Salāmo 60 - Revised Samoan Catholic Bible

O le Tatalo a Tavita ‘ia Fesoasoani le Atua ‘iā te IaMa le usu pese i le susana etuta. O le salāmo a Tavita e a‘oa‘o ai, ‘ina ‘ua tau ai le tau‘a ma Mesopotamia ma Suria Sopa; na fo‘i mai Ioapo na ia fasia Etoma, e sefulu afe ma afe e lua i le vanu masima

1Le Atua e,

na e lafoa‘iina i matou,

na e fa‘ata‘ape‘apeina i matou,

na e to‘atama‘i;

‘ia e toe liliu mai ‘iā te i matou.

2Na e lūlūina le ‘ele‘ele, na e fa‘amāvaevaeina;

‘ia e fofōina ona gaugau; auā o lo‘o lūlū ia.

3Na e fa‘ailoa mai mea faigatā i lou nu‘u;

na e fa‘ainumia i matou i le uaina e tautevateva a‘i.

4Na e foa‘iina atu le tagāvai mo ē matata‘u ‘iā te oe,

e si‘itia i luga ‘ona o le ‘upu moni. Selā.

5‘Ina ‘ia lavea‘iina au pele;

‘ia e fa‘aola mai i lou ‘a‘ao taumatau,

ma ‘ia e tali mai ‘iā te a‘u.

6‘Ua fetalai le Atua i lona malumalu;

“‘Ou te fiafia lava a‘u ‘ou te tofitofia Sekema,

o le vanu o Sukota ‘ou te fuafuatia lea.

7O lo‘o ‘iā te a‘u Kiliata,

o lo‘o ‘iā te a‘u fo‘i Manase;

e fai fo‘i Efaraima ma malosi o lo‘u ulu;

o la‘u faipule o Iuta lea.

8O Moapi o le ipu lea ‘ou te mulumulu ai;

‘ou te lafoina lo‘u se‘evae i Etoma;

Filisitia e ‘inā ‘alaga ia i lou manumālō ‘iā te a‘u.”

9O ai sē na te ‘avea a‘u i le ‘a‘ai nofo ‘olo?

O ai sē na te ta‘ita‘iina a‘u i Etoma?

10E lē o oe ‘ea, le Atua e,

sa ē lafoa‘iina mai i matou,

ma ‘ua e lē afio atu,

le Atua e, fa‘atasi ma la matou itūtau‘a?

11‘Ia e fesoasoani mai ‘iā te i matou i le puapuagā;

auā e lē aogā lava le olataga mai tagata.

12O le Atua lava e fai ai i matou ma toa;

auā o ia na te solia ē ‘ua ita mai ‘iā te i matou.