Salāmo 107 - Revised Samoan Catholic Bible

TUSI 5(Salāmo 107—150)O le Alofa ma le Agalelei o le Atua i Tagata

1Vivi‘i atu ia ‘outou i le ALI‘I, auā e lelei lava o ia,

auā e fa‘avavau lava lona alofa.

2‘Ia fa‘apea lava o ē ‘ua fa‘aolaina e le ALI‘I,

o i latou na ia fa‘aolaina nai le lima o lē fa‘asauā,

3ma ‘ua fa‘apotopotoina i latou mai nu‘u,

mai sasa‘e ma sisifo,

mai le itū i matū ma le itū i saute.

4Na fesēa‘i i latou i le vao, i le ala e le‘i uia;

e le‘i maua e i latou se ‘a‘ai e nonofo ai.

5Sa matelaina i latou ma fia inu,

na lailoa o latou loto i totonu ‘iā i latou.

6‘Ona ‘alalaga lea o i latou i le ALI‘I i lo latou puapuagā;

na ia lavea‘i ‘iā te i latou nai o latou tigā.

7Na ia ta‘ita‘iina fo‘i i latou i le ala tonu,

‘ina ‘ia latou ō atu ai i se ‘a‘ai e nonofo ai.

8‘Ia vivi‘i atu i latou i le ALI‘I ‘ona o lona alofa,

ma ona vāvega na fai i le fānau a tagata.

9Auā ‘ua na fa‘amalie i le tagata fia inu,

o le tagata matelaina fo‘i ‘ua mā‘ona mai ‘iā te ia i le mea lelei.

10O ē nonofo i le pouliuli ma le ata o le oti,

ē ‘ua noanoatia i le tigā ma le u‘amea;

11auā na latou fouvale i afioga a le Atua,

ma latou ‘ino‘ino i le pule a lē Silisili‘ese.

12O le mea lea na ia fa‘amaulaloina ai o latou loto i le galuega mamafa;

na pa‘u‘ū i latou, a o leai se fesoasoani.

13‘Ona latou ‘alalaga atu lea i le ALI‘I i le latou puapuagā;

na ia fa‘aolaina i latou nai o latou tigā.

14Na ia ‘aumaia i latou nai le pouliuli ma le ata o le oti,

‘ua na motusia fo‘i o latou noanoaga.

15‘Ia vivi‘i atu i latou i le ALI‘I ‘ona o lona alofa,

ma ona vāvega na fai i le fānau a tagata.

16Auā na ia lepeti i puipui ‘apamemea,

ma ‘ua vavaeina fa‘amau u‘amea.

17O tagata valea ‘ona o lo latou solitulafono,

ma la latou amio leaga, ‘ua fa‘atigāina ai i latou;

18‘ua ‘ino‘ino i latou i mea e ‘ai uma lava,

‘ua fa‘alatalata fo‘i i latou i faitoto‘a o le oti.

19‘Ona ‘alalaga lea o i latou i le ALI‘I i lo latou puapuagā;

na ia fa‘aolaina i latou nai o latou tigā.

20‘Ua ia ‘auina atu lana afioga ma fa‘amālōlō ‘iā i latou

ma lavea‘iina ai nai lo latou malaia.

21‘Ia vivi‘i atu i latou i le ALI‘I ‘ona o lona alofa,

ma ona vāvega na fai i le fānau a tagata.

22‘Ia latou fai taulaga fo‘i i taulaga o le vi‘iga,

ma ta‘u atu ma le ‘oli‘oli ana galuega.

23O i latou o ē folau i va‘a i le sami,

o ē fai galuega i le vasa tele.

24O i latou ia latou te va‘aia galuega a le ALI‘I,

ma ona vāvega e fai i le moana.

25Auā ‘ua fetalai ane ia ma fa‘atupuina le afā,

‘ua laga ai ona peau.

26E ō a‘e i latou i le lagi, e toe ō ifo lalo,

‘ua liu suāvai ai o latou loto i le atuatuvale.

27E tautevateva i latou ma tausuai pei o le tagata ‘onā,

‘ua fa‘aumatia fo‘i o latou atamamai uma lava.

28‘Ona latou ‘alalaga atu lea i le ALI‘I i lo latou puapuagā;

‘ua ia ‘aumaia i latou nai o latou tigā.

29‘Ua liua e ia le afā i le malū,

‘ua ta‘oto ‘iā te ia le au peau.

30‘Ona latou fiafia lea, auā ‘ua malū,

‘ua ia ta‘ita‘iina fo‘i i latou i le taulaga na latou loto i ai.

31‘Ia vivi‘i atu i latou i le ALI‘I ‘ona o lona alofa,

ma ona vāvega na fai i le fānau a tagata.

32‘Ia latou fa‘ane‘ene‘e ‘iā te ia i le fa‘apotopotoga o le nu‘u,

ma ‘ia vivi‘i atu ‘iā te ia i le saofa‘iga a toeaina.

33E liua e ia o vaitafe e fai ma vao,

o vaipuna fo‘i e fai ma fanua naumati.

34O le fanua lafulemū e fai ma mea lafulafuā

‘ona o le amio leaga a ē nonofo ai.

35E liua e ia le vao e fai ma vailepa,

o le fanua naumati fo‘i e fai ma vaipuna.

36Na te fa‘anofo ai fo‘i ē ‘ua matelaina;

e sauniuni ai fo‘i e i latou o le ‘a‘ai e nonofo ai;

37ma latou lūlū ai saito i fanua,

ma totō ai tōvine, e fua mai ai ona fua e tele.

38E fa‘amanuia fo‘i e ia i latou,

e matuā fa‘ato‘ateleina fo‘i i latou;

e le fa‘aitiitia fo‘i e ia a latou manu.

39‘Ua fa‘ato‘aitiitia fo‘i i latou ma fa‘amaulaloina,

‘ona o le fa‘asauā ma le agaleagaina ma le fa‘anoanoa.

40E fa‘a‘inosia e ia o ali‘i,

ma fa‘asesēina i latou i le mea gaogao, e lē o i ai se ala.

41‘Ae fa‘aeaina e ia o lē ‘ua mativa nai le puapuagā,

ma tu‘uina atu o ‘āiga ma ia, e pei o se lafu mamoe.

42E iloa atu ē ‘ua amiotonu ma latou ‘oli‘oli ai;

a o ē amio leaga uma lava e mapuni ai o latou gutu.

43O lē ‘ua poto na te tausia nei mea;

e iloa e i latou o mea alofa a le ALI‘I.