Salāmo 15 - Revised Samoan Catholic Bible

O le Amioga a le Tagata o le AtuaO le salāmo a Tavita

1Le ALI‘I e,

o ai ‘ea e nofo i lou fale fetāfa‘i?

O ai ‘ea e mau i lou mauga pa‘ia?

2O lē savali ma le amio sa‘o ma ‘ua fai le amiotonu,

ma tautala ma le fa‘amaoni i lona loto.

3O lē ‘ua lē tu‘ua‘i fua i lona laulaufaiva,

‘ua lē agaleaga i le la te tuā‘oi,

e lē fa‘atupu fo‘i se mea e fa‘aumaina ai lē ‘ua lata mai ‘iā te ia.

4O lo‘o ‘inosia e ia lē ‘ua leaga,

‘ae vi‘ia e ia o ē matata‘u i le ALI‘I;

e tautō ia i le mea e tigā ai o ia, ‘ae lē ‘alo ai.

5‘Ua lē avane e ia ana tupe e fai ai taui fa‘asili;

e lē talia e ia se mea alofa e fa‘asala ai lē ‘ua lē sala.

O lē ‘ua faia ia mea e le fa‘agae‘etia lava ia e fa‘avavau.