Poto 8 - Revised Samoan Catholic Bible

O le Mana‘o o Solomona i le Poto

1O le poto e tau atu ia ma le malosi a‘i le tasi itūlagi i le tasi itūlagi

ma ‘ua na teuteu ai mea uma ma le agamālie.

2Na ‘ou naunau i ai ma sā‘ili‘ili i ai talu ‘ina ‘ou itiiti;

sa ‘ou mana‘o ‘iā te ia e fai ma a‘u avā,

sa ‘ou tu‘inanau i lona ‘aulelei.

3‘Ua fa‘aali mai e ia le mamalu o lona tupu‘aga,

auā e mau o ia fa‘atasi ma le Atua,

‘ua alofa ‘iā te ia o le Ali‘i e pule i mea uma.

4Auā o ia o le a‘oa‘o o tulafono a le Atua,

o ia ‘ua filifili i ana galuega.

5‘Āfai e mana‘omia o ‘oloa i lenei olaga,

e lē sili ‘ea ‘ona mau‘oloa o ia, na faia a‘i mea uma?

6‘Āfai ‘ua lelei o fua o le fa‘autauta,

e lē mua ‘ea le poto i le gaosiga o mea uma e faia?

7E mana‘o ‘ea se tasi i le amiotonu?

O galuega a le poto e maua ai o amioga lelei;

na te a‘oa‘o mai le amio pulea ma le fa‘autauta,

le amiotonu ma le loto malosi,

o mea ia e sili ‘ona aogā i tagata i le olaga nei.

8A mana‘o se tasi ‘ina ‘ia iloa mea e tele,

‘ua iloa lava e le poto mea ‘ua mavae atu,

na te ‘i‘ite fo‘i i mea e tutupu i aso o lumana‘i;

‘ua malamalama ‘iā te ia o fa‘amatalaga loloto,

na te iloa le tali i fesili faigatā;

na te iloa o fa‘ailoga ma vāvega a o le‘i fa‘ataunu‘uina,

e fa‘apea fo‘i o mea na tutupu i augātagata ma augātausaga.

E Aogā tele le Poto i ē Ta‘ita‘i

9O le mea lea na tonu ai i lo‘u loto ma te soamafuta pea ma ia

ma lo‘u iloa ‘ou te maua mai ai o fa‘atonuga lelei,

e fai fo‘i o ia mo‘u fa‘amafanafanaga pe a mafatia pe puapuagātia lo‘u loto.

10O ia ‘ou te maua ai le mamalu i luma o fa‘apotopotoga o tagata,

e ta‘uleleia ai fo‘i a‘u, o le taule‘ale‘a, i luma o le ‘au toeaina;

11e tāua ai lo‘u atamai i fa‘amasinoga;

e fa‘ate‘ia ai ‘iā te a‘u o ali‘i tetele,

e ofo ‘iā te a‘u o mata o ali‘i sili;

12a ‘ou fa‘alologo, ‘ona fa‘atalitali ai lea i latou i la‘u ‘upu,

latou te tetepa a‘e ‘iā te a‘u pe a ‘ou tautala;

a fa‘aumiumi fo‘i la‘u fa‘amatalaga, latou te tu‘u o latou lima i o latou fofoga.

13O ia ‘ou te maua ai le ta‘uleleia e lē gata;

o ē mulimuli ‘iā te a‘u latou te manatua a‘u e fa‘avavau.

14‘Ou te pule i ‘ou nu‘u, e usita‘i fo‘i ‘iā te a‘u o nu‘u ‘ese.

15A fa‘alogo ‘iā te a‘u o tupu mata‘utia,

e matata‘u ai i latou. ‘Ou te fa‘aali atu lo‘u agaalofa i lo‘u nu‘u,

‘ou te loto toa i le tau‘a.

16A ‘ou fo‘i mai i lo‘u fale ma te fa‘amālōlō ma ia,

auā e lē maua se mea ‘o‘ona e tasi i le mafuta ma ia,

e lē tupu se loto musuā i lē ‘ua fa‘atasi ma ia,

‘ua na o le fiafia lava ma le ‘oli‘oli.

17O mea ia sa ‘ou mafaufau ifo i ai, o mānatunatu i lo‘u loto,

o le mafutaga ma le poto, o le ola e fa‘avavau lava lea;

18o le fa‘auō fo‘i ma ia, e maua ai le manuia moni;

o galuega a ona lima ‘ua i ai le ‘oloa e lē āu te‘a;

o le soamafuta ma ‘ia e maua ai le fa‘autauta,

ma le mamalu i le fetautalatala‘i ma ia;

o lea sa ‘ou fealua‘i solo e sā‘ili‘ili i se ala ma te fa‘atasi ai ma ia.

19O a‘u fo‘i o le tama atamai,

‘ua lelei le agaga na ‘ou maua mai i le Atua;

20o lona uiga tonu, ‘ona ‘ua ‘ou lelei,

o lea na ‘ou sau ai i se tino e lē ponā.

21‘Ona ‘ua ‘ou iloa fo‘i e lē mafai ‘iā te a‘u

‘ona maua le poto se‘iloga ‘ua foa‘iina mai e le Atua;

a o le iloa po‘o ai e pogai i ai lenā mea alofa,

o le fa‘autauta fo‘i lea, o le mea lea na ‘ou fa‘asaga atu ai i le Ali‘i,

ma ‘ua ‘ou ‘ai‘oi atu ‘iā te ia,

o fa‘apea atu ‘iā te ia ma lo‘u loto ‘ato‘atoa.