1O a‘u fo‘i, le au uso e, na ‘ou lē mafaia ‘ona tautala atu ‘iā te ‘outou fa‘apei o ē fa‘aleagaga, ‘ae peita‘i pei o ē fa‘aletino, pei o i tama meamea ‘iā Keriso.
2Na ‘ou fafaga ‘iā te ‘outou i le suāsusu, ‘ae lē o mea ‘a‘ano; auā nā ‘outou lē lava i ona po ia, i le tou te lē lavā fo‘i ‘ua o‘o mai i ona po nei;1 Pete 2.2; Epe 5.12-13
3auā ‘ua fa‘aletino pea ‘outou; auā ‘ina o i ai ‘iā te ‘outou le matau‘a ma le misa, e lē o fa‘aletino ‘ea ‘outou ma sāvavali i la le tino?
4Auā ‘ina o fai mai le tasi, “O a‘u o lo sa Paulō;” ma le tasi, “O a‘u o lo sa Apolō,” ‘ua lē fa‘aletino ‘ea ‘outou?
5O ai fo‘i Paulo? O ai ‘ea Apolo? O i mā‘ua na o ‘au‘auna, o ē ‘ua ala ai ‘ona ‘outou fa‘atuatua, pei ‘ona tofusia i mā‘ua ma le galuega na tu‘uina mai e le Ali‘i.Galu 18.24, 27
6Na ‘ou totōina, na fa‘asūsūina e Apolo; ‘ae peita‘i o le Atua na fa‘atupuina.Galu 18.4, 11
7O lenei, e lē o lē totō, e lē o lē fa‘asūsū; ‘ae peita‘i o le Atua o lē na te fa‘atupuina.
8A o lē totō fo‘i ma fa‘asūsū, e tasi lava i lā‘ua; ‘ae ta‘itasi ma lona lava taui e maua, e tusa ma lana lava galuega.
9Auā o le ‘au faigaluega i matou fa‘atasi ma le Atua; o ‘outou o le fa‘ato‘aga a le Atua, o ‘outou o le fale o fai o le Atua.Mata 13.3-9; Efe 2.20
10E tusa ma le alofa o le Atua na foa‘iina mai ‘iā te a‘u, pei o se ‘autū o tufuga e poto, na ‘ou tu‘u le fa‘avae, o le tasi fo‘i o lo‘o ati a‘e; a ‘ia ta‘ito‘atasi ma fa‘aeteete pe fa‘apefea ona ati a‘e.2 Pete 3.15
11Auā e lē mafaia e se tasi ‘ona tu‘u se isi fa‘avae i le ‘ua uma ‘ona tu‘uina, o Iesu le Keriso lea.
12I luga o lenei fa‘avae ‘āfai e ati a‘e ai e se tasi i le auro, le ario, le ma‘a tāua; le la‘au, le vaofalī, po o tagutugutu o saito;
13o le a fa‘aalia galuega a tagata ta‘ito‘atasi; o le a fa‘ailoa fo‘i e le Aso, auā o le a fa‘aalia i le afi; o le a tofotofoina fo‘i galuega a tagata ta‘ito‘atasi i le afi po ‘ua fa‘apefea.1 Kori 4.5; 2 Tesa 1.8
14‘Āfai e tumau le galuega a se tasi na ia ati a‘e, o le a maua e ia le taui.
15‘Āfai o le a fa‘amūina le galuega a se tasi, e māumau ana mea; peita‘i ane o le a sao o ia, ‘ae pei o sē na ui mai i le afi.
16Tou te lē o iloa ‘ea o le malumalu ‘outou o le Atua, o lo‘o nofo fo‘i le Agaga o le Atua i totonu ‘iā te ‘outou?1 Kori 6.19; 2 Kori 6.16
17‘Āfai e fa‘aleaga e se tasi le malumalu o le Atua, e fa‘aleagaina lenā tagata e le Atua; auā e pa‘ia le malumalu o le Atua, o ‘outou lava ia.
18‘Aua ne‘i ai se tasi e fa‘asesēina o ia e ia. ‘Āfai ‘ua ‘iā te ‘outou se tasi o manatu e poto ia i lenei lalolagi, ‘ia ‘avea ia ma vale, ‘ina ‘ia poto ai o ia.Fa‘aa 3.17-18
19Auā o le poto o lenei lalolagi o le valea lea i luma o le Atua; auā ‘ua tusia, “E maua e ia o ē popoto ‘iā latou lava togafitiga;”Iopu 5.12-13
20i le ma lea, “‘Ua silafia e le Ali‘i mānatunatu o ē popoto, ‘ua fa‘atauva‘a ia.”Sala 94.11
21O lenei, ‘aua le mitamita se tasi i tagata; auā o mea uma o a ‘outou ia,
22po o Paulo, po o Apolo, po o Kefa, po o le lalolagi, po o le ola, po o le oti, po o mea i nei ona po, po o mea atalī; o mea uma lava, o a ‘outou ia;
23e o Keriso fo‘i ‘outou; e o le Atua fo‘i Keriso.
Who We AreWhat We EelieveWhat We Do
2025 by iamachristian.org,Inc All rights reserved.
