Salāmo 92 - Revised Samoan Catholic Bible

‘Ia Vi‘ia le Atua ‘ona o lona Alofa i ē Amio AtuaO le salāmo, o le pese lea mo le aso sapati

1E lelei ‘ona vivi‘i atu i le ALI‘I,

ma ‘ia fai pesega i lou suafa lē Silisili‘ese e.

2‘Ia ta‘u atu i le taeao lou alofa

‘ia ta‘u atu fo‘i i le po lou fa‘amaoni,

3i le la‘aupese e sefulu ona manoa,

ma le napeli, ma le leo o le kitara.

4Auā ‘ua e fa‘afiafia mai ‘iā te a‘u i lau galuega,

le ALI‘I e;

‘ou te ‘alaga fiafia ‘ona o mea ‘ua faia e ou ‘a‘ao.

5Le ALI‘I e,

e matuā sili lava mea ‘ua e faia;

e loloto lava ou manatu.

6O le tagata valea na te lē iloa;

ma le vale na te lē lagona lenei mea.

7A tupu olaola o ē amio leaga e pei o le vao iti,

a fuga mai fo‘i i latou uma o ē fai mea leaga

e fa‘apea i latou ‘ina ‘ia fa‘aumatia e o‘o i le fa‘avavau lava.

8A o oe le ALI‘I e,

o lo‘o silisili oe e fa‘avavau.

9Auā le ALI‘I e, fa‘auta i ē ita ‘iā te oe,

auā fa‘auta i ē ita ‘iā te oe, e fano i latou;

e fa‘ata‘ape‘apeina i latou uma o ē fai amio leaga.

10‘Ae fa‘amaualugaina e oe lo‘u nifo e pei o le rema;

e fa‘au‘uina a‘u i le suāu‘u fou.

11E iloa atu fo‘i o‘u mata i ē lamalama mai ‘iā te a‘u,

e fa‘alogo fo‘i o‘u taliga i ē amio leaga ē ‘ua laga mai ‘iā te a‘u.

12E tupu olaola le tagata amiotonu e pei o le pama;

e tupu tele e pei o le arasi i Lepanona.

13O ē ‘ua totōina i le fale o le ALI‘I,

e tupu olaola i latou i lotoā o le tatou Atua.

14A o‘o ‘ina ulusinā, latou te fua mai pea lava;

e malolosi ma lauolaola i latou;

15‘ina ‘ia iloa ai o le ALI‘I e tonu ia;

o lo‘u papa ia e lē o ‘iā te ia fo‘i se amio leaga.