1O Simona, le atali‘i o Onia, ‘ua na fa‘afouina i ona lava aso le maota o le Atua;
o lona olaga ‘atoa na ia fa‘amausalī ai le malumalu.
2O ia na fa‘atūina o fa‘avae e tali ai le maualuga o le malumalu
ma lona mafiafia ‘ua fa‘aluaina ma ‘aupā vali maualuluga o le malumalu.
3O aso o lona ola na talia ai i fa‘atanoa le tele o le vai,
na fa‘atumuina ai a masa‘a, ‘ua pei o le sami.
4‘Ua na tausileleia lona nu‘u, ‘ua na lavea‘iina i latou ai le fanoga.
5‘Ua na maua ni ala e fa‘alautele ai le ‘a‘ai;
o le fa‘afeagai ma le nu‘u na ia maua ai lona mamalu;
‘ua na fa‘alauteleina le faitoto‘a o le maota ma lona lotoā.
6Na pupula o ia i aso o lona ola,
e pei o le fetū o le taeao i totonu o le ao,
e pei o le masina i lona ‘ato‘atoa.
7E pei o le pupula o le lā, e fa‘apea ‘ona ia pupula i le malumalu o le Atua;
8e pei o le nuanua e pupula i ao o le mamalu,
e pei o le fuārosa i aso mafanafana,
e pei o fuāsusana ‘ua i le ‘auvai,
e pei o le lipano e sasala lona manogi i aso vevela,
9e pei o le afi pupula ma le mea manogi e mū i le afi,
10e pei o le ipu auro mamā ‘ua teuteuina i ma‘a tāua ‘ese‘ese uma,
11e pei o le la‘au olive ‘ua fotu mai ona tātupu,
ma le arasi ‘ua tupu maualuga,
e fa‘apea o ia pe a fai ona ‘ofu mamalu,
pe a fa‘a‘ofuina fo‘i o ia i le mamalu o ona ‘ofu tofiga.
12A o‘o ‘ina a‘e o ia i le fatafaitaulaga pa‘ia,
sa fa‘amamalu lava e ia ona ‘ofu pa‘ia.
13A tali e ia o tufa‘aga ai lima o le ‘au ositaulaga,
o tu o ia i tala ane o le fatafaitaulaga,
sa fa‘ata‘ali‘oli‘o ona uso ‘iā te ia, e pei o se paleali‘i,
e pei o se togāarasi i le mauga o Lepanona.
14Sa tutū fa‘ata‘ali‘oli‘o ‘iā te ia, e pei o lālā o le pama,
o atali‘i uma o Arona i lo latou mamalu.
15Sa i o latou lima le taulaga mo le Ali‘i i luma o le fa‘apotopotoga uma o Isaraelu
ma ‘ua fa‘amae‘a o sauniga i le fatafaitaulaga,
e fa‘a‘atoa e mamalu o le taulaga i le Tupu silisili.
16‘Ua na fa‘aloloa lona lima i le taulaga i mea e inu ma ‘ua liligi ifo le toto o fuifuivine.
17‘Ua na liligi ifo i le fa‘avae o le fatafaitaulaga,
e pei o se manogi ‘ua malie i le Ali‘i silisili.
18‘Ona ‘alalaga ai lea o atali‘i o Arona, ‘ua latou ilia o pū togitogi
ma ‘ua latou fa‘alogona o le leo tele i luma o le Atua.
19‘Ona fetuleni lea o le motu o tagata ma ‘ua latou fa‘apa‘u‘ū faō i le ‘ele‘ele,
e ifo atu ai i le Ali‘i lo latou Atua ma momoli o talosaga i le Atua silisili ‘ese e ona le mana uma.
20Ma ‘ua fa‘amamalu ‘iā te ia le ‘aufaipese i o latou leo
ma ‘ua ta‘alili malie o latou fati i le malumalu tele.
21A o le nu‘u ‘ua latou fa‘atoga atu i le Ali‘i, ‘iā latou talosaga,
se‘ia o‘o ‘ina māe‘a le fa‘aaloalo i le Ali‘i ma ‘ua ‘ato‘atoa a latou sauniga.
22‘Ona fa‘aifo ai lea o Simona, o fa‘aloloa ona lima i le fa‘apotopotoga uma o le fānau a Isaraelu,
‘ia vivi‘i atu i le Atua i ona laugutu ma fa‘amamalu i lona suafa.
23‘Ona toe faia lea o lana tatalo, i le fia fa‘aali tino le mana o le Atua.
O Fa‘ane‘ene‘ega i le Atua24O lenei, ‘ia ‘outou tatalo atu i le Atua o mea uma lava,
o lē na ia fai o mea tetele i le lalolagi ‘atoa uma,
o lē na tulutulu‘i o tatou aso talu i le manava o o tatou tinā
ma ‘ua na tausia i tatou e tusa ma lona agaalofa.
25‘Ia foa‘iina mai e ia le fiafia o le loto,
ma ‘ia maua le filemū ‘iā Isaraelu i o tatou aso e o‘o i le aso e fa‘avavau.
26‘Ia fa‘atuatua o Isaraelu o lo‘o fa‘atasi ma i tatou le agaalofa o le Atua,
ma ‘ia lavea‘i o ia ‘iā i tatou i ona lava aso.
O Atunu‘u ‘Inosia e Tolu27O nu‘u e lua e ‘ino‘ino i ai lo‘u agaga,
a o lona tolu ‘ou te ‘ino‘ino i ai, e lē o se nu‘u,
28o ē nonofo i le mauga o Seira ma le ‘au Filisitia ma le nu‘u vālelea e nonofo i Sekema.
O Nai ‘Upu Fa‘ai‘u29O Iesu, le atali‘i o Sirako, o le Ierusalema,
‘ua na tusia i lenei tusi a‘oa‘oga o le mafaufau ma le poto,
‘ua ia liligi i ai le poto mai lona loto.
30‘Amu‘ia lē fa‘asaga atu i nei manatu lelei;
‘ai sē na te manamanailoto, e tumau pea lona ia poto.
31Auā ‘āfai e tausia mea ia e le tagata,
e mafai ‘iā te ia mea uma lava,
auā o le malamalama o le Atua e fai mōna fa‘asino ala.
Who We AreWhat We EelieveWhat We Do
2025 by iamachristian.org,Inc All rights reserved.
