Isaia 53 - Revised Samoan Catholic Bible

O le Puapuagā o le Mesia

1O ai ‘ea ‘ua talitonu i la matou ‘upu e taulogologo atu;

‘ua fa‘aalia ‘iā te ai le ‘a‘ao o le ALI‘I?

2Na tupu a‘e o ia e pei o se tātupu i ona luma,

e pei o le pogai i le nu‘u naumati;

e lē ‘aulelei pe lālelei o ia;

A tatou va‘ava‘ai ‘iā te ia e leai sona matagofie,

‘ina ‘ia tatou manana‘o ai ‘iā te ia.

3‘Ua ‘inosia ma tu‘ulafoa‘iina o ia e tagata;

o le tagata fa‘anoanoa,

‘ua masani fo‘i ma le tigā.

E peiseaī ‘ua ‘alo ‘ese mata ‘iā te ia;

‘ua ‘inosia o ia ma ‘ua tatou lē manatua lava o ia.

4E moni, ‘ua na tau‘ave o tatou tigā,

ma na tau‘ave o tatou fa‘anoanoa.

A ‘ua tatou manatu o ia ‘ua taia,

‘ua fasia e le Atua ma ‘ua fa‘atigāina.

5A ‘ua manu‘a o ia ‘ona o a tatou solitulafono,

‘ua momomo o ia ‘ona o a tatou amio leaga.

O le a‘oa‘iga e filemū ai tatou sa i ona luga lea,

o ona fa‘alavalava fo‘i ‘ua mālōlō ai tatou.

6O i tatou uma ‘ua sē i tatou e pei o mamoe,

‘ua ta‘itasi ma fa‘asaga i lona lava ala.

A ‘ua fa‘ao‘o ‘iā te ia e le ALI‘I,

le amio leaga o i tatou uma.

7Na fa‘asauāina o ia, sa tigāina fo‘i o ia,

‘ae lē tautala mai o ia.

E pei o le tama‘i mamoe ‘ua ta‘ita‘iina ‘ia fasia,

e pei o le mamoe fo‘i i luma o ē sele lona fulufulu,

‘ua fa‘alologo ia, o ia fo‘i ‘ua lē tautala mai.

8O le fa‘asauā ma le fa‘amasinoga na ‘ave‘eseina ai o ia;

o ai fo‘i na te talatalaina lana tupulaga?

Auā ‘ua vavae‘eseina o ia i le nu‘u o tagata ola,

na taia o ia ‘ona o le solitulafono a lo‘u nu‘u.

9Na tofia o ia ‘ia fai lona tu‘ugamau fa‘atasi ma ē pagotatā,

‘ae peita‘i sa i le mau‘oa ‘ina ‘ua maliu.

Auā na lē faia e ia se fa‘asauāga,

‘ua leai fo‘i se pepelo i lona fofoga.

10A ‘ua finagalo le ALI‘I e tu‘imomomo ‘iā te ia,

‘ua ia fa‘atigāina o ia.

Pe ‘āfai na te faia se taulaga mo agasala,

‘ona iloa lea e ia o lana fānau,

e fa‘alevalevaina ona aso,

o le finagalo fo‘i o le ALI‘I e manuia lea ‘iā te ia.

11‘Ona o le tigā o lona agaga na te iloa ai lana fānau,

e malie ai o ia;

O le malamalama mai ‘iā te ia,

e ta‘uamiotonuina ai tagata e to‘atele e la‘u ‘au‘auna ‘ua amiotonu;

auā e tau‘ave e ia a latou amio leaga.

12O le mea lea ‘ou te vaevaea ai se vaega mo ia fa‘atasi ma ē ‘ua sili,

e vaea fo‘i le vete fa‘atasi ma ē fitafita,

‘ona ‘ua ia sasa‘a atu o lona ola ‘ia oti.

Na faitauina fo‘i o ia fa‘atasi ma ē pagotatā,

na ia ‘aveina fo‘i le agasala a tagata e to‘atele,

‘ua fautua fo‘i o ia mo ē solitulafono.