Esoto 27 - Revised Samoan Catholic Bible

O le Fatafaitaulaga(Eso 38.1-7)

1‘E te faia fo‘i le fatafaitaulaga i le la‘au o le setima, e lima kupita lona umi, e lima fo‘i kupita lona lau, ‘ia fai fa‘atafafā le fatafaitaulaga, e tolu fo‘i kupita lona maualuga.

2‘E te faia fo‘i ona nifo i luga o ona tuli fata e fa, e fai fo‘i i lea lava mea ona nifo, ma ‘ia ufiufi ai i le ‘apamemea.

3‘E te faia fo‘i ona tanoa e tali ai ona lefulefu ma ona suō, ma ona ipu, ma ona tui, ma ona salefu, o ana mea uma lava ‘e te fai ai i le ‘apamemea.

4‘E te fai ai fo‘i lona ta‘igaafi, e fai fa‘amata‘upega i le ‘apamemea; o i luga fo‘i le mea fa‘amata‘upega, ‘e te fai ai o mama ‘apamemea e fa i ona tuli ta‘igaafi e fa;

5ma ‘ia e tu‘uina i lalo ifo o le tafatafa i totonu o le fatafaitaulaga, ‘ina ‘ia o‘o le mea fa‘amata‘upega i le totonugalemū o le fatafaitaulaga.

6‘E te faia fo‘i amo mo le fatafaitaulaga, o amo o le la‘au o le setima, ma ‘ia ufiufi ai i le ‘apamemea.

7E sulu atu fo‘i amo i mama, e i itū e lua o le fatafaitaulaga o amo e amo a‘i.

8‘Ia e faia i laupapa, ‘ia fa‘aōō; pei ‘ona fa‘aali atu ‘iā te oe i le mauga, ‘ia fa‘apea lava ‘ona latou faia.

O le Lotoā o le Malumalu(Eso 38.9-20)

9‘E te faia fo‘i le lotoā o le malumalu, i le itū i saute, o lo‘o fa‘asaga lea i le itū i saute, o ‘ie puipui mo le lotoā, o le ‘ie vavae ‘ua milo ona manoa, e tasi le selau o kupita le umi o le itū e tasi;

10o ona pou fo‘i e luafulu ma o latou lago e luafulu e fai i le ‘apamemea; a o fa‘amau o pou ma lo latou amo pou e faia i le ario.

11E fa‘apea fo‘i i le itū i matū i lona umi, o ‘ie puipui e tasi le selau o kupita lona umi, ma ona pou e luafulu, ma o latou lago e luafulu, e fai i ‘apamemea; a o fa‘amau o pou, ma lo latou amo pou e faia i le ario.

12O le lautele fo‘i o le lotoā i le itū i sisifo, o ‘ie puipui e limagafulu kupita lona umi, o latou pou e sefulu, ma o latou lago e sefulu.

13O le lautele fo‘i o le lotoā i le itū i sasa‘e, e fa‘asaga i sasa‘e, e limagafulu ona kupita.

14O ‘ie puipui fo‘i mo le tasi itū o le faitoto‘a, e sefulu ma le lima kupita ia; o latou pou fo‘i e tolu ma o latou lago e tolu.

15O i le tasi fo‘i itū o ‘ie puipui e sefulu ma le lima o kupita, o latou pou e tolu, ma o latou lago e tolu;

16mo le faitoto‘a fo‘i o le lotoā o le ‘ie puipui e luafulu o kupita lona umi, o le ‘ie uli, ma le pāuli, ma le mūmū, ma le ‘ie vavae ‘ua milo ona manoa, o le galuega a le tufuga fai ‘ie lanu ‘ese‘ese; o latou pou e fa, ma o latou lago e fa.

17O pou uma lava e si‘osi‘oina ai le lotoā, ‘ia fai o latou amo pou i le ario, e faia o latou fa‘amau fo‘i i le ario, a o latou lago o le ‘apamemea lea.

18E tasi le selau o kupita le umi o le lotoā, o lona lautele fo‘i e limagafulu i mea uma, e lima fo‘i kupita lona maualuga, o le ‘ie vavae ‘ua milo ona manoa; o latou lago fo‘i e fai i le ‘apamemea.

19O ipu uma lava o le malumalu, e fai ai ona sauniga uma ma ona fa‘amau uma lava, ma fa‘amau uma lava o le lotoā e faia i le ‘apamemea.

O le Lamepa o le Fale Fetāfa‘i(Levi 24.1-4)

20‘Ia e fai atu fo‘i i le fānauga a Isaraelu, ‘ia latou ‘aumai ‘iā te oe le suāu‘u olive lelei e tu‘ia, mo le afi, e mū ai pea le lamepa.

21I le fale fetāfa‘i o le fa‘apotopotoga i le itū mai o le ‘ie puipui, i luma o le ‘atola‘au o le tulafono; ‘ia teua e Arona ma ona atali‘i, e āfua mai i le afiafi se‘ia o‘o i le taeao i luma o le ALI‘I; e fai ma tulafono e fa‘avavau i o latou tupulaga amulī i le fānauga a Isaraelu.