Salāmo 6 - Revised Samoan Catholic Bible

O le Tagi a Tavita i Lona Tigā; o lona Fa‘atuatua i le ALI‘IMa le usu pese i nekina i le seminita. O le salāmo a Tavita

1Le ALI‘I e,

‘aua ‘e te a‘oa‘i mai ‘iā te a‘u i lou to‘asā;

‘aua fo‘i ‘e te sasa ‘iā te a‘u i lou to‘asā tele.

2Le ALI‘I e,

‘ia e alofa mai ‘iā te a‘u,

auā ‘ua vaivai lava a‘u;

le ALI‘I e, ‘ia e fa‘amālōlō mai ‘iā te a‘u,

auā ‘ua tetemū lava o‘u ivi.

3‘Ua matuā polepole vale fo‘i lo‘u loto;

a o oe le ALI‘I e, se‘ia afea?

4Le ALI‘I e,

‘ia e toe fo‘i mai,

‘ia e lavea‘i i lo‘u agaga;

‘ia e fa‘aola mai ‘iā te a‘u ‘ona o lou alofa.

5Auā e leai se manatu ‘iā te oe i le oti;

o ai ‘ea se vivi‘i atu ‘iā te oe i le tu‘ugamau?

6‘Ua ‘ou lailoa i lo‘u ōi;

‘ua lofia lo‘u moega i po uma lava;

‘ua se vai le mea ‘ou te moe ai i o‘u loimata.

7‘Ua fole o‘u mata i lo‘u tigā;

‘ua matatoeaina lava,

‘ona o i latou uma o ē sauā mai ‘iā te a‘u.

8‘Inā ō ‘ese atu ia ‘iā te a‘u,

o ‘outou uma o ē fai amio leaga;

auā ‘ua fa‘afofogaina e le ALI‘I le leo o lo‘u tagi.

9‘Ua fa‘afofogaina e le ALI‘I la‘u ‘ai‘oi atu;

‘ua talia e le ALI‘I la‘u tatalo.

10E mamā ma matuā gatete lava i latou uma o ē fai a‘u mo latou fili;

‘e toe fo‘i i latou, e fa‘afuase‘i lava lo latou ma.