Ieremia 14 - Revised Samoan Catholic Bible

O le Oge Tele i Iuta

1O le afioga a le ALI‘I na o‘o mai ‘iā Ieremia ‘ona o le la mala:

2‘Ua fa‘anoanoa Iuta,

ma ‘ua fa‘avaivai ona faitoto‘a.

‘Ua fa‘avauvau i latou ‘ua punou i le ‘ele‘ele,

ma ‘ua alu a‘e le ‘alaga o Ierusalema.

3‘Ua ‘a‘auina atu e o latou ali‘i o latou tagata i le vai;

‘ua latou ō atu i vai‘eli,

‘ua lē maua ni vai.

‘Ua latou toe fo‘i mai ma a latou ipu e le i‘i‘o;

‘ua mamā i latou ma māsiasi,

‘ua latou ufiufi fo‘i i o latou ulu.

4‘Ua mamā i latou o ē galue fanua,

‘ua ufiufi i o latou ulu ‘ona o le lau‘ele‘ele ‘ua māvaevae,

auā ‘ua leai sē ‘ua i le nu‘u.

5O le ‘aila lava ‘ua fānau ia i le vao,

ma ‘ua tu‘ua lana tama,

auā ‘ua leai se vao mu‘a.

6O asini fo‘i o le vao ‘ua tutū i mauga tula,

na latou sogisogi i le matagi e pei o luko;

‘ua ‘avea o latou mata, auā e leai ni vao iti.

7Le ALI‘I e, e ui lava ‘ina ‘ua molimau a matou agasala ‘iā te i matou,

‘ia e faia lava ‘ona o lou suafa.

Auā ‘ua tele lo matou liliu ‘ese;

‘ua matou agasala ‘iā te oe.

8Le fa‘amoemoega o Isaraelu e,

o lē fa‘aola ‘iā te ia i ona po o le puapuagā.

Se a le mea ‘ua ‘avea ai oe e pei o le tagata ‘ese i le nu‘u,

e pei o le tagata ala malaga fo‘i ‘ua afe ane e moe i le po?

9Se a le mea ‘ua ‘avea ai oe e pei o le tagata ‘ua segia lona mauli,

e pei o le toa e lē mafaia ‘ona fa‘aola?

A o oe, le ALI‘I e, ‘ua e ‘iā te i matou lava,

‘ua ta‘ua i matou i lou suafa; ‘aua ‘e te tu‘ua i matou.

10O lo‘o fa‘apea ‘ona fetalai mai o le ALI‘I i lenei nu‘u:

‘Ua fia feoa‘i na‘uā i latou, ‘ua latou le tāofia o latou vae,

o le mea lea e lē fiafia ai le ALI‘I ‘iā te i latou;

e manatua nei e ia o a latou amio leaga ma tauia a latou agasala.

11‘Ona fa‘apea mai ai lea o le ALI‘I ‘iā te a‘u: ‘Aua le tatalo mo lenei nu‘u ‘ina ‘ia lelei ai i latou.

12E ui ‘ina latou anapopogi, ‘ou te lē fa‘alogo i lo latou ‘alaga; e ui ‘ina latou osia taulaga mū ma taulaga i mea e ‘ai, ‘ou te lē talia; ‘ou te fa‘aumatia i latou i le pelu ma le oge ma le fa‘ama‘i.

13‘Ona ‘ou fa‘apea atu ai lea, “Auē! le Ali‘i e, le ATUA, fa‘auta, ‘ua fai mai perofeta ‘iā te i latou, ‘Tou te lē iloa le pelu, e lē o‘o fo‘i le oge ‘iā te ‘outou, a ‘ou te tu‘uina atu ‘iā te ‘outou le manuia fa‘amaoni i lenei mea.’”

14‘Ona fetalai mai lea o le ALI‘I ‘iā te a‘u: O lo‘o vavalo mai perofeta i mea pepelo i lo‘u igoa; ‘ua ‘ou lē ‘a‘auina atu i latou ma ‘ou le poloa‘i atu ‘iā te i latou ma a‘u lē tautala atu ‘iā te i latou; ‘ua latou vavalo ‘iā te ‘outou le fa‘aaliga pepelo ma le fa‘ataulāitu ma le mea fa‘atauva‘a ma le pepelo o latou loto.

17O le ‘upu nei ‘e te fai atu ai ‘iā te i latou,

‘Ia tafe ifo loimata i o‘u mata i le po ‘atoa ma le ao,

‘aua le mapu; auā ‘ua tu‘imomoia le tama teine taupou a lo‘u nu‘u i le tu‘imomomo e tele,

o le manu‘a e matuā leaga lava.

18‘Āfai ‘ou te alu atu i le vao,

fa‘auta fo‘i, o ē ‘ua fasia i le pelu.

‘Ae ‘āfai ‘ou te alu i le ‘a‘ai,

fa‘auta fo‘i, o ē ‘ua vaivai i le oge.

Auā o perofeta ‘atoa ma ositaulaga,

‘ua latou feoa‘i i le nu‘u ‘ua latou lē iloa.

O Talosaga a Tagata i le Ali‘i

19‘Ua e matuā lafoa‘iina ‘ea Iuta?

‘Ua ‘inosia ‘ea Siona i lou finagalo?

Se a le mea ‘ua e sasaina ai i matou,

‘ua leai fo‘i se togafiti e mālōlō ai i matou?

Na matou fa‘atalitali i le manuia,

‘ae leai se lelei na maua;

na fa‘atalitali fo‘i i ona po e fa‘amālōlōina ai,

fa‘auta fo‘i, o le mata‘u.

20Le ALI‘I e,

‘ua matou iloa la matou amio leaga,

ma le amioletonu a o matou tamā;

auā ‘ua matou agasala ‘iā te oe.

21‘Aua ‘e te ‘ino‘ino mai ‘iā te i matou

auā o lou suafa;

‘aua ‘e te fa‘a‘inosia le nofoāli‘i o lou mamalu;

‘ia e manatua, ‘aua le tatalaina la tatou feagaiga ma oe.

22Pe i ai se tasi o mea fa‘atauva‘a,

o i nu‘u ‘ese e mafaia ‘ona fa‘atotōina ifo o le timu?

pe mafaia ‘ea e le lagi ‘ona tu‘uina mai o timuga?

E lē o oe ‘ea lea, le ALI‘I e, lo matou Atua?

O le mea lea matou te fa‘atalitali ai ‘iā te oe

auā o oe lava ‘ua e faia ia mea uma.