Esekielu 30 - Revised Samoan Catholic Bible

O le Fa‘atafunaga o le Nu‘u o Aikupito

1‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:

2Le atali‘i e o le tagata, ‘ia e vavalo atu ma ‘ia e fai atu, ‘Ua fa‘apea ‘ona fetalai mai o le Ali‘i le ATUA:

‘Inā uiō ia ‘outou, “Auē le aso e!”

3Auā ‘ua latalata mai le aso;

‘ua latalata mai le aso o le ALI‘I,

o le aso fa‘amalumalu; e fai lea ma ona po o nu‘u ‘ese.

4E o‘o fo‘i le pelu i Aikupito;

e i ai fo‘i le mata‘u tele i Aitiope pe a pa‘u‘ū e ‘ua fasia i Aikupito;

latou te ‘avea fo‘i lona vao tagata;

o ona fa‘avae fo‘i e fulisia ia.

5O Aitiope ma Futu ma Luti ma tagata ‘ese‘ese ‘atoa uma ma Kupu ma tagata o le nu‘u o le feagaiga, e oti fa‘atasi ma i latou i le pelu.

6‘Ua fa‘apea ‘ona fetalai mai o le ALI‘I:

O i latou o ē lagolago ‘iā Aikupito e pa‘u‘ū i latou;

e mavae fo‘i lona malosi e mitamita ai;

e pau atu i Mekatala e pau mai i Seveni,

e oti ai i latou i le pelu,

na fetalai mai ai le Ali‘i le ATUA.

7E fa‘atafunaina fo‘i i latou fa‘atasi ma nu‘u ‘ua fa‘atafunaina,

e fa‘atasia fo‘i ona ‘a‘ai i ‘a‘ai ‘ua fa‘agaogaoina.

8Latou te iloa ai o a‘u lava o le ALI‘I

pe a ‘ou tu‘uina atu se afi i Aikupito,

pe a momomo fo‘i ‘ona fesoasoani uma.

9O lea aso e ō atu ai a‘u sāvali i va‘a, e fa‘agateteina ai Aitiope fa‘atalanoa, e o‘o fo‘i le mata‘u tele ‘iā te i latou, e pei o le aso o Aikupito; auā fa‘auta, o lo‘o o sau.

10‘Ua fa‘apea ‘ona fetalai mai o le Ali‘i le ATUA:

‘Ou te fa‘aumatia le vao tagata o Aikupito

i le lima o Nepukanesa le tupu o Papelonia.

11E ta‘ita‘iina o ia ma ona tagata e fa‘atasi ma ia,

o ē ‘ua mata‘utia i nu‘u, e fa‘aumatia ai le nu‘u;

latou te tō a‘e a latou pelu i Aikupito

ma fa‘atumuina le nu‘u i le fasi.

12‘Ou te fa‘amamate i vaitafe,

‘ou te fa‘atauina atu fo‘i le nu‘u i lima o tagata amio leaga

ma ‘ou fa‘atafunaina i lima o tagata ‘ese

le nu‘u ma mea ‘ua tumu ai;

o a‘u o le ALI‘I ‘ua ‘ou fai atu ai.

13O lo‘o fa‘apea ‘ona fetalai mai o le Ali‘i le ATUA:

‘Ou te fa‘aumatia tupua, ‘ou te fa‘ai‘uina lava tupua ai Nafi;

e lē toe ai fo‘i se ali‘i o le nu‘u o Aikupito;

‘ou te fa‘atupuina fo‘i le mata‘u i le nu‘u o Aikupito.

14‘Ou te fa‘atafunaina fo‘i Patoro

ma ‘ou tu‘uina atu le afi i Soana

ma fa‘ao‘o sala i No.

15‘Ou te sasa‘aina atu fo‘i lo‘u ita tele i luga o Sina, le malosi o Aikupito; ‘ou te fa‘aumatia fo‘i le vao tagata o No.

16‘Ou te tu‘u atu fo‘i le afi i Aikupito;

e fa‘atigāteleina Sina.

E lepetia No,

e puapuagātia fo‘i Nafi i aso fai so‘o.

17O taulele‘a o Avane ma Pepeseta e oti i latou i le pelu;

e tāfea fo‘i ia nu‘u.

18E fa‘apouliuligia fo‘i le ao i Tapenesa,

pe a ‘ou gausia amo a Aikupito i lea mea,

e fa‘ai‘uina fo‘i lona malosi e mitamita ai;

e ufitia ia i le ao, o ana tama, fafine fo‘i e tāfea i latou.

19‘Ou te fa‘ao‘o lava le sala i Aikupito;

‘ona latou iloa ai lea o a‘u lava o le ALI‘I.

‘Ua Fa‘ato‘ilaloina le Malosi o le Tupu o Aikupito

20O lona tausaga e sefulu ma le tasi, o le masina muamua, o le aso e fitu o le masina, na o‘o mai ai le afioga a le ALI‘I ‘iā te a‘u, ‘ua fa‘apea mai: