1‘Oi talofa ‘iā te oe o lē fa‘atafuna atu,
‘ae lē fa‘atafunaina oe;
‘ua e fa‘asauā, ‘ae latou te lē fa‘asauā ‘iā te oe;
a tu‘ua e oe ‘ona fa‘atafuna atu,
‘ona fa‘atafunaina lea o oe;
a uma lou fa‘asauā, ‘ona latou fa‘asauā lea ‘iā te oe.
2Le ALI‘I e, ‘ia e alofa mai ‘iā te i matou,
‘ua matou fa‘atalitali atu ‘iā te oe;
‘ia fai oe mo latou lima i taeao uma,
o lo matou fa‘aola fo‘i i ona po o le puapuagā.
3O le leo o le ta‘alili na sōsōla ai le nu‘u;
o lou tula‘i na fa‘ata‘ape‘apeina ai o nu‘u ‘ese.
4E fa‘aputuina la ‘outou vete e pei ‘ona a‘oa‘oina mea e le sē kasili;
e pei ‘ona fetaufetulia‘i o sē akerisi,
e fa‘apea fo‘i ona fetaufetulia‘i i ai o tagata.
5E silisili le ALI‘I; auā o lo‘o afio o ia i lugā;
‘ua fa‘atumuina e ia Siona i le fa‘amasinoga ma le amiotonu.
6O ia o lē e tumau ai ou tausaga,
o le tele o le fa‘aolataga,
o le poto ma le malamalama;
o le mata‘u i le ALI‘I, o lana ‘oloa lea.
7Fa‘auta, e ‘alalaga o latou tagata totoa i fafo;
e tagi lotulotu o lē sāvali o le fa‘aleleiga.
8‘Ua gaogao ala tele, e lē toe i ai se malaga;
‘ua na tu‘umavaega, ‘ua ia ‘inosia ‘a‘ai,
‘ua ia le manatu i tagata.
9O lo‘o fa‘anoanoa le lau‘ele‘ele ‘ua mamae;
‘ua fa‘amāina Lepanona, ‘ua mamae;
‘ua ‘avea ma nu‘u lafulafuā Sarona;
‘ua malili lau la‘au o Vasana ma Karamelu.
‘Ua Lapata‘i e le Ali‘i ona Fili10“‘Ou te tula‘i atu nei lava;” ‘ua fetalai mai le ALI‘I,
“E vi‘ia nei lava a‘u; e fa‘asilisiliina nei a‘u.
11E totō ‘outou o mutia magumagu,
tou te fānanau mai o tagutugutu o saito
o lo ‘outou mānava o le afi lava lea e ‘aina ai ‘outou.
12E ‘avea fo‘i le nu‘u e pei ona mū o umu panisina;
e pei o la‘au tuitui ‘ua salaina, e susunuina i latou i le afi.”
13‘Outou o ē mamao, ‘ia ‘outou fa‘alogologo mai i le mea ‘ua ‘ou faia;
‘outou fo‘i o ē latalata mai, ‘ia ‘outou iloa lo‘u mana.
14O ē agasala i Siona ‘ua fefefe i latou;
o ē fa‘alēmata‘u ‘ua maua i latou i le mata‘u.
“O ai ‘ea so tatou na te mafaia ‘ona nofo i le afi mū tele?
O ai ‘ea so tatou na te mafaia ‘ona nofo i le afi e fa‘avavau?”
15O lē ‘ua savali i le amiotonu ma tautala i ‘upu tonu;
o lē ‘ua ‘ino‘ino i le ‘oloa e maua i le fa‘asauā,
‘ua lia‘iina e ia ona lima ‘ina ne‘i tago i se taui,
‘ua pupuni e ia ona taliga ‘ina ne‘i fa‘alogo atu i pulega o fasiga,
‘ua moe fo‘i ona mata ‘ina ne‘i va‘ai atu i le leaga.
16E mau lava o ia i le mea maualuga,
o ‘olo papa o lona malu lea;
e foa‘iina ‘iā te ia ana mea e ‘ai,
e tumau pea ‘iā te ia le vai.O le Lumana‘i Manuia
17E maimoa ou mata i le tupu i lona matagofie;
latou te va‘ava‘ai i nu‘u mamao.
18E mānatunatu lou loto i le mea sa mata‘u ai.
“O ifea ‘ea le tusi‘upu?
O ifea ‘ea le tali taulaga?
O ifea ‘ea le faitau ‘olo?”
19‘E te lē toe va‘aia le nu‘u fe‘ai,
o le nu‘u ‘upu faigatā e lē mafai ‘ona lagona;
‘ua ‘ese a latou gagana e lē mafai ‘ona iloa.
20Va‘ai atu ia i Siona le ‘a‘ai o tatou fa‘apotopotoga;
e iloa lava e ou mata o Ierusalema le mea e nofo filemū ai,
le fale ‘ie e le tatalaina, e lē toe lia‘iina lava sona fao,
e lē motusia lava sona maea e tasi.
21Auā o ‘iā te i tatou i lea mea o le ALI‘I lē silisili,
e fai o ia ma vaitafe ma maga vai lautetele;
e lē alu i ai se va‘a e fai foe,
e lē ui ane i ai fo‘i se va‘a tele.
22Auā o le ALI‘I o lo tatou fa‘amasino ia,
o le ALI‘I o lo tatou fai tulafono,
o le ALI‘I o lo tatou tupu,
o ia lava e fa‘aola ‘iā te i tatou.
23‘Ua malū ou maea,
latou te lē mafai ‘ona fa‘amauina o le tulāfanā.
Latou te lē mafai ‘ona fai la;
‘ona tufatufaina ai lea o le ‘oloa o le vete tele;
e vete lava e tagata pipili.
24E lē fai mai fo‘i se tasi ‘ua mau ai, “‘Ou te ma‘i;”
e fa‘amāgaloina agasala a le nu‘u e nonofo ai.
Who We AreWhat We EelieveWhat We Do
2025 by iamachristian.org,Inc All rights reserved.
