Salāmo 26 - Revised Samoan Catholic Bible

O le Tatalo ‘ina ‘ia Silasila le ALI‘I i lē ‘ua Fa‘amaoniO le salāmo a Tavita

1Le ALI‘I e,

‘ia e fa‘amasino ‘iā te a‘u;

auā o a‘u nei ‘ua ‘ou savali ma la‘u amio sao;

‘ou te fa‘atuatua fo‘i i le ALI‘I;

e le mapeva o‘u vae.

2Le ALI‘I e,

‘ia e su‘esu‘e ‘iā te a‘u ma tofotofo ‘iā te a‘u;

‘ia e fa‘amamā i o‘u manatu ma lo‘u loto.

3Auā o lo‘o i o‘u luma lou alofa;

‘ua ‘ou savali fo‘i i le mea moni mai ‘iā te oe.

4‘Ou te le‘i nofo fa‘atasi ma tagata ulavavale;

‘ou te le‘i alu fa‘atasi ma tagata pepelo.

5‘Ua ‘ou ‘ino‘ino i le fa‘apotopotoga o ē fai mea leaga;

‘ou te lē nofo fo‘i fa‘atasi ma tagata amio leaga.

6‘Ou te fafano o‘u lima e fai ma fa‘ailoga ‘ua ‘ou lē sala;

‘ona ‘ou fa‘ata‘amilomilo ai lea i lou fatafaitaulaga, le ALI‘I e.

7‘Ina ‘ia lagona atu le leo o le vi‘iga,

ma ‘ia ta‘uta‘u atu ou vāvega uma lava.

8Le ALI‘I e,

‘ou te fiafia i le mea e tu ai lou maota,

o le mea fo‘i e afio ai lou mamalu.

9‘Aua ne‘i e fa‘atasia a‘u ma tagata agasala,

ma lo‘u ola ne‘i fa‘atasia ma tagata ‘ua totolima.

10O lo‘o i o latou lima amio leaga,

‘ua tūtūmu fo‘i o latou lima taumatau i mea alofa.

11‘Ae peita‘i a‘u nei, ‘ou te savali ma la‘u amio sa‘o;

‘ia e lavea‘i ‘iā te a‘u ma ‘ia e alofa mai ‘iā te a‘u.

12‘Ua tu o‘u vae i le mea laugatasi;

‘ou te fa‘amanū atu i le ALI‘I i totonu o fa‘apotopotoga.