Iopu 3 - Revised Samoan Catholic Bible

O le Fetu‘uina e Iopu o le Aso na Fānau ai o ia; o ia fo‘i ‘ua fia Oti

1Mulimuli ane ‘ua tautala atu Iopu ma fetu‘u i lona aso.

2‘Ua fai atu fo‘i Iopu, ‘ua fa‘apea atu,

3“‘Ia fano le aso na fānau mai ai a‘u ma le po na fai ane ai,

‘‘Ua tō le fafine, o le tama tane.’

4‘Ia ‘avea lenā aso ma pouliuli,

‘aua ne‘i su‘esu‘eina e le Atua mai lugā;

‘aua ne‘i pupula i ai le malamalama.

5‘Ia toe maua e le pouliuli ma le ata o le oti,

‘ia tumau i ona luga le ao,

‘ia fa‘amata‘utia i mea e pouliuli ai le aso.

6O lenā po, ‘ia faoa e le pouliuli tele,

‘aua ne‘i ‘oli‘oli o ia fa‘atasi ma aso o le tausaga,

‘aua fo‘i ne‘i o‘o o ia i le faitauina o masina.

7Fa‘auta, ‘ia vale lava lea po,

‘aua ne‘i i ai se pese fiafia.

8‘Ia fa‘afanoina ia e i latou o ē ‘ua fetu‘uina aso,

o ē ‘ua popoto e fa‘aoso mai i leviatana.

9‘Ia fa‘apouliuliina fetū o lona afiafi po,

‘ia fa‘atalitali i le malamalama, ‘ae leai lava;

‘aua fo‘i ne‘i va‘ai atu o ia i laumata o le taeao.

10Auā sa lē punitia e ia o faitoto‘a o le manava o lo‘u tinā,

ma ‘ua lē natia le tigā ‘iā te a‘u.

11“Se a le mea na lē oti ai a‘u ‘ina o fa‘ato‘ā te‘a mai i le manava?

Se a le mea na lē tō ai la‘u mānava ‘ina o ‘ou sau mai le manava?

12Se a le mea na talia ai a‘u i tulivae?

Se a fo‘i na talia ai a‘u e susu ‘ou te susu ai?

13Auā po o pe na ‘ua ‘ou ta‘oto ai ma le filemū,

ma ‘ou moe ai; ‘ona ‘ou mālōlō ai lea,

14fa‘atasi ma tupu ma faipule o le lalolagi,

o ē na ati a‘e mo i latou o mea ‘ua gaogao;

15po o fa‘atasi ma ali‘i sili, o ē na i ai auro,

o ē na fa‘atūtūmuina o latou fale i ario;

16po o pei o se fānau le au ‘ua natia,

‘ua leai lava o a‘u; e pei o tama meamea ‘ua lē iloa le malamalama.

17O lea mea ‘ua lē toe i ai le fa‘asoesā o tagata amio leaga;

o lea mea fo‘i ‘ua mālōlō ai ē na lailoa.

18‘Ua fīfīlemū fa‘atasi ai o ē sa noanoatia,

latou te lē fa‘alogologo i le leo o lē ‘ua fa‘asauā.

19O i ai i lea mea o tagatanu‘u ‘atoa ma ali‘i,

‘ua sa‘oloto ai fo‘i le pologa nai lona ali‘i.

20“Se a le mea ‘ua tu‘uina mai ai le malamalama i lē ‘ua tigāina,

ma le ola i ē ‘ua fa‘anoanoa o latou loto?

21O ē ‘ua fa‘atalitali i le oti, a ‘ua lē o‘o mai;

e tele fo‘i ‘ona ‘eli i ai, ‘ae itiiti i le ‘oloa ‘ua natia.

22O ē ‘ua matuā ‘oli‘oli, ‘ina ‘ua fiafia pe a maua e i latou le tu‘ugamau.

23Se a le mea ‘ua tu‘uina mai ai le malamalama,

i le tagata o lē ‘ua lilo lona ala, ‘ua puipuia fo‘i o ia e le Atua?

24Auā ‘ua mua‘i sau lo‘u mapuitigā a o le‘i ‘ai a‘u,

ma ‘ua maligi mai ‘ou fa‘ataiō e pei o vai.

25Auā o le mea na ‘ou matuā fefe ai,

‘ua o‘o mai lea ‘iā te a‘u,

‘ua o‘o mai fo‘i ‘iā te a‘u le mea na ‘ou mata‘u i ai.

26‘Ua ‘ou le filemū, ‘ua ‘ou le mapu fo‘i,

‘ua ‘ou le mālōlō, a ‘ua o‘o mai le atuatuvale.”