Ieremia Fa‘atomuaga - Revised Samoan Catholic Bible
Fa‘atomuagaO le perofeta o Ieremia na soifua mai i le vaitaimi pe tusa o le 646 T.L.M, a‘o le‘i fānau mai le Mesia. O ia o se tagata mai se ‘āiga o le ‘au ositaulaga i le ‘a‘ai o Anatota i Peniamina e latalata i Ierusalema (1.1). Sa vala‘auina e le Atua Ieremia e fai ma Perofeta i le sefulu tolu ai o tausaga (626 T.L.M), talu ‘ona ‘avea o Iosia ma tupu o Iuta, a o taule‘alea lava Ieremia (1.2-6). O se vaitaimi o le tele o tau‘a ma vesiga i va o atunu‘u malolosi (Asuria, Papelonia, Aikupito) o lo‘o latou si‘osi‘omiaina Isaraelu. Sa ‘avea lea ma mea na ‘a‘afia ai tele faigamālō a Iuta ‘ae maise le soifuaga tapua‘i a tagata o lona atunu‘u. Sa lapata‘i atu pea le perofeta i tagata o Iuta i se vaitaimi umi o lana galuega, e uiga i le o‘o mai o puapuagā i le atunu‘u ‘ona o a latou agasala ma le ifo i tupua. ‘Ae le‘i maliu lenei perofeta, sa ia va‘aia le fa‘ataunu‘uina o ana valo‘aga e ala lea i le fa‘ato‘ilaloina o Ierusalema e Nepukanesa le tupu o Papelonia i le 597 ma le 586 T.L.M. Sa fa‘aleagaina ‘atoa le ‘a‘ai ma le malumalu ‘atoa ai ma le ‘ave fa‘atagataotau‘a o le tele o tagata ma tupu (Ioakima 597, Setekaia 586 T.L.M) o Iuta (Iere 39.6-9; 2 No 36.6-8; Tani 1.1-2). Na toe vavalo fo‘i Ieremia e uiga i le toe fo‘i mai o i latou mai le tāfeaga ma toe atiina a‘e le mālō o Tavita. O Ieremia o se tasi o Perofeta sa tumu lona olaga i faigatā, puapuagā, ma tigā a o fa‘atinoina le faiva fa‘aperofeta. Sa ‘upu leagaina, sa agaleagaina, sa faitioina, sa falepuipuina ‘ae le‘i fa‘avaivai ai Ieremia i lona finauina pea o le finagalo o le Atua. Sa fa‘aaunu‘ua Ieremia ma isi tagata o Iuta i Aikupito ma maliu ai lava.E lima ni vaega e mafai ‘ona vaevae i ai le tusi a Ieremia: (1) O le vala‘auga o Ieremia; (2) O le finagalo o le Atua i le mālō o Iuta ma ona ta‘ita‘i i le vaitaimi o nofoa‘iga a Iosia, Ioakima, Ioakina ma Setekaia; (3) O tusitusiga ma fa‘amaumauga o mea na tutupu sa tusia e Paruka le failautusi a Ieremia. ‘Ua aofia i nei fa‘amaumauga o valo‘aga a Ieremia ma mea na tutupu a‘o soifua le perofeta; (4) O le fe‘au a le Ali‘i i atunu‘u ‘ese‘ese; (5) O nisi o tala e fa‘amatalaina ai le fa‘ato‘ilaloga o Ierusalema ma le tāfeaga i Papelonia.O Ieremia o se tagata magafagafa tele ma sa fa‘aalia lona alofa tele i tagata o lona atunu‘u, e ala lea e lē fiafia e fa‘ailoa atu le fa‘amasinoga o se fa‘asalaga a o se a‘oa‘oga i ona tagata. E tele se vaega o le tusi o lo‘o tautala ai Ieremia i ni lagona o‘otia e uiga i ona puapuagā ma ona mafatiaga talu ‘ona vala‘auina o ia e le Atua e ‘avea ma perofeta. ‘Ae ui i lea, o le afioga a le Ali‘i e mumū a‘e i lona loto e pei o se afi, ‘ua lē mafai ‘ona ia tineia.O nisi o ‘upu taualoa i lenei tusi e fa‘alauiloa mai ai se feagaiga fou o le a osia ma tausisia e tagata o le Atua e aunoa ma se faia‘oga na te a‘oa‘oina i tagata auā o le a tusia lava i o latou loto (31.31-34).O le Fa‘asologa o Matā‘upu:O le vala‘auga o Ieremia 1.1-19O valo‘aga i nofoa‘iga a Iosia, Ioakima, Ioakina ma Setekaia 2.1—25.38O mea na tutupu i le olaga o Ieremia 26.1—45.5O valo‘aga i le malaia o isi mālō 46.1—51.64O le fa‘atafunaga o Ierusalema 52.1-34
