Teuteronome 26 - Revised Samoan Catholic Bible

O ‘Upu e fai atu pe a avatu le Fa‘apolopolo o Fua

1A e o‘o atu fo‘i i le nu‘u ‘ua foa‘iina mai e le ALI‘I lou Atua ‘iā te oe e fai mou tofi, ‘ae fai mou lava, ma e nofo ai;

2‘ona e ‘aumai ai lea o fa‘apolopolo o fua uma lava o le lau‘ele‘ele, ‘e te ‘aumai ai a‘i lou nu‘u ‘ua foa‘iina mai e le ALI‘I lou Atua ‘iā te oe, ma e tu‘uina ai i se ‘ato ma e alu atu i le mea e filifilia e le ALI‘I lou Atua e tu‘u ai lona suafa. e i ai i ia ona po, ma e fai atu ‘iā te ia, “‘Ou te fa‘ailoa atu i le aso nei i le ALI‘I lou Atua, ‘ua ‘ou o‘o mai i le nu‘u sa tautō ai le ALI‘I i o tatou tamā na te foa‘iina ‘iā te i tatou.”

4‘Ona talia lea e le ositaulaga le ‘ato nai lou lima, ma tu‘u atu ai i luma o le fatafaitaulaga o le ALI‘I lou Atua.

5‘Ona e tautala atu lea, ma fa‘apea atu i luma o le ALI‘I lou Atua, “O lo‘u tamā o le Suria ia na fai a oti; ‘ona alu ifo ai lea o ia i Aikupito, na āumau ai fo‘i o ia ma ni nai to‘aitiiti, ‘ua ‘avea ai fo‘i ma nu‘u tele, e malolosi, ma le to‘atele.

6‘Ona agaleagaina lea o i tatou e tagata Aikupito, ma latou fa‘atigā mai ‘iā te i tatou, ma latou tu‘u mai ‘iā te i tatou o galuega mamafa.

7‘Ona tatou ‘alalaga atu lea i le ALI‘I le Atua o tatou tamā, na fa‘afofoga mai fo‘i o le ALI‘I i o tatou leo, ma ‘ua silasila mai i o tatou tigā, ma a tatou galuega mamafa, ma le sauāina o i tatou.

8‘Ona ‘aumaia lea o i tatou e le ALI‘I nai Aikupito i le ‘a‘ao malosi, ma le ‘a‘ao fa‘aloaloa, ‘atoa ma mea mata‘utia tele, ma fa‘ailoga, ma vāvega.

9‘Ua fa‘ao‘o mai fo‘i e ia ‘iā i tatou i lenei mea, ma ‘ua foa‘i mai ‘iā te i tatou lenei nu‘u, o le nu‘u e tafe ai le sua susu ma le meli;

10o lenei fo‘i, le ALI‘I e, fa‘auta mai, ‘ua ‘ou ‘aumaia le fa‘apolopolo o fua o le lau‘ele‘ele, ‘ua e foa‘iina mai ‘iā te a‘u.” ‘Ona e tu‘uina atu ai lea i luma o le ALI‘I lou Atua, ‘e te ifo atu fo‘i i luma o le ALI‘I lou Atua;

11ia e ‘oli‘oli fo‘i i mea lelei uma lava ‘ua foa‘iina mai e le ALI‘I lou Atua ‘iā te oe ma lou ‘āiga, o oe, ma le sa Levī, ma le tagata ‘ese o ‘iā te oe.

12Pe a uma ‘ona avatu e oe o mea uma e sefulua‘i au mea na maua mai i lona tolu o tausaga, o le tausaga lea e avatu ai mea e sefulua‘i, ma ‘ua e avatua i le sa Levī, ma le tagata ‘ese, ma lē ‘ua aumatuā, ma le fafine ‘ua oti lana tane, latou te ‘a‘ai ai ma latou mā‘o‘ona ai i au ‘a‘ai;Teu 14.28-29

13‘ona e fai atu lea i luma o le ALI‘I lou Atua: “‘Ua ‘ou ‘aumaia mea pa‘ia nai lo‘u fale, ‘ua ‘ou avatua fo‘i i le sa Levī, ma le tagata ‘ese, ma lē ‘ua aumatuā, ma le fafine ‘ua oti lana tane, e tusa ma au poloa‘iga uma lava ‘ua e poloa‘i mai ai ‘iā te a‘u; ‘ua ‘ou le tu‘umavaega i au poloa‘iga, ‘ua lē galo fo‘i ‘iā te a‘u;

14‘Ou te le‘i ‘ai ai i lo‘u fa‘anoanoa, ‘ou te le‘i ‘ave sina ia mea i se mea e leaga ‘ou te le‘i avatu sina ia mea mo e ‘ua oti; ‘ua ‘ou fa‘alogo i le si‘ufofoga o le ALI‘I lo‘u Atua, ‘ua ‘ou faia e tusa ma mea uma lava na e poloa‘i mai ai ‘iā te a‘u.

15‘Ia e silasila mai mai lou afio‘aga pa‘ia, mai le lagi, ma e fa‘amanuia mai i lou nu‘u o Isaraelu, ma le lau‘ele‘ele ‘ua e foa‘iina mai ‘iā te i matou, e fa‘apei ‘ona e tautō ai i o matou tamā, o le nu‘u e tafe ai le suāsusu ma le meli.”

O le Nu‘u o le Atua

16O le aso nei ‘ua poloa‘i mai ai le ALI‘I lou Atua ‘iā te oe ‘ia e faia nei tulafono ma fa‘amasinoga; ‘ia e tausi fo‘i i ai, ma e faia ma lou loto ‘atoa ma lou agaga ‘atoa.

17‘Ua e matuā fai mai i le aso nei o le ALI‘I o lou Atua ia; ‘e te savali fo‘i i ona ala, ma e tausi i ana tulafono, ma ana poloa‘iga, ma ana fa‘amasinoga, ma e fa‘alogo i lona si‘ufofoga;

18‘Ua matuā fetalai mai fo‘i le ALI‘I i le aso nei e fai oe mōna nu‘u, o le ‘oloa tāua, e pei ‘ona ia fetalai mai ‘iā te oe, ‘ina ‘ia e tausi fo‘i i ana poloa‘iga uma lava,Eso 19.5; Teu 4.20; 7.6; 14.2; Tito 2.14; 1 Pete 2.9

19‘ina ‘ia fa‘asilisiliina fo‘i o oe e ia i nu‘u uma lava na ia faia, i le vi‘iga, ma le ta‘ua, ma le matagofie; ‘ina ‘ia ‘avea fo‘i oe ma nu‘u pa‘ia i le ALI‘I lou Atua, e pei ‘ona ia fetalai mai ai.