Baruch 5 - Revised Samoan Catholic Bible

O le Manuia o Isaraelu pe a Toe Fo‘i mai i lona Atua

1Tō‘ese ia, Ierusalema e, o le ‘ofu o lou fa‘anoanoa ma lou puapuagā,

‘ia e fa‘a‘ofu i le mamalu ma le matagofie o le vi‘iga e fa‘avavau ‘ua ‘iā te oe mai le Atua.

2E fa‘a‘ofuina oe e le Atua i le ‘ofu pulupulu o le amiotonu,

na te fa‘ae‘e i lou ulu le pulou o le vi‘iga tumau.

3Auā e fa‘aali lava e le Atua lona mamalu i totonu ‘iā te oe, i tagata uma ‘ua i le lalolagi.

4Auā e fa‘aigoaina oe e le Atua i lou igoa e fa‘avavau,

“O le manuia o le amiotonu, o le mamalu o le amio Atua.”

5‘Ia e tula‘i, Ierusalema e, ‘ia e tu i luga;

‘ia e tepa atu i le itū i sasa‘e,

‘ia e va‘ava‘ai atu i lau fānau ‘ua fa‘apotopoto mai i le itū e oso a‘e ai le lā e o‘o i le itū e goto ifo ai,

i le fetalaiga a lē ‘ua pa‘ia, e ‘oli‘oli i latou ‘ona ‘ua manatua i latou e le Atua.

6Auā na latou ō ‘ese ‘iā te oe o sāvavali, o ta‘ita‘iina e o latou fili;

‘ae toe molia mai i latou e le Ali‘i ‘iā te oe,

o ti‘eti‘e ma le mamalu i latou e pei o alo o tupu.

7Auā ‘ua tonu i le Atua e fa‘amaulalo o mauga maualuga uma ma mea maupu‘epu‘e o le vavau;

na te fa‘atumu o vaimauga ‘ia ‘avea ma lau‘ele‘ele laulelei,

‘ina ‘ia savali ai o Isaraelu ma le saogalemū mo le mamalu o le Atua.

8O togāvao fo‘i ma la‘au manogi uma e fa‘apaoloina ai o Isaraelu i le poloa‘iga a le Atua.

9Auā e toe fa‘afoisia o Isaraelu e le Atua ma le fiafia,

i le malamalama o lona ia mamalu,

i le agaalofa ma le amiotonu e pogai lava ‘iā te ia.