Poto 19 - Revised Samoan Catholic Bible

O le Fa‘asalaga o Tagata Aikupito i le Sami Ulaula

1A ‘ua tuliloaina o tagata amio leaga, e o‘o i le gata‘aga,

i le ita ‘ua aunoa ma se agaalofa; auā sa silafia e le Atua o mea o le a faia e i latou;

2na latou fa‘atagaina le te‘a ‘ese o tagata agatonu ma ‘ua latou u‘una‘i atu i ai ma le matuā finafinau;

‘ae o le a toe salamō ai lava ma tulituliloa ‘iā te i latou.

3Auā ‘ua lē mae‘a lelei sauniga o le fa‘anoanoa; sa fētāgisi pea i latou i tu‘ugamau o ē na oti;

a ‘ua latou liliu atu i se tasi manatu fa‘avalea ma ‘ua tuliloaina, e pei ‘ona tulia se sola‘aga,

o ē na latou u‘una‘i atu i ai ‘ia te‘a ‘ese ma i latou.

4Sa tōsina i latou i lea mea, ‘ona ‘ua tonu ma tatau ‘ia galo ‘iā te i latou mea na se‘i tutupu

ma ‘ia latou talia ai ma le ‘ato‘atoa o mea ‘ua totoe o lo latou fa‘asalaga;

5auā ‘ua sao atu o lou nu‘u i se ala ofoofogia, a ‘ua maua ai e i latou ‘ia le oti uiga ‘ese.

Sa Tausia lava e le Atua ona Tagata

6Auā ‘ua liua le uiga o mea uma lava na faia i le amataga, ‘ua latou ‘ana‘ana i au lava poloa‘iga,

‘ina ‘ia fa‘asaogalemūina ai o lau fānau.

7Auā na fa‘apaologia lo latou togālauapi i le ao; o le mea fo‘i sa i ai i muamua le sami,

‘ua aliali mai ai le ‘ele‘ele matūtū; ‘ua saogalemū lo latou ala i le Sami Ulaula ma ‘ua liua le sami sousou i se malae e tupu ai le mutia.

8Na ui atu ai le nu‘u ‘ato‘atoa, o puipuia i latou e lou ‘a‘ao, o va‘ava‘ai i au vāvega ma au mea ofoofogia.

9E pei o ni solofanua i le taaga, e pei o ni tama‘i mamoe e osoosofa‘i,

e fa‘apea ‘ona latou fa‘amanū ‘iā te oe, le Ali‘i e, o lo latou Fa‘aola.

10Auā sa latou manatua pea mea na faia i aso o lo latou ta‘asēga,

o le ‘ele‘ele sa lē toe tupu mai ai le vao manu ‘ese‘ese, a ‘ua na o lago lava;

a o le vaitafe ‘ua lē toe maua ai ni i‘a, na o le vao rane.

11Mulimuli ane, ‘ina ‘ua tōsina i latou i lo latou tu‘inanau, ‘ua tagi atu i ni mea e ‘ai e lololo,

‘ua latou iloa atu ai ma ni manu felelei uiga ‘ese,

12auā ‘ua fa‘aali atu lo latou mana‘oga, ‘ona fe‘ā‘ei mai lea o salu mai i tai.

Na pesi le fa‘asalaga i luga o tagata agasala ma ‘ua mua‘i fa‘aalia mai i ni uila tetele.

Sa tatau lava ‘ona puapuagātia i latou, auā o la latou lava amio leaga.

O le Fa‘asalaga i Tagata Aikupito

13Auā na fa‘aalia e i latou le ‘ino‘ino e aupito leaga i tagata ‘ese;

o ni isi na latou le fia tali i tagata ‘ese sa latou lē iloa,

a o i latou nei na latou fa‘apologa i tagata ‘ese na agaalofa ‘iā te i latou.

14Ma le tasi mea fo‘i na feoloolo ai o Sotoma, auā sa latou tali i tagata ‘ese ma le loto musuā.

15A o i latou nei na mua‘i tali i lou nu‘u ma le fiafia ma fa‘atū i le tulaga e tasi ma i latou lava,

a o lenei ‘ua latou fa‘atigā ‘iā te i latou i puapuagā aupito leaga.

16O lea ‘ua taia ai i latou ma fa‘atauasoina, e pei lava o tagata sa i luma o le faitoto‘a o le tagata amiotonu,

‘ona ‘ua ufitia fa‘afuase‘i i latou i le pogisā, ma ‘ua ta‘ito‘atasi ma sā‘ili‘ili le ala i le faitoto‘a. E Ofoofogia le Malosi o le Atua

17Auā na fesuia‘i o latou uiga i mea fa‘alalo nei, e pei ‘ona suia le fati e tā i uaua o le la‘au pese,

‘ae tumau pea o latou lava leo ta‘itasi; e iloatino lea mea pe a va‘ava‘ai atu i mea na tutupu.

18Auā o manu o le fanua na liua ma i‘a o le sami, a o mea sa ola i le vai na latou sosolo i fanua.

19Sa fa‘asili e le afi lona ia malosi i totonu o le vai, ‘ae galo fo‘i i le vai lana masani o le tinei le afi.

20Ma le tasi fo‘i, ‘ua lē afaina i le afi o tino manu vaivai sa feoa‘i ai,

sa lē liu suāvai ai fo‘i lenei mea e ‘ai lelei sa fa‘asuāvaiagofie e pei o le uato‘a.

Auā o mea uma lava na e fa‘amamalu a‘i i lou nu‘u, le Ali‘i e, ma ‘ua e fa‘aaloalo i ai;

‘ua e lē tu‘ulafoa‘i, a ‘ua e fesoasoani lava i ai i mea uma ma aso uma lava.