Salāmo 145 - Revised Samoan Catholic Bible

O le Vi‘iga i le ALI‘IO le vi‘i a Tavita

1Lo‘u Atua e, le Tupu,

‘ou te fa‘ane‘ene‘e ‘iā te oe;

‘ou te fa‘amanū atu fo‘i i lou suafa e fa‘avavau fa‘avavau lava.

2‘Ou te fa‘amanū atu ‘iā te oe i aso uma lava;

‘ou te vivi‘i atu fo‘i i lou suafa e fa‘avavau fa‘avavau lava.

3E silisili lava le ALI‘I, e tusa ‘ona matuā vi‘ia o ia;

e lē mafai ‘ona su‘esu‘eina lona silisili ‘ese.

4E vivi‘i atu le tasi tupulaga ma le tasi tupulaga i au galuega;

latou te fa‘ailoa atu au mea mamana.

5‘Ou te tautala atu i le matagofie o le vi‘iga o lou mamalu,

‘atoa ma au mea mamana.

6E tautalatala i latou i le malosi o au mea e mata‘utia ai oe;

‘ou te ta‘uta‘u atu fo‘i i lou silisili ‘ese.

7Latou te ta‘u atu lava le fa‘amanatuga i lou agalelei tele lava;

latou te ‘alalaga fiafia fo‘i i lau amiotonu.

8E alofa fua mai ma alofa mutimutivale mai le ALI‘I;

e telegese lona to‘asā, e tele fo‘i lona alofa.

9O lo‘o agalelei mai le ALI‘I i mea uma,

o lona alofa mutimutivale fo‘i ‘ua i ana mea uma na fai.

10Le ALI‘I e,

e vivi‘i atu ‘iā te oe mea uma na e faia;

e fa‘afetai atu fo‘i ‘iā te oe ou tagata amio Atua.

11E tautalatala atu i latou i le mamalu o lou mālō,

ma ta‘uta‘u atu i lou mana;

12‘ina ‘ia fa‘ailoa atu i le fānau a tagata ana mea mamana,

ma le mamalu matagofie o lona mālō.

13O lou mālō o le mālō lea e fa‘avavau lava;

ma lau pule e au tupulaga lava lea.

14E tāofia i luga e le ALI‘I ‘atoa uma ē pa‘u‘ū;

o ia fo‘i fa‘atusa‘oina o ē ‘ua fa‘ano‘uno‘u uma lava.

15E fa‘asaga atu ‘iā te oe mata o mea uma lava;

‘e te avatua fo‘i a latou mea e ‘ai i ona aso e tatau ai.

16O lo‘o e fa‘amafola lou ‘a‘ao,

ma fa‘amā‘o‘ona le mana‘o o mea ola uma lava.

17E amiotonu le ALI‘I i ona ala uma;

o lo‘o alofa ia i ana mea uma lava na faia.

18E latalata mai le ALI‘I ‘iā i latou uma o ē vala‘au ‘iā te ia,

o i latou uma o ē vala‘au ‘iā te ia ma le fa‘amaoni.

19E faia e ia le mea e mana‘o i ai o ē matata‘u ‘iā te ia;

e fa‘afofoga fo‘i o ia i la latou ‘alaga atu, ma fa‘aolaina i latou.

20E tausi le ALI‘I i ē alolofa atu ‘iā te ia uma lava;

‘ae fano ‘iā te ia o ē amio leaga ‘atoa uma.

21O vi‘i o le ALI‘I e ta‘u atu o lo‘u gutu;

e fa‘afetaia e tagata uma o lona suafa pa‘ia,

e fa‘avavau fa‘avavau lava.