Ruta O Le Fa‘atomuaga - Revised Samoan Catholic Bible

O Le Fa‘atomuagaO fa‘amatalaga o le tusi ‘iā Ruta o le ‘oto‘otoga o le tele o fa‘alavelave sa tutupu i le taimi a o tula‘i mai le ‘au Fa‘amasino. O Ruta o le fafine mai Moapi sa nofotane o ia ma se tagata mai Isaraelu. ‘Ina ‘ua maliu lana tane sa lē tu‘ulafoa‘iina e ia le tinā o lana tane ‘ae sa ia tausia pea lava o ia ma lona loto lelei. E ui lava o se fafine mai se atunu‘u ‘ese (Moapi) ‘ae sa tapua‘i atu pea o ia i le Atua o Isaraelu ma le fa‘amaoni. I le taufa‘ai‘ui‘u o le tusi ‘iā Ruta sa toe nofotane atu o ia i se tagata mai le ‘āiga o lana tane muamua ma sa ‘avea lea o se ala na liliu ai lenei fafine o se tasi o tagata tāua o le nu‘u o le Atua ‘ona sa amio lelei ma tapua‘i atu i le Atua mo lona loto ‘atoa i ai. ‘Ae le gata i lea o Ruta o se tasi o tua‘ā o le tupu ta‘uta‘ua o Isaraelu o Tavita.I fa‘amatalaga o le tusi a le ‘au Fa‘amasino e fa‘aali manino mai ai, sa malaia tagata o le nu‘u o le Atua ‘ona o lo latou fulitua ‘iā te ia. O le tala ‘iā Ruta, o le tala ofoofogia o se fafine mai se nu‘u ‘ese ‘ae ‘ua ala mai ai le manuia i tagata Isaraelu ma ‘avea ai fo‘i o ia o se tasi o le nu‘u filifilia a le Atua.O le Fa‘asologa o Matā‘upu:O le fo‘i mai o Naomi i Peteleema fa‘atasi ai ma Ruta 1.1-22O Ruta ma Poasa 2.1—3.18O Poasa na faiavā ‘iā Ruta 4.1-22