Ioelu 1 - Revised Samoan Catholic Bible

O le To‘asā o le Atua

1O le afioga a le ALI‘I na o‘o ‘iā Ioelu, le atali‘i o Petuelu:

2‘Outou toeaina e, ‘inā fa‘alogologo mai ia i lenei mea,

o ‘outou uma o ē nonofo i le nu‘u, ia ‘outou liliu mai o ‘outou taliga.

Pe na i ai le mea nei i ona po o ‘outou,

po o ona po o ‘outou tamā?

3‘Ia ‘outou talatala atu ai i la ‘outou fānau;

‘ia talatala fo‘i la ‘outou fānau i la latou fānau,

ma la latou fānau i se tasi tupulaga.

4O mea na tu‘ua e le sē kasama ‘ua ‘aina ia e le sē akerise;

o mea na tu‘ua e le sē akerise ‘ua ‘aina ia e le sē aleka;

o mea fo‘i na tu‘ua e le sē aleka ‘ua ‘aina ia e le sē kasili.

5Ala mai ia ‘outou ‘ua ‘onā ma fētāgisi;

‘ia uiō fo‘i ‘outou uma o ē inu uaina,

auā tou te lē toe feinu lava i le suāvine.

6Auā ‘ua alu a‘e le nu‘u ‘ese i lo‘u lau‘ele‘ele,

e malolosi i latou, e lē mafaitaulia lava;

o latou nifo o nifo o leona ia,

‘ua i ai fo‘i gao peiseaī o gao o se leona tele.

7‘Ua fano ‘iā te i latou la‘u vine,

‘ua fo‘ea e i latou la‘u mati,

‘ua matuā fo‘ea lava e i latou,

‘ua lafotūina fo‘i; ‘ua sinasina ai ‘ona la.

8‘Ia e tagiauē, e pei o se taupou ‘ua fusia i le ‘ie talatala

‘ona o lana tane sa fai a o teine muli o ia.

9‘Ua leai ni toe taulaga i mea e ‘ai ma taulaga i mea e inu i le fale o le ALI‘I;

‘ua fa‘anoanoa le ‘au ositaulaga o ē ‘au‘auna i le ALI‘I.

10‘Ua fano le fanua,

‘ua fa‘anoanoa le lau‘ele‘ele;

auā ‘ua fano le saito;

‘ua velasia le uaina,

o le a uma le suāu‘u.

11Le ‘au galulue fanua e,

‘ia ‘outou mamā ia.

O ‘outou o ē teuteu vine,

‘ia ‘outou uiō, ‘ona o le saito ma le karite;

auā ‘ua māumau le saito o le fanua.

12‘Ua mago le vine, ‘ua mamae le mati,

o le rimoni ma le pama ma le tapua ma la‘au uma o le vao ‘ua mamago ia.

Auā ‘ua mavae atu le fiafia o tagata.

13Le ‘au ositaulaga e, ‘ia ‘outou fufusi ‘iā te ‘outou ma fa‘anoanoa.

‘Ia uiō ‘outou o ē ‘au‘auna i le fatafaitaulaga.

Ō mai ia, ‘ia aoina ‘outou o ‘o‘ofu i le ‘ie talatala,

o ‘outou o ē ‘au‘auna i lo‘u Atua;

auā ‘ua leai ni toe taulaga i mea e ‘ai

ma taulaga i mea e inu i le fale o lo ‘outou Atua.

14‘Ia ‘outou ‘atofaina ni aso e anapogi ai;

‘ia ‘outou tala‘iina se fa‘apotopotoga,

‘ia ‘outou fa‘apotopotoina le ‘au toeaina,

‘atoa ma i latou uma e o nonofo i le nu‘u,

i le fale o le ALI‘I lo ‘outou Atua;

ma ‘ia ‘outou ‘alalaga i le ALI‘I.

15Auē, le aso e, auā ‘ua latalata mai le aso o le ALI‘I,

e o‘o mai e pei o se malaia ai Lē e ona le malosi uma lava.

16E lē ‘ua fano ‘ea mea e ‘ai i o tatou luma,

‘ua ‘ave‘eseina fo‘i le fiafia ma le ‘oli‘oli i le fale o lo tatou Atua?

17‘Ua pala fatu saito i lalo ifo o ona ‘ele‘ele,

‘ua fa‘atafunaina fale saito,

‘ua lepetia fale o‘o, auā ‘ua magumagu le saito.

18‘Ua fētāgisi na‘uā manu vaefā,

‘ua puapuagātia lafu povi,

auā ‘ua leai ni a latou mea e ai;

‘ua fano fo‘i lafu mamoe.

19Le ALI‘I e, ‘ou te vala‘au ‘iā te oe,

auā ‘ua ‘aina e le afi mea e tata‘a ai manu i le vao,

‘ua mū i le afi la‘au uma o le vao.

20E fētāgisi fo‘i ‘iā te oe o manu vaefā o le vao;

auā ‘ua pepē vaitafe, ‘ua ‘aina fo‘i e le afi mea e tata‘a ai manu i le vao.