Iopu 10 - Revised Samoan Catholic Bible

O isi ‘Upu a Iopu

1“‘Ua musu lo‘u loto i lo‘u ola;

‘ou te tu‘uina atu a‘u ‘ia tagi pea;

‘ou te tautala i le tigā o lo‘u loto.

2‘Ou te fai atu i le Atua,

‘Aua ‘e te fa‘asala mai ‘iā te a‘u,

‘ia e fa‘ailoa mai ‘iā te a‘u le mea ‘e te finau mai ai ‘iā te a‘u.

3Pe lelei ‘ea ‘iā te oe ‘ina e fa‘asauā,

ma e ‘ino‘ino i le galuega a ou ‘a‘ao,

ma e fa‘amanuia le pule a ē amio leaga?

4‘Ua e fofoga ‘ea i mata o tagata?

po ‘ua e silasila ‘ea e pei o le va‘ai o tagata?

5O ou aso ‘ea e pei o aso o tagata?

po ou tausaga ‘ea e pei o aso o tagata?

6‘Ina ‘ua e sā‘ili mai i la‘u amio leaga,

ma su‘esu‘e i la‘u agasala.

7‘Ua e silafia lava, ‘ua ‘ou lē amio leaga;

e leai fo‘i sē lavea‘i mai i lou ‘a‘ao.

8Na saunia ma faia a‘u ‘atoa uma e ou ‘a‘ao;

a ‘ua e fasioti ‘iā te a‘u.

9Se‘i e manatu, na e faia a‘u e pei o le ‘omea;

‘e te toe fa‘afo‘i ‘ea a‘u i le efuefu?

10Na e lē sasa‘aina ‘ea a‘u e pei o le suāsusu,

ma fa‘ato‘aina a‘u e pei o le suāsusu to‘a?

11Na e fa‘a‘ofuina a‘u i le pa‘u ma le ‘a‘ano,

na e fa‘amalosia fo‘i a‘u i ivi ma ua.

12Na e foa‘iina mai ‘iā te a‘u le ola ma le alofa,

o lou leoleo mai fo‘i na tausia ai lo‘u agaga.

13‘Ua e natia fo‘i nei mea i lou finagalo;

‘ua ‘ou iloa o lo‘o ‘iā te oe lenei mea.

14‘Āfai ‘ou te agasala, ‘ua e silasila mai ai pea ‘iā te a‘u,

‘e te lē fa‘amāgalo mai fo‘i ‘iā te a‘u i la‘u amio leaga.

15‘Āfai ‘ua ‘ou amio leaga, ‘oi talofa ‘iā te a‘u!

‘āfai fo‘i ‘ua ‘ou amiotonu, e lē ea i luga lo‘u ulu;

‘ua tumu a‘u i le mā, ‘ua ‘ou iloa fo‘i lo‘u puapuagā,

16mōna ‘ua tupu pea.

‘Ua e tuli mai ‘iā te a‘u, e pei o le leona;

‘ua e toe faia ‘iā te a‘u mea e ofo ai.

17‘Ua e fa‘afouina mai o au molimau ‘iā te a‘u,

ma ‘ua e fa‘ateleina mai lou to‘asā ‘iā te a‘u;

e auaua‘i ‘au ‘iā te a‘u.

18“Se a le mea na e ‘aumai ai a‘u i le manava?

E! ‘ana ‘ou oti ma ‘ia lē iloa a‘u e se tasi.

19Po o pe na ‘ua ‘avea a‘u e peiseaī na ‘ou le ola mai;

po ‘ua ‘aveina atu a‘u a‘i le manava i le tu‘ugamau.

20E lē itiiti ‘ea o‘u aso?

‘Inā sōia tu‘u mai pea ia o a‘u,

se‘ia ‘ou mua‘i mālōlō ane teisi,

21i lo‘u alu atu ai i le mea ‘ou te lē toe fo‘i mai ai,

o le nu‘u o le pouliuli ma le ata o le oti.

22O le nu‘u o le pouliuli, e tusa lava ma le pouliuli tele;

o le ata o le oti, e lē i ai ni mea tonu;

o lona pupula mai e tusa ma le pouliuli tele.”