Isaia 11 - Revised Samoan Catholic Bible

O le Valo‘aga i le Mesia ma lona Mālō

1‘Ae tupu mai le la la‘au i le pogai o Iese, e tupu a‘e fo‘i le tātupu i ona a‘a.

2E afio mau ‘iā te ia le Agaga o le ALI‘I;

o le Agaga o le poto ma le mafaufau;

o le agaga o le fa‘atonuga ma le malosi;

o le Agaga o le malamalama ma le mata‘u i le ALI‘I.

3E fiafia fo‘i o ia i lē mata‘u i le ALI‘I;

e lē fa‘amasino o ia e tusa ma le sisila atu o ona fofoga;

e lē a‘oa‘i fo‘i o ia e tusa ma le fa‘afofoga o ona taliga.

4‘Ae fa‘amasino o ia ma le tonu i ē matitiva,

e a‘oa‘i fo‘i o ia ma le tonu, ‘ona o ē fa‘amaulalo o i le lalolagi.

Na te taia fo‘i le lalolagi i le sasa o lona fofoga,

o le mānava fo‘i o lona fofoga,

na te fasioti a‘i lē amio leaga.

5E fai le amiotonu ma fusi o lona sulugātiti,

e fai fo‘i le fa‘amaoni ma fusi o lona tino.

6E nofo fa‘atasi le luko ma le tama‘i mamoe,

e ta‘oto fo‘i le nameri fa‘atasi ma le tama‘i ‘oti.

E fa‘atasi fo‘i le tama‘i povi ma le leona ta‘anoa

‘atoa ma le manu peti,

e ta‘ita‘iina fo‘i i latou e le tamaitiiti.

7E ‘a‘ai fa‘atasi le povi fafine ma le urosa,

e ta‘o‘oto fa‘atasi a lā‘ua tama;

e ‘ai fo‘i e le leona ‘au o saito pei o le povi.

8E ta‘alo fo‘i le tama e le‘i te‘a ma le susu i le lua o le asipi,

o le tama fo‘i ‘ua te‘a ma le susu,

e tu‘u e ia lona lima i le lua o le gata uogo.

9Latou te lē faia se mea leaga,

latou te lē fa‘aumatia fo‘i se mea i lo‘u mauga pa‘ia uma.

Auā e tumu le lalolagi i le malamalama o le ALI‘I,

e pei ‘ona ufitia o le ‘iliti tai i le suāsami.

O Latou sa Fa‘atāfea o le a toe Fo‘i Mai

10O lea aso fo‘i e tu mai ai le Pogai o Iese, e fai ma tagāvai o le nu‘u, e sā‘ili ‘iā te ia o nu‘u ‘ese; e matagofie fo‘i lona mālōlōga.

14Latou te felelei atu i tau‘au o Filisitia i sisifo;

latou te vete fa‘atasi mea a tagata o sasa‘e;

latou te fetāgofi ‘iā Etoma ma Moapi;

e fa‘alogo fo‘i ‘iā te i latou le fānauga a Amoni.

15E fa‘aumatia lava e le ALI‘I le faga o le sami o Aikupito;

e si‘i fo‘i e ia lona ‘a‘ao i luga o le vaitafe i lona matagi tetele lava,

e taia fo‘i e ia e fai ma magāvai e fitu

ma fa‘aui atu ai ‘iā te i latou o fa‘ase‘evaeina.

16E i ai fo‘i le ala tele mo ē ‘ua totoe o lona nu‘u,

o ē ‘ua totoe i Asuria;

pei ‘ona fai ‘iā Isaraelu,

i le aso na ia alu a‘e ai nai le nu‘u o Aikupito.