Salāmo 54 - Revised Samoan Catholic Bible

‘Ua Tatalo Tavita i le Atua ‘ia na Fa‘aola ‘iā te ia i ē ‘ua ita ‘iā te IaMa le usu pese i nekina. O le salāmo a Tavita e a‘oa‘o ai, ‘ina ‘ua ō atu le nu‘u o Sifi, ‘ua fa‘apea atu ‘iā Saulo, “E lē ‘ua lafi ‘ea Tavita ‘iā i matou?”

1Le Atua e,

‘ia e fa‘aola mai ‘iā te a‘u ‘ona o lou suafa;

‘ia e faia le finauga mo a‘u i lou malosi.

2Le Atua e,

‘ia e fa‘afofoga mai i la‘u tatalo;

‘ia liliu mai ou fofoga i ‘upu a lo‘u gutu.

3Auā ‘ua laga mai ‘iā te a‘u tagata ‘ese;

o ē sauā fo‘i ‘ua sā‘ili‘ili e fasioti ‘iā te a‘u;

latou te lē manatua le Atua. Selā.

4Fa‘auta, o le Atua o lo‘u lea fesoasoani;

o lo‘o i ai i le ALI‘I i ē ‘ua fa‘amalosi mai ‘iā te a‘u.

5Na te fa‘afo‘i atu le leaga i ē ‘ua ita mai ‘iā te a‘u;

‘ia e fa‘aumatia i latou i lou fa‘amaoni.

6‘Ou te avatu taulaga ‘iā te oe e fai fua i lo‘u loto;

le ALI‘I e,

‘ou te vivi‘i atu i lou suafa, auā e lelei.

7Auā na ia lavea‘iina mai a‘u i puapuagā uma;

‘ua iloa fo‘i e o‘u mata le taui o ē ita mai ‘iā te a‘u.