Salāmo 64 - Revised Samoan Catholic Bible

‘Ua Tatalo Tavita ‘ia Lavea‘iina o ia i ē ‘ua ita ‘iā te IaMa le usu pese. O le salāmo a Tavita

1Le Atua e,

‘ia e fa‘afofoga mai i la‘u tatalo;

‘ia e leoleo mai i lo‘u ola,

‘ia lē mata‘u i lē ‘ua ita mai.

2‘Ia e natia a‘u a‘i le taupulepulega a ē amio leaga,

ma le fa‘anunununu o ē fai amioletonu.

3‘Ua latou fa‘amataina o latou laulaufaiva e pei o se pelu;

‘ua latou lolo‘u i ‘aufana e fana mai a latou ū,

o ‘upu ogo lava ia.

4‘Ina ‘ia latou fana lafitai i lē ‘ua amio sa‘o;

e fa‘afuase‘i ‘ona latou fana ‘iā te ia,

latou te lē matata‘u lava.

5‘Ua latou fefa‘amalosia‘i i le mea leaga;

‘ua latou filifili e natia ni matāsele;

‘ua latou fa‘apea ane,

“O ai sē na te iloa i latou?

6‘Ua latou sā‘ili mea leaga; ‘ua fa‘apea ane,

‘Ua uma ‘ona tatou matuā sā‘ili lava;”

o latou mafaufau ta‘itasi ma le loto ‘ua su‘egatā lava.

7A o le Atua,

na te fanaina atu le ū ‘iā te i latou e fa‘afuase‘i;

e manunu‘a ai i latou.

8E leaga i latou i o latou lava laulaufaiva;

e ta‘itasi ma sola ‘ese lava,

o ē va‘ava‘ai ‘iā te i latou.

9E matata‘u tagata uma,

latou te fa‘aaliina atu fo‘i le mea ‘ua faia e le Atua;

latou te mafaufau fo‘i i lana galuega.

10E fiafia lē amiotonu i le ALI‘I,

ma fa‘alagolago ‘iā te ia;

‘ona mitamita ai lea o i latou uma ‘ua loto sa‘o.