Topita 6 - Revised Samoan Catholic Bible

O le I‘a Fe‘ai i le Tikera

1O lenei, ‘ua alu o Tovia ma ‘ua mulimuli atu ‘iā te ia lana ta‘ifau ma ‘ua fa‘ato‘ā mālōlō le malaga i le vaitafe o le Tikera.

2‘Ua alu fo‘i o ia e fufulu ona vae, fa‘auta, ‘ua oso le i‘a fe‘ai e ‘ai ‘iā te ia.

3‘Ua mata‘utuia ai o Tovia, ‘ua ia ‘alaga ai ma le leo tele: Ali‘i e, o lo‘o oso mai ‘iā te au.

4Ma ‘ua fai atu le agelu ‘iā te ia: ‘Ia e pu‘e i ona ‘apa‘apa ma toso mai ‘iā te oe.

‘Ua fa‘apea ‘ona fai, ‘ua tōsina ai le i‘a i le mea matūtū; ‘ona amata ai lea ‘ona tafitifiti i ona luma,

5‘ona fai mai lea le agelu ‘iā te ia: ‘Ia e fa‘atiau lenei i‘a, a ‘ia tu‘u ma oe o le fatu, o le au ma le ate, auā e matuā aogā lava ia e fai ma vai fofō.

6‘Ua fa‘apea ‘ona fai, ‘ona ia tunu lea o lona ‘a‘ano ma ‘ua ‘ave ma i lā‘ua i le malaga. ‘Ua la fa‘amasima o toe ‘a‘ano, ‘ia lava ai mo i lā‘ua se‘ia taunu‘u atu i Rakai le ‘a‘ai o tagata Metai.

7‘Ona fesili atu lea o Tovia i le agelu ‘ua fa‘apea atu:

‘Ou te ‘ai‘oi atu ‘iā te oe, Asaraia e o lo‘u uso, ‘ia e ta‘u mai pe se ā se fofō e aogā i ai o mea ia a le i‘a na e poloa‘i mai ‘ou te tāofia.

8Ma ‘ua tali mai le agelu; ‘ua fa‘apea mai ‘iā te ia:

‘Āfai ‘e te tu‘u sina mea o lona fatu i luga o malala ‘a‘asa, o lona asu e tuli‘eseina ai o itū‘āiga temoni ‘ese‘ese uma ‘ua i se tane po o se fafine ma ‘ua lē toe maulu mai lava ‘iā te i latou.

9A o le au e aogā e nini ai o mata ‘ua i ai le moalili ‘ona toe lelei ai lea.

10‘Ona fai atu lea o Tovia ‘iā te ia: Po o fea ‘ua e loto tā te api ai?

11Ma ‘ua tali mai le agelu, ‘ua fa‘apea mai: O lo‘o ‘i‘inei le tagata, o Rakuelu lona igoa, o le tagata o lou itū‘āiga, o lou ‘āiga lava ia; ‘ua i ai fo‘i lona afafine e igoa ‘iā Sara ma ‘ua lē o ‘iā te ia sona atali‘i po o sona afafine, na o ia lava.

12E tatau ‘ona tu‘uina mai ‘iā te oe o ana ‘oloa ‘atoa uma, e tatau fo‘i ‘ona e faiavā ‘iā te ia.

13O lenei, ‘ia e tagi atu ai i lona tamā, ‘ona ia tu‘u mai lea ‘iā te oe e fai māu avā.

14‘Ona tali atu lea o Tovia ‘iā te ia, ‘ua fa‘apea atu: ‘Ua ‘ou fa‘alogo na tu‘uina lava ia i tane e to‘afitu ma ‘ua oti i latou; ‘ua ‘ou fa‘alogo fo‘i i le tala, o le temoni lava na ia fasioti ‘iā te i latou.

15O lenei ‘ua ‘ou fefe ne‘i o‘o fo‘i ‘iā te a‘u o mea ia; auā na o a‘u le fānau a o‘u matua, o lea, ‘ou te fa‘aifo ai i latou i le tu‘ugamau ma le fa‘anoanoa i aso e matutua ai i lā‘ua.O le Fa‘atonuga a le Agelu ‘iā Tovia

16‘Ona fai mai lea o le agelu o Refaelu ‘iā te ia: ‘Ia e fa‘alogo mai ‘iā te a‘u, ‘ou te fa‘ailoa atu ‘iā te oe po o ai tagata e mafai ‘ona manumālō i ai le temoni.Topi 4.12-13

17O i latou lava ‘ua latou talia le fa‘aipoipoga, o vavae‘ese ai le Atua i o latou loto ma o latou manatu, ma ‘ua latou ‘ana‘ana i o latou tu‘inanau e fa‘apei o le solofanua ma le falata e lē o i ai se mafaufau, o i latou ia e pule i ai le temoni.

18A o oe, pe a e talia o ia, ‘ia e ulu atu i lo ‘oulua potu ma ‘aua ‘e te tago ‘iā te ia i po e tolu, ‘ia gata lava i le tatalo ‘ona ‘oulua fa‘asaga i ai ma ia.Kene 24.44

19O le po lava lenā ‘e te susunu ai le ate o le i‘a e tuli‘eseina ai le temoni.

20A o lona lua o po e talia ai oe i le soamafutaga ma le au tupuga amiotonu.

21A o lona tolu o po ‘e te maua mai ai le fa‘apa‘iaga, ‘ina ‘ia tutupu mai ‘iā te ‘oulua ni fānau malolosi.

22A mavae atu lona tolu o po, ‘ona e talia lea le teine ma le mata‘u i le Ali‘i, o ‘ana‘ana i lou mana‘o i le fānau ‘ae lē o lou tu‘inanau, ‘ina ‘ia maua mai ai i ou atali‘i o fa‘amanuiaga ‘ua folafolaina i le gafa o Aperaamo.