Iona 2 - Revised Samoan Catholic Bible

O le Tatalo a Iona

1Na tatalo fo‘i Iona i le ALI‘I lona Atua i le manava o le i‘a, ‘ua fa‘apea atu,

2“Na a‘u vala‘au atu i le ALI‘I ‘ona o lo‘u puapuagā,

‘ua na fa‘afofoga mai fo‘i ‘iā te a‘u.

Na ‘ou ‘alaga atu nai le mea maulalo i tu‘ugamau,

‘ua e fa‘afofoga i lo‘u leo.

3Na e lafoina a‘u i le moana,

i totonu lava o le sami;

na si‘osi‘oina lava a‘u e le au;

na lofia a‘u i ou galu ma ou peau uma lava.

4‘Ona ‘ou fa‘apea ai lea,

‘‘Ua lafoa‘iina a‘u a‘i luma o ou fofoga;

a ‘ou te toe fa‘asaga atu i lou malumalu pa‘ia.’

5‘Ua si‘osi‘oina a‘u e le sami,

na manū a‘u oti;

‘ua ufitia a‘u i le moana,

‘ua fusia lo‘u ulu i le limu.

6‘Ua ‘ou alu ifo i ‘auvae mauga;

‘ua fa‘amauina fa‘amau o le lalolagi i luga ‘iā te a‘u e fa‘avavau;

‘ae te ‘aveina a‘e lo‘u ola a‘i le lua,

le ALI‘I e lo‘u Atua.

7Na ‘ou manatua le ALI‘I,

‘ina o vaivai o lo‘u loto i totonu ‘iā te a‘u;

na o‘o atu fo‘i la‘u tatalo ‘iā te oe i lou malumalu pa‘ia.

8O ē ‘ua ‘ana‘ana i mea fa‘atauva‘a ma le pepelo

‘ua lafoa‘iina e i latou o mea e manuia ai i latou.

9A o a‘u ‘ou te faitaulaga ‘iā te oe ma le ‘upu fa‘afetai;

‘ou te faia le mea na ‘ou tautō ai.

Mai le ALI‘I le olataga.”

10‘Ua fetalai atu le ALI‘I i le i‘a, ‘ona luai lea e ia o Iona i le ‘ele‘ele matūtū.