A ‘ua mavae aso e tele, ‘ua oti le tupu o Salemanesa, ‘ae fai ma tupu e soloa‘i ‘iā te ia o Sanerivi, lona atali‘i, sa ‘ino‘ino lona loto i le fānau a Isaraelu.
19Sa alu atu Topita i aso ta‘itasi i tagata uma o lona ‘āiga, ‘ua fa‘amafanafana ‘iā te i latou ma tufatufa ‘iā i latou ta‘ito‘atasi o ana mea e tusa ma lona mafaia.
20Sa ia fafaga i ē fia ‘a‘ai, sa ia avatua ni ‘ofu i ē lē lavalavā, sa mā‘elegā fo‘i i tanu o ē na oti ma ē fasiotia.
21‘Ae maise o aso na toe fo‘i mai ai o le tupu o Sanerivi, o sōsōla ‘ese o ia i Iuta i le mala na fa‘atupu i ona tagata e le Atua ‘ona o ana ‘upu fāifai, na fasi lava e le tupu i lona ita i ni isi e to‘atele o le fānau a Isaraelu, ‘ae tanu e Topita o latou tino.
22A ‘ua tala atu i le tupu lea mea, ‘ona poloa‘i ai lea ‘ia fasia o ia ma ‘ua faoa o ana mea uma.
23‘Ae na sōsōla o Topita fa‘atasi ma lona atali‘i ma lona to‘alua ma ‘ua lafi o ia i lona mativa, auā sa alolofa ‘iā te ia ni isi e to‘atele.
24‘Ua mavae atu aso e fasefulu ma le lima, ‘ona fasia lea le tupu e ona atali‘i; i le ‘ua fo‘i atu o Topita i lona fale ma ‘ua fa‘afoisia ‘iā te ia ana mea uma.
Who We AreWhat We EelieveWhat We Do
2025 by iamachristian.org,Inc All rights reserved.
