Filipi Fa‘atomuaga - Revised Samoan Catholic Bible

Fa‘atomuagaO le Tusi a Paulo ‘iā Filipi o le ‘a‘ai e tu i matū i sasa‘e o Maketonia, o le kolone o Roma, lea sa tala‘i atu i ai e Paulo le Tala Lelei. Sa tusia e Paulo lenei tusi a o fale puipui o ia ‘ona o le tete‘e o nisi o tagata ‘iā te ia. Sa le fiafia Paulo ‘ona sa tala‘iina atu e nisi ni fa‘aa‘oa‘oga sesē e fa‘asagatau atu ai i le Tala Lelei ‘iā Iesu Keriso. Sa fautuaina e le ‘aposetolo le Ekalesia e ao ‘ona tete‘e malosi atu i nei a‘oa‘oga sesē ma nei tagata tau fa‘aleaga, ‘ae maise lo latou fa‘asagatau i le koluse o Keriso. (3.2-3, 18-19) O le tusi a Paulo sa toe fa‘amautūina ai le fa‘atuatua moni o tagata o le Ekalesia i Filipi ‘ona o lona fa‘atuatua sa maua‘a ‘iā Keriso.O nisi o mafua‘aga sa tusia ai lenei tusi, o le fa‘afetai a Paulo i le Ekalesia i Filipi ‘ona o mea alofa sa foa‘iina atu e le Ekalesia ‘iā te ia e fesoasoani atu ai i ona puapuagā. Sa fa‘aaogāina e Paulo lenei avanoa lelei e fa‘asoa atu ai lona fa‘atuatua ma fa‘amalosi‘au ai i tagata fa‘atuatua ‘ina ‘ia latou tūtūmau ‘iā Keriso. Sa talosagaina e le ‘aposetolo i latou ‘ia ola i le loto gatasi ‘ae lē o le fevaevaea‘i ma le fia sili. Sa toe fautuaina e ia le Ekalesia o le ola ‘iā Keriso o le mea alofa tunoa lea a le Atua, ‘ae lē o lē usita‘i i le tulafono fa‘a-Iutaia.O le tusi e tele lava i fa‘a‘upuga o le fiafia, loto gatasitasi, fealofani ma le fa‘amausalīina o le fa‘atuatua fa‘a-Kerisiano ma le ola. E fa‘ailoa mai ai le alofa ma le naunauta‘i o Paulo i le Ekalesia i Filipi.O le to‘atele o tagata popoto i le ‘upu a le Atua, o le tusi lenei sa tusia i le vā o le tausaga 56-57 i le vaitaimi lava o le Ali‘i (Anno Domini)O le Fa‘asologa o Matā‘upu:‘Upu fa‘afeiloa‘i 1.1-11O fa‘anaunauga a Paulo 1.12-26O le ola ‘iā Keriso 1.27—2.18O fuafuaga a Paulo ‘iā Timoteo ma Epaferoti 2.19-30O lapata‘iga ‘ina ‘ia fa‘asagatau atu i le fili 3.1—4.9O Paulo ma ana uō i Filipi 4.10-20O ‘upu mulimuli 4.21-23