Fa‘ata‘oto 29 - Revised Samoan Catholic Bible

O Pule ‘Ese‘ese i le Mālō ma le ‘Āiga

1O le tagata ‘ua a‘oa‘iina so‘o, ‘ae fa‘ama‘a‘a lona ua,

e fa‘afuase‘i ‘ona nutimomoia o ia, ‘ae leai se fofō.

2A pule ē amiotonu, ‘ua ‘oli‘oli ai le nu‘u;

‘ae a pule ē amio leaga, ‘ua mapuitigā le nu‘u.

3O le tagata ‘ua mana‘o i le poto, na te fa‘atupuina le fiafia o lona tamā;

a o lē aumea ma fafine talitane, na te fa‘aumatia ‘oloa.

4E fa‘atumauina le nu‘u e le tupu i le fa‘amasinoga;

a o le tagata ‘ua tali mea alofa, na te lepetia ai le nu‘u.

5O le tagata ‘ua fa‘a‘ole‘ole i lē la te tuā‘oi;

na te folasia le ‘upega i le mea e ui ai o ia.

6O i ai le mailei i le soliga o le tulafono e le tagata amio leaga;

a o le tagata amiotonu, ‘ua pese ma ‘oli‘oli o ia.

7‘Ua manatu le tagata amiotonu i le finauga a lē ‘ua mativa;

a o le amio leaga, ‘ua lē mafaufau o ia ‘ina ‘ia iloa.

8O tagata fa‘atauemu, latou te fa‘amūina le ‘a‘ai;

a o ē popoto, latou te fa‘aliliu‘eseina le ita.

9O le tagata poto ‘ua finau ma le tagata valea,

pe ita, pe ‘ata‘ata, e leai se filemū.

10O tagata totolima, ‘ua ‘ino‘ino i latou i lē ‘ua sa‘o lana amio;

a o ē amiotonu, latou te sā‘ili ‘ia ola o ia.

11O le vale, e sasa‘a uma mai e ia lona loto;

a o le tagata poto, e tāofiofi e ia lona loto.

12O le faipule e ua‘i atu ona taliga i ‘upu pepelo,

e amio leaga ana ‘au‘auna uma lava.

13O lē ‘ua mativa, ma le tagata fa‘asauā, la te fetaia‘i;

o le ALI‘I na te fa‘atau fa‘amalamalamaina o lā‘ua mata.

14O le tupu, o lē na te fa‘amasinoina ma le fa‘amaoni ē matitiva,

e fa‘atumauina lona nofoāli‘i e fa‘avavau.

15O le sasa ma le a‘oa‘iga e tupu ai le poto;

a o le tama ‘ua tu‘ulafoa‘iina, e tupu ai le mā o lona tinā.

16A fa‘ato‘ateleina ē amio leaga, ‘ua fa‘ateleina le solitulafono;

a o ē amiotonu, latou te iloa atu lo latou malaia.

17‘Ia e a‘oa‘i i lou atali‘i, ‘ona e maua ai lea se filemū;

e tupu ai le fiafia i lou loto.

18A leai se valo‘aga, e fa‘asalalauina le nu‘u;

a o lē ‘ua tausiusi i le tulafono, ‘amu‘ia o ia.

19E lē mafai ‘ona a‘oa‘iina o le ‘au‘auna i ‘upu;

auā ‘ua lagona e ia, ‘ae lē tali atu i ai.

20‘Ua e iloa ‘ea le tagata ‘ua fa‘ata‘alise i ana ‘upu e fai le fa‘amoemoe o tagata i le vale, ‘ae lē ‘iā te ia.

21O lē ‘ua fa‘apelepele i lana ‘au‘auna e āfua mai ‘ina itiiti,

mulimuli ane e fai o ia ma atali‘i.

22O le tagata itagofie na te fa‘atupuina le misa;

ma le tagata lotoa na te fa‘ateleina soliga o le tulafono.

23O le fa‘amaualuga o le tagata e fa‘amaulaloina ai o ia;

a o le fa‘amaulalo o le loto e maua ai le vi‘iga.

24O lē ‘ua vaelua mea fa‘atasi ma le gaoi, ‘ua ‘ino‘ino o ia ‘iā te ia lava;

e fa‘alogo o ia i le tautō, ‘ae lē fa‘aali atu.

25O le fefe i tagata e tupu ai le mailei;

a o lē fa‘atuatua i le ALI‘I e fa‘amamaluina o ia.

26E to‘atele ē sā‘ili i le faipule;

a o lo‘o i le ALI‘I le fa‘amasinoga o tagata.

27O ē amiotonu latou te ‘ino‘ino i le tagata agapi‘opi‘o;

a o ē amio leaga, latou te ‘ino‘ino i lē ‘ua sa‘o lona ala.