Salāmo 99 - Revised Samoan Catholic Bible

O le Apoapoa‘iga i Tagata uma ‘ia Latou ifo atu i le Atua i lona Mauga Pa‘ia

1‘Ua fai le ALI‘I ma tupu, ‘ia gatete nu‘u;

o lo‘o ti‘eti‘e o ia i le vā o kerupi,

‘ia fa‘agae‘etia le lalolagi.

2E silisili le ALI‘I o i Siona;

e maualuga fo‘i o ia i luga o nu‘u uma.

3‘Ia latou vivi‘i atu i lou suafa e sili ‘ia ma le mata‘utia;

e pa‘ia lava ia.

4O le malosi fo‘i o le tupu o lo‘o fiafia ia i le fa‘amasinoga;

o oe ‘ua e fa‘atumauina le amiotonu,

o oe fo‘i ‘ua e faia le fa‘amasinoga tonu ‘iā Iakopo.

5‘Ia ‘outou fa‘ane‘ene‘e atu i le ALI‘I lo tatou Atua,

‘ia ‘outou ifo atu i le mea e tu ai ona ‘a‘ao;

e pa‘ia lava o ia.

6O Mose ma Arona o ona ositaulaga,

o Samuelu fo‘i i ē o vala‘au atu i lona suafa;

‘ua latou vala‘au atu i le ALI‘I,

‘ona tali mai lea o ia ‘iā te i latou.

7Na ia fetalai atu ‘iā te i latou i le ao fa‘aniutū;

na latou tausi i ana poloa‘iga ma tulafono na ia tu‘uina atu ai ‘iā te i latou.

8Le ALI‘I e, lo matou Atua,

o oe lava na e tali atu ‘iā te i latou;

o oe lava le Atua na e fa‘amāgaloina i latou,

a ‘ua e taui ‘iā latou amioga.

9‘Ia ‘outou fa‘ane‘ene‘e atu i le ALI‘I lo tatou Atua,

‘ia ‘outou ifo atu fo‘i i lona mauga pa‘ia;

auā e pa‘ia lava le ALI‘I lo tatou Atua.