Isaia 19 - Revised Samoan Catholic Bible

O le Malaia o Aikupito ma le Manuia o Isaraelu

1O le avega a Aikupito.

Fa‘auta, e ti‘eti‘e atu le ALI‘I i le ao tele vave,

e afio atu o ia i Aikupito;

e gatete fo‘i tupua a Aikupito i ona luma,

e fa‘avaivai ai fo‘i loto o Aikupito i totonu ‘iā te i latou.

2‘Ou te avatua fo‘i ‘au‘upega ‘iā Aikupito e tau ai Aikupito,

latou te tau o le tagata ma lona uso,

o le tagata ma lē la te tuā‘oi,

o le tasi ‘a‘ai ma le isi ‘a‘ai,

o le tasi itū mālō ma le isi itū mālō.

3E mavae atu fo‘i le atamai o Aikupito nai totonu ‘iā te i latou,

‘ou te fa‘aumatia fo‘i lana pule;

‘ona latou sā‘ili ai lea i tupua

ma ē ‘ua leo ‘o‘olo ma aitu vavalo ma ē ‘ua memu.

4‘Ou te tu‘uina atu Aikupito;

i le lima o le ali‘i sauā

e pule fo‘i le tupu malosi ‘iā te i latou,

o lo‘o fetalai mai ai le Ali‘i, o le ALI‘I o ‘au.

5E pe fo‘i le suāvai nai le vai

e mate fo‘i ma matūtū le vaitafe.

6E elo fo‘i vaitafe,

e māui ma mamate lava vaitai o Aikupito,

e mamae le u ma le ‘utu‘utu.

7O le laolao e lata ane i le vaitafe,

o i ‘auvai lava,

‘atoa ma mea uma ‘ua totōina i le vaitafe,

e magumagu ia, e fa‘ata‘ape‘apeina,

e lē toe i ai lava.

8E feoi o ē fai faiva,

e fa‘anoanoa o i latou uma o ē sāusau i le mātau i le vaitafe,

e fa‘avaivai fo‘i i latou o ē lafo ‘upega i le fogāvai.

9E māsiasi ē ‘ua fai lino lelei,

‘atoa ma i latou o ē lalaga lino sisina.

10E lepetia ona fa‘avae,

o tagata uma fo‘i o ē galulue i se taui e tigā o latou loto.

11E matua vālelea lava ali‘i sili o Soana,

‘ua fa‘avalea le pule a le ‘au faipule popoto a Farao.

Pe fa‘apefea ‘ea ‘ona ‘outou fai atu ‘iā Farao,

“O a‘u o le atali‘i o tagata popoto,

o le atali‘i o tupu mai anamuā?”

12O ifea lava ou tagata popoto?

Se‘i latou fa‘aali atu ‘iā te oe ma ‘ia latou iloa,

pe se a le pule a le ALI‘I o ‘au ‘iā Aikupito.

13‘Ua fa‘avalea ali‘i sili o Soana,

‘ua pelogia ali‘i sili o Nafi,

‘ua fa‘asesēina fo‘i Aikupito e ali‘i o ona itū‘āiga.

14‘Ua liligi atu e le ALI‘I i totonu ‘iā te ia,

le agaga e fa‘api‘opi‘o ai.

O lea ‘ua latou fa‘asesēina ai Aikupito i ana mea uma e fai,

e fa‘apei ‘ona tautevateva o le tagata ‘onā i lona pua‘iga.

15E le‘i i ai fo‘i ‘iā Aikupito se mea e fai,

se mea lava e fai e le ulu po o le i‘u,

e le lau pama po o le fiso.

O le a Tapua‘i Aikupito i le Ali‘i

16O lea aso e tusa ai Aikupito ma fafine e gatete ma fefefe i latou ‘ona o le ‘a‘ao o le ALI‘I o ‘au ‘ua si‘itia, ‘ua si‘itia e ia i luga ‘iā te i latou.

24O lea aso e fai ai Isaraelu ma tolu o nu‘u, e fa‘atasi ma Aikupito ma Asuria, e fai ma mea e manuia ai i totonu o le lalolagi.

25E fa‘amanuia le ALI‘I o ‘au ‘iā te i latou, e fa‘apea mai, “‘Ia manuia lo‘u nu‘u o Aikupito ma Asuria le galuega a o‘u lima, ‘atoa ma lo‘u tofi o Isaraelu.”