Salāmo 41 - Revised Samoan Catholic Bible

O le Manuia o le Tagata Amio AlofaMa le usu pese. O le salāmo a Tavita

1‘Amu‘ia le tagata ‘ua manatua lē ‘ua mativa;

e fa‘asaoina o ia e le ALI‘I i le aso vale.

2E tausia o ia e le ALI‘I ma fa‘aolaina;

e manuia fo‘i o ia i le nu‘u;

‘e te lē tu‘ua fo‘i o ia i le mana‘o o ē ita ‘iā te ia.

3E lagolago ane le ALI‘I ‘iā te ia i le ta‘otoga o lona ma‘i;

‘e te liua lona moega uma lava i lona ma‘i.

4Na ‘ou fai atu, “Le ALI‘I e,

‘ia e alofa mai ‘iā te a‘u;

‘ia e fa‘amālōlō i lo‘u agaga;

auā ‘ua ‘ou agasala atu ‘iā te oe.”

5O ē ita mai ‘iā te a‘u,

‘ua latou tautala i se mea e leaga ai a‘u,

‘ua fa‘apea ane: Po o afea e oti ai o ia ma galo ai lona igoa?

6‘Āfai fo‘i e sau o ia e asiasi mai ‘iā te a‘u, ‘ua tautala i le pepelo,

‘ua fa‘aputuina e lona loto o mea leaga mo ia;

‘ona alu ai lea o ia i fafo ‘ua tautala a‘i.

7‘Ua musumusu fa‘atasi o i latou uma

o ē ‘ino‘ino mai ‘iā te a‘u i se mea e o‘o ‘iā te a‘u;

ma latou mānatunatu i se mea e leaga ai a‘u.

8‘Ua fa‘apea i latou:

‘Ua o‘o lava le mea matuā leaga ‘iā te ia;

‘ua ta‘oto ia, e lē toetū i luga.

9O le tagata fo‘i o la‘u uō, o lē na ‘ou fa‘atuatua i ai,

na ‘ai la‘u areto, ‘ua a‘a mai o ia ‘iā te a‘u i lona mulivae.

10A o oe, le ALI‘I e,

‘ia e alofa mai ‘iā te a‘u,

ma fa‘atū ‘iā te a‘u,

‘ina ‘ia a‘u taui atu ‘iā te i latou.

11O le mea lea ‘ua ‘ou iloa ai,

‘e te finagalo malie mai ‘iā te a‘u,

‘ina ‘ua lē mitamita mai ‘iā te a‘u,

o lē ita mai ‘iā te a‘u.

12A o a‘u nei, ‘e te tāofia a‘u i luga i la‘u amio sao;

‘e te fa‘atūina fo‘i a‘u i ou luma e fa‘avavau.

13‘Ia fa‘afetaia le ALI‘I, le Atua o Isaraelu,

mai le vavau e o‘o lava i le fa‘avavau.

Amene ma Amene.