Mika 1 - Revised Samoan Catholic Bible

O le To‘asā o le Atua ‘iā Iuta ma Isaraelu ‘ona o a Latou Amio

1O le afioga a le ALI‘I na o‘o mai ‘iā Mika le Morese i ona po o Iotama ma Aasa ma Esekia, o tupu o Iuta, na ia i iloa i mea a Samaria ma Ierusalema.O le Auega ‘iā Samaria ma Ierusalema

2Fa‘alogologo mai ia ‘outou nu‘u uma;

fa‘asaga mai ia le lalolagi e.

‘Atoa ma mea ‘ua tumu ai se‘ia fai e le Ali‘i le ATUA ana mau ‘iā te ‘outou,

o le Ali‘i lava a‘i lona malumalu pa‘ia.

3Auā fa‘auta,

o lo‘o afio mai le ALI‘I a‘i lona afio‘aga,

e afio ifo o ia ma soli i mea maualuluga o i le lalolagi.

4E liu suāvai mauga i lalo ‘iā te ia,

e māvaevae vanu,

pei o le pulu i le afi,

fa‘apei o le vai na tafe ifo i le tofē.

5‘Ona o le solitulafono a Iakopo e o‘o ai ia mea uma, ‘ona o agasala fo‘i a le ‘āiga o Isaraelu. Se a ‘ea le solitulafono a Iakopo? E lē o Samaria ‘ea? O a ‘ea fo‘i mea maualuluga a Iuta? E lē o Ierusalema ‘ea?

6O le mea lea ‘ou te fai ai Samaria ma faupu‘egama‘a i le fanua ma mea e totō ai vine, ‘ou te tuleia fo‘i i lalo i le vanu ona ma‘a ‘ou te fa‘ata‘atitiafuaina ona fa‘avae.