Salāmo 37 - Revised Samoan Catholic Bible

O ‘Upu Apoapoa‘i ‘ia lē Tigā i Tagata Amio Leaga, a ‘ia Fa‘atuatua i le Alofa o le AtuaO le salāmo a Tavita

1‘Aua ‘e te fa‘ameo ‘ona o ē amio leaga;

‘aua fo‘i ‘e te losilosi ‘ona o ē fai mea leaga.

2Auā e lē pine ‘ona sala‘eseina i latou e pei o le mutia;

e mamae i latou e pei o le vao mu‘a lauolaola.

3‘Ia e fa‘atuatua i le ALI‘I ma e faia amio lelei;

‘ia e nofo i le nu‘u, ma tausisi i le fa‘amaoni.

4‘Ia e fiafia lava oe i le ALI‘I,

‘ona foa‘iina lea e ia ‘iā te oe o mea e mana‘o i ai lou loto.

5‘Ia e tu‘uina atu lou ala i le ALI‘I,

ma fa‘atuatua ‘iā te ia, ‘ona faia lava lea e ia.

6E fa‘aalia e ia lau amiotonu e pei o le malamalama,

ma lou fa‘amasinoga e pei o le aoauli.

7‘Ia e fa‘alologo i luma o le ALI‘I,

ma fa‘amoemoe ‘iā te ia;

‘aua ‘e te fa‘ameo ‘ona o lē ‘ua manuia lona ala,

o le tagata ‘ua faiā togafiti leaga.

8‘Inā sōia ‘e te ita ma ‘ia tu‘u lou tigā;

‘aua ‘e te fa‘ameo, ne‘i e faia se mea leaga.

9Auā e fa‘aumatia o ē fai amio leaga;

a o ē fa‘atalitali i le ALI‘I,

o i latou lava ia e fai mo latou le nu‘u.

10E toe itiiti, ‘ona leai lea o le tagata amio leaga;

‘e te mafaufau fo‘i i le mea sa i ai o ia,

‘ae leai lava.

11A o ē agamalū, e fai mo latou le nu‘u;

e fa‘afiafia fo‘i i latou ‘iā te i latou ‘ona o le manuia e tele.

12‘Ua mānatunatu le tagata amio leaga

i se mea e leaga ai le tagata amiotonu;

‘ua lilivau fo‘i ona nifo ‘iā te ia.

13E soisoi le ALI‘I ‘iā te ia;

auā ‘ua na silafia o le a sau lona aso.

14‘Ua fese‘i a‘e e tagata amio leaga a latou pelu,

‘ua lolo‘u a latou ‘aufana,

‘ia oti ai ē ‘ua puapuagātia ma ē matitiva,

‘ina ‘ia fasioti i ē ‘ua sa‘o a latou amio.

15E o‘o a latou pelu i o latou lava fatu,

e gauia fo‘i a latou ‘aufana.

16O le mea itiiti ‘ua i le tagata amiotonu,

e sili ‘ona lelei lea i ‘oloa e tele

o ē amio leaga e to‘atele.

17Auā e gauia lima o ē amio leaga;

‘ae tāofiina a‘e e le ALI‘I o ē amiotonu.

18O lo‘o silafia e le ALI‘I aso o ē ‘ua sao a latou amio;

e fa‘avavau lava lo latou tofi.

19E lē mamā i latou i le aso vale;

e mā‘o‘ona fo‘i i latou i ona po e i ai le oge.

20Auā e fano lava o ē amio leaga;

o ē ita fo‘i i le ALI‘I,

e pei o le mea sili o i tama‘i mamoe i latou

e mavae atu i latou, e mavae atu e pei o le asu.

21‘Ua nō mea le tagata amio leaga,

‘ae lē toe taui atu ai;

a o le tagata amiotonu,

‘ua amio alofa ia ma foa‘i fua ana mea.

22Auā o ē ‘ua fa‘amanuia e ia,

e fai mo latou le nu‘u;

a o ē ‘ua fa‘afanoina e ia,

e fa‘aumatia i latou.

23E mau i le ALI‘I le savali o le tagata;

e fiafia fo‘i o ia i lona ala.

24‘Āfai e pa‘ū ia, e le ta‘atia pea ia i lalo;

auā e tāofia lona lima e le ALI‘I.

25‘Ua ‘ou toeaina a‘u nei, sa au taule‘ale‘a;

a ‘ou te le‘i iloa se tagata amiotonu na lafoa‘iina,

po o ana fānau ‘ua ‘aisi i latou.

26‘Ua amio alofa ia i aso uma lava;

‘ua avatu e ia ana mea i ē nonō mai;

‘ua manuia fo‘i ana fānau.

27‘ia e ‘alo ‘ese i mea leaga ma e faia mea lelei;

‘e te mau ai e fa‘avavau.

28Auā e fiafia le ALI‘I i le fa‘amasinoga,

na te lē tu‘ua fo‘i ona tagata amio Atua.

E leoleoina i latou e fa‘avavau;

‘ae fa‘aumatia fānau a ē amio leaga.

29E fai lava le nu‘u mo tagata amiotonu,

e nonofo ai pea i latou.

30O le gutu o le tagata amiotonu e tautala lea i le poto,

e tautala fo‘i lona laulaufaiva i le fa‘amasinoga.

31O lo‘o i lona loto le tulafono a lona Atua,

e le mapeva fo‘i ona vae.

32‘Ua lamalama le tagata amio leaga i le tagata amiotonu,

‘ua ia sā‘ili‘ili fo‘i e fasioti ‘iā te ia.

33E lē tu‘una o ia e le ALI‘I i lona lima;

na te lē fa‘asala fo‘i ‘iā te ia pe a fa‘amasinoina o ia.

34‘ia e fa‘atalitali i le ALI‘I ma e tausi i lona ala

‘ona fa‘aeaina lea o oe e ia ‘ina ‘ia fai mou le nu‘u;

‘e te iloa atu le fanoga o ē amio leaga.

35Na ‘ou iloa atu le tagata amio leaga ‘ua fa‘asauā,

‘ua fa‘ateleina fo‘i o ia e pei o le la‘au,

‘ua tupu i lona lava ‘ele‘ele ma tauluulu ola.

36A ‘ua mavae ‘ese o ia, fa‘auta fo‘i, ‘ua leai

na ‘ou sā‘ili‘ili fo‘i ‘iā te ia, a ‘ua lē iloa lava.

37‘Inā mafaufau ia i lē ‘ua sao lana amio,

ma va‘ava‘ai i lē ‘ua amiotonu;

auā o le i‘uga o lea tagata o le manuia lava lea.

38‘Ae fano fa‘atasi o ē solitulafono;

o le i‘uga o ē amio leaga o le malaia lava lea.

39O lo‘o mai i le ALI‘I le fa‘aolataga o ē amiotonu;

o ia lava lo latou malosi i ona po o le puapuagā.

40E fesoasoani fo‘i le ALI‘I ‘iā te i latou,

ma lavea‘i ‘iā te i latou.

E lavea‘iina lava i latou e ia a‘i tagata amio leaga,

na te fa‘aolaina fo‘i i latou,

auā ‘ua latou fa‘atuatua ‘iā te ia.