Topita 3 - Revised Samoan Catholic Bible

O le Tatalo a Topita

1‘Ona ‘ai lea o Topita ma ‘ua amata ‘ona tatalo ma loimata, o fa‘apea ane:

2‘Ua e amiotonu, le Ali‘i e,

ma ‘ua tonu uma au fa‘amasinoga,

o le agaalofa fo‘i ma le mea moni

ma le tonu o ou ala uma lava.

3A o lenei, le Ali‘i e,

‘ia e manatua mai a‘u.

‘Aua fo‘i ‘e te taui ma sui

‘ona o soligātulafono a a‘u lava po o o‘u matua.

4Auā ‘ua matou lē ‘ana‘ana i au poloa‘iga.

O lea ‘ua tu‘uina ai i matou i le fa‘atafunaga

ma le nofopologa ma le oti.

‘Ua ‘avea i matou ma ulaga ma tauemuga

i nu‘u uma ‘ua e fa‘ata‘ape‘ape ai i matou.

5O lenei, le Ali‘i e,

‘ua mamafa au fa‘asalaga,

auā ‘ua matou lē faia e tusa ma au poloa‘iga,

‘ua matou lē sāvavali fo‘i ma le fa‘amaoni i ou luma.

6O lenei, le Ali‘i e,

‘ia e fai ‘iā te a‘u e tusa ma lou finagalo,

ma e poloa‘i ‘ia talia o lo‘u agaga i le mapusaga,

auā e sili ‘ona aogā ‘iā te a‘u le oti i le ola.

7O le aso lava lea na o‘o ai fo‘i ‘ina fa‘alogo e Sara, le afafine o Rakuelu, i Rakai, o le ‘a‘ai lea o tagata Metai, i ‘upu tauemu a le tasi ‘au‘auna fafine a lona tamā.

8Auā na fa‘amauina ia i tane e to‘afitu, a o le tasi temoni, ‘ua igoa ‘iā Asemoteu, ‘ua na fasia i latou i lo latou fa‘ato‘ā ō atu ‘iā te ia.

9‘Ua a‘oa‘i atu o Sara i le teine i sona sesē, ‘ona tali mai lea o fa‘apea mai: ‘Aua ne‘i matou iloa lava o sau tama tane po o sau tama fafine i le lalolagi, o oe lē fasioti i au tane!

10Pe ‘e te fia fasioti fo‘i ‘iā te a‘u e pei ‘ona e fasiotia au tane e to‘afitu! ‘Ua fa‘alogo i lea ‘upu, ‘ona ulu atu lea o ia i le potu i luga o lona fale, ‘ua lē ‘ai pe inu lava o ia i ao e tolu ma po e tolu.Topi 6.15

11‘Ae tausisi lava o ia i le tatalo, o ‘ai‘oi atu ma loimata i le Atua ‘ia lavea‘i ‘iā te ia a‘i lenei māsiasi.

O le Tatalo a Sara

12A o lona tolu o aso, ‘ua na fa‘auma lana tatalo, o fa‘amanū atu i le Ali‘i, o fa‘apea ane:

13‘Ua fa‘amanūina lou suafa, le Atua o o matou tua‘ā,

‘ua e alofa pe a mavae o lou to‘asā.

‘Ua e fa‘amāgalo fo‘i i agasala a i latou

e vala‘au atu ‘iā te oe i ona po o le puapuagā.

14Le Ali‘i e,

‘ou te ua‘i atu ‘iā te oe o‘u mata,

‘ou te fa‘asaga atu lava ‘iā te oe.

15‘Ou te ole atu, le Ali‘i e,

‘ia e lavea‘i ‘iā te a‘u i le noanoaga o lenei māsiasi,

po o le matuā lavea‘i lava ‘iā te a‘u a‘i le lalolagi.

16‘Ua e silafia, le Ali‘i e,

na ‘ou le tu‘inanau lava i se tane,

a ‘ua ‘ou tausimamāina lo‘u loto a‘i tu‘inanau uma.

17Matou te le‘i fefa‘auōa‘i lava ma ē sisiva,

‘ou te le‘i fa‘atasi fo‘i ma i latou o ē sāvavali ma le fa‘alētonu.

18‘Ae sa ‘ou loto e nofo i la‘u tane ‘ona o le mata‘u ‘iā te oe,

‘ae lē o lo‘u tu‘inanau.

19I le ‘ua lē tusa a‘u ‘iā i latou,

po ‘ua lē tusa ‘ea i latou ‘iā te a‘u,

auā pe na e tausia ‘ea a‘u mo se tasi tane.

20Auā e lē i le pule a le tagata o lau filifiliga.

21Peita‘i, ‘ai se tasi e ‘au‘auna ‘iā te oe,

‘ua mautinoa lava e ia,

‘āfai e tofotofoina o lona olaga,

e i‘u ‘ina fa‘apaleina; ‘ae ‘āfai ‘ua puapuagātia,

e lavea‘iina lava ia;

‘āfai fo‘i ‘ua a‘oa‘iina,

e lē sā ‘iā te ia ona sulu i lou agaalofa.

22Auā ‘e te lē fiafia i lo matou fanoga;

auā a mavae atu le afā,

‘ona e fa‘atō lea le malū.

A mavae atu fo‘i le tafe o loimata ma le tagiauē,

‘ona e liligi ifo lea o le ‘oli‘oli.

23Le Atua e o Isaraelu,

‘ia vi‘ia lou suafa i le fa‘avavau!

‘Ua Fa‘afofoga le Atua i le Tatalo a Topita ma Sara

24O ona po ia na fa‘afofogaina o a lā‘ua talosaga i luma o le mamalu o le Atua silisili ‘ese.

25I lo ‘ua ‘auina le agelu pa‘ia a le Ali‘i, o Refaelu, na te fa‘amālōlōina i lā‘ua, o ē ‘ua lauina a lā‘ua tatalo i le itūlā lava e tasi i luma o le Ali‘i.