1‘Ua iloa e Rasela e le‘i fānau o ia ‘iā Iakopo, ‘ona matau‘a lea o Rasela i lona uso, ‘ua fai mai ai ‘iā Iakopo, “‘Aumai ia ni tama ‘iā te a‘u, a leai ‘ona ‘ou oti ai lea.”
2‘Ona ita tele ai lea o Iakopo ‘iā Rasela, ‘ua na fai atu ai, “O a‘u ‘ea le sui o le Atua, o lē ‘ua lē avatu ‘iā te oe ni fānau?”
3‘Ona fai mai ai lea o ia, “Fa‘auta, o la‘u ‘au‘auna o Pila, ‘ia e alu atu ‘iā te ia, ‘ona ‘ou fai tama ai lea ‘iā te ia, ‘ia ‘ou maua ni fānau mai ‘iā te ia.”
4‘Ona ‘aumai ai lea e ia o lana ‘au‘auna fafine o Pila ‘iā te ia e fai māna avā, ‘ona alu atu ai lea o Iakopo ‘iā te ia.
5‘Ona tō ai lea o Pila, ‘ua fānau ai ‘iā Iakopo le tama tane.
6‘Ona fa‘apea lea o Rasela, “‘Ua fa‘amasinoina a‘u e le Atua,” ‘ua ia fa‘afofoga mai fo‘i i lo‘u leo ma na ‘aumai ‘iā te a‘u le tama tane, o le mea lea ‘ua ia fa‘aigoa ai ‘iā te ia o Tanu.
7‘Ua toe tō fo‘i Pila le ‘au‘auna a Rasela, ‘ua fānau ai ‘iā Iakopo lona to‘alua o tama tane.
8‘Ona fa‘apea lea o Rasela, “O fagatuaga tetele ‘ua ‘ou fagatua ai ma lo‘u uso, ‘ua ‘ou manumālō ai fo‘i;” ‘ua ia fa‘aigoa ai fo‘i ‘iā te ia o Nafatali.
9‘Ua iloa e Lea ‘ua pā o ia, ‘ona ‘ave ai lea e ia o Selepa lana ‘au‘auna, ‘ua avatu ‘iā Iakopo e fai ma ana avā.
12‘Ua toe fānau fo‘i e Selepa le ‘au‘auna a Lea lona to‘alua o tama tane ‘iā Iakopo.
13‘Ona fa‘apea lea o Lea, “‘Ua ‘ou fiafia auā e fa‘a‘amu‘ia mai fafine ‘iā te a‘u;” ‘ua na fa‘aigoa ai ‘iā te ia o Asera.
14O ona po e selesele ai saito na alu atu ai Reupena, ‘ua maua fo‘i tutaima i le vao, ‘ua ‘aumai ai i lona tinā o Lea. ‘Ona fai atu ai lea o Rasela ‘iā Lea, “Se‘i ‘aumai ‘iā te a‘u nai tutaima a lau tama.”
15‘Ona fai mai ai lea o ia ‘iā te ia, “Se mea mamā ‘ea ‘ina ‘ua e fao la‘u tane? A ē fao ‘ea fo‘i ma tutaima a la‘u tama?”
‘Ona fai atu ai lea o Rasela, “O lea fo‘i, lua te momoe ai ma ia i le po nanei, ‘ona o tutaima a lau tama.”
16‘Ua sau Iakopo ai le vao i le afiafi, ‘ona alu atu ai lea o Lea e fa‘afetaia‘i ‘iā te ia, ‘ua fa‘apea atu, “‘E te alu ane ‘iā te a‘u, auā ‘ua ‘ou fa‘atauina lava oe i tutaima a la‘u tama.” ‘Ona la momoe ai lea ma ia i lea po.
17‘Ua fa‘afofoga le Atua ‘iā Lea, ‘ona tō ai lea o ia, ‘ua fānau e ia ‘iā Iakopo le tama tane o lona to‘alima lea.
18‘Ona fa‘apea lea o Lea, “‘Ua foa‘i mai e le Atua lo‘u taui, auā na ‘ou avatu la‘u ‘au‘auna i la‘u tane;” ‘ua na fa‘aigoa ai ‘iā te ia o Isakara.
19‘Ua toe tō fo‘i Lea, ‘ua fānau ai le tama tane ‘iā Iakopo, o le to‘aono lea.
20‘Ona fa‘apea lea o Lea, “‘Ua foa‘iina mai e le Atua ‘iā te a‘u le ‘oloa lelei; o lenei, o le a talia a‘u e la‘u tane auā ‘ua ‘ou fānau tama tane e to‘aono ‘iā te ia;” ‘ua na fa‘aigoa ai ‘iā te ia o Sepulona.
21‘Ua muli ai fānau e ia se tama teine, ‘ua fa‘aigoa ‘iā te ia o Tina.
22‘Ua manatua fo‘i Rasela e le Atua, ‘ua fa‘afofoga le Atua ‘iā te ia ‘ua fa‘afānauina ia.
23‘Ona tō ai lea o ia ‘ua fānau le tama tane, ‘ua fa‘apea ai, “‘Ua ‘ave‘eseina e le Atua i lo‘u luma.”
24‘Ua na fa‘aigoa ‘iā te ia o Iosefa, ‘ua fa‘apea, “E fa‘aopoopo mai e le ALI‘I ‘iā te a‘u se tasi tama tane.”
O le Finauga a Iakopo ma Lapana25‘Ua fānau e Rasela o Iosefa ‘ona fai atu ai lea o Iakopo ‘iā Lapana, “Tu‘u mai ia o a‘u, ‘ina ‘ia ‘ou alu i lo‘u nu‘u ma lo‘u lau‘ele‘ele.
26Tu‘u mai ia o a‘u avā ma a‘u fānau, sa ‘ou ‘au‘auna ai ‘iā te oe, a ‘ou alu; auā ‘ua e iloa la‘u galuega ‘ua ‘ou ‘au‘auna ai ‘iā te oe.”
27‘Ona fai mai ai lea o Lapana ‘iā te ia, “‘Āfai ‘e te alofa ‘iā te a‘u, ‘ia e nofo mai pea, auā ‘ua ‘ou matuā iloa ‘ua fa‘amanuia mai a‘u e le ALI‘I ‘ona o oe.”
28‘Ua fa‘apea mai fo‘i o ia, “‘Ia e ta‘utino mai ‘iā te a‘u sou totogi; ‘ou te avatua lava ‘iā te oe.”
29‘Ona fai atu ai lea o ia ‘iā te ia:
“‘Ua e iloa le uiga o la‘u ‘au‘auna atu ‘iā te oe, ma au mea ‘ua ‘iā te a‘u.
Who We AreWhat We EelieveWhat We Do
2025 by iamachristian.org,Inc All rights reserved.
