Sirako 42 - Revised Samoan Catholic Bible

O Mea ‘ua lē Tatau ‘ona Māsiasi Ai

1‘Ia oe ne‘i e ta‘uta‘u se ‘upu na e fa‘alogo i ai,

‘ua fa‘aalia ai se matā‘upu lilo; ‘ona e sao ai lava lea i le mā,

e alofagia ai fo‘i oe e tagata uma. ‘Aua fo‘i ‘e te māsiasi i mea uma nei,

‘aua fo‘i ‘e te fa‘ailogaina o tagata ma agasala ai.

2O le tulafono a le Silisili‘ese ma lana feagaiga,

o le fa‘ai‘uga e ta‘uamiotonuina ai le amio leaga;

3o le talatalanoa fa‘atasi ma ē masani, ‘atoa ma tagata faimalaga,

o le fai sina mea alofa i au uō;

4o le fua fa‘atautau ‘ua tonu ma ma‘a ‘ua tatau;

o le tele po o le itiiti o tupe ‘ua e maua mai;

5o le lē fesuia‘i le tau i le fa‘atau atu po o le fa‘atau mai i ē fa‘atau ‘oloa,

o le a‘oa‘i ma le malosi i lau fānau ma le sasaina le pologa amio leaga se‘ia totolia lona tino.

6‘Āfai e amio leaga le avā, e aogā le fa‘amaufa‘ailoga;

7‘ia tāofia pea ia i le mea e to‘atele ai tagata; o mea ‘e te tu‘u atu ‘iā te ia,

‘ia e faitauina ma ‘ia e fuaina; ‘ia e tusitusi uma mea ‘e te avatu i ai ma mea ‘e te maua mai ai.

8‘Aua ‘e te mā i a‘oa‘i atu i le vale ma lē ‘ua fa‘avalea,

fa‘apea ma le toeaina ‘ua so‘ona finau ma taulele‘a.

‘Ona i ai lea ‘iā te oe le malamalama moni, e ta‘uleleia ai oe e tagata uma. O le Afafine Vaogatā

9O le afafine,

o le fa‘asoesā nanā lava ia o lona tamā;

o le popole i ai ‘ua lē moe ai o ia;

‘āfai o le teine muli, pe o‘o lava ‘ina matua tele o ia;

a o‘o ‘ina nofotane, pe o‘o ‘ina ‘inosia ai o ia.

10A nofofua, pe lē fa‘aleagaina fo‘i o ia, i le maua o ia o tō i le fale o lona tamā;

a nofotane fo‘i o ia, pe lē soli la la feagaiga, po o le lē fānau fo‘i o ia.

11A vaogatā sou afafine,

‘ia e leoleosa‘i i ai ma le filigā,

‘ina ne‘i ‘avea ai oe ma tauemuga a ou fili ma ulaga o le nu‘u

ma ‘upu fa‘atusa i le motu o tagata;

‘ina ne‘i fa‘amasiasi lava o ia ‘iā te oe i luma o le to‘atele.

O Fafine

12‘Ia oe ne‘i e to‘aga i le tino lelei o se tagata,

‘aua fo‘i ‘e te nofonofo fa‘atasi ma fafine.

13Auā o le ‘ofu ‘atia e oso mai ai le mogamoga,

a o le fafine e oso mai ai le amio leaga a le tane;

14‘ua feoloolo le ‘ino‘ino mai a le tane, ‘ae leaga le fafine fa‘a‘ole‘ole,

auā o le fafine e ufitia a‘i le tane i le tauemu ma le māsiasi. O le Ofoofogia o Galuega a le Atua

15O lenei, ‘ou te fa‘amanatua galuega a le Ali‘i,

‘ou te tala‘i atua mea ‘ua ‘ou va‘ai i ai.

O fetalaiga a le Atua na faia a‘i ana galuega.

16‘Ua iloa uma lava e le lā na te fa‘amalamalama i ai;

o le galuega fo‘i ia a le Ali‘i, ‘ua tumu ia i lona mamalu.

17Po ‘ua lē fa‘aoso mai ‘ea e le Ali‘i

i ona tagata pa‘ia ‘iā latou tala mai ana galuega ofoofogia uma,

na fa‘amausalīina e le Atua e ona le mana uma,

‘ina ‘ia fa‘atumauina mo lona mamalu?

18Na te su‘esu‘eina le moana ‘atoa ma loto o tagata,

‘ua silafia e ia o latou manatu aupito loloto.

19Auā o lo‘o i le Ali‘i o poto uma lava,

‘ua silafia e ia o fa‘ailoga o tausaga;

na te talaina mai o mea ‘ua mavae atu

ma mea o lumana‘i ma fa‘aali mai tulaga o mea lilo.

20E lē pouliuli ‘iā te ia se manatu e tasi,

e lē lilo ‘iā te ia se ‘upu e tasi.

21‘Ua na fa‘a‘ofuina i le matagofie o galuega ofoofogia a lona poto;

‘ua muamua lava ia i le vavau, e o‘o lava ia i le fa‘avavau;

e leai se mea e fa‘aopoopo ‘iā te ia.

22E leai fo‘i se mea e tō‘ese ‘iā te ia;

e lē aogā ‘iā te ia le fa‘atonuga a se tasi.

23E! ‘ua matuā matagofie ana galuega uma!

a o mea e mafai ‘ona tatou iloa, ‘ua na o se aloiafi lava lea.

24‘Ua ola uma lava ana galuega ma ‘ua tūtūmau e fa‘avavau

ma ‘ua nofo usita‘i uma lava i mea uma e fa‘aaogāina i ai.

25‘Ua soa uma, le tasi e fasaga mai i le tasi;

‘ua lē faia e ia se mea e tasi ‘ina ‘ia fano.

26E fa‘amausalī e le tasi le manuia o le tasi.

O ai sē a vaivai i le va‘ava‘ai atu i le mamalu o le Ali‘i?