APOCALIPSIS 14 - Qullan Arunaka DC

Corderompi, ajllitanakampi

1Ukatsti Corderoruw uñjta, Sión qullu patan sayaskiri. Jupamp chikasti patak pusi tunka pusin waranqa jaqinakaw ukankaskäna, jupanakasti paranakaparux Corderon sutipampi, Awkipan sutipampi qillqt'atäpxänwa.

2Ukatsti alaxpachat mä aru ist'ta, ukasti uma phaxchanakas qhututkaspa, jan ukax, mä qhixu qhixus ist'askaspa ukhamänwa; walja jaqinakas arpanakap jat'intapkaspa ukhamarakïnwa.

3Jupanakasti mä machaq q'uchu q'uchupxäna qhapaq qunuñ nayräxana, uka pusi jakaskirinakan nayraqatapana, ukhamarak uka pä tunka pusin jilïrinakan nayraqatapana. Janiw maynis uka q'uchu yatiqirjamäkänti, jan ukasti patak pusi tunka pusin waranqa jaqinakakiw yatiqapxäna, ukanakasti uraqit irpsuta qhispiyatanakänwa.

4Jupanakasti janiw k'ari diosanakar yupaychas q'añuchasipkataynati, jupanakax taqpachaniw Corderor arkapxäna, kawkirutix jupax sarkän ukaru. Jupanakax jaqinak taypit qhispiyatäpxataynawa, nayrïr churäwi Diosampir Corderompir luqtañataki.

5Janirakiw jupanakan kuna k'arisitapas utjkänti, jupanakax Diosan nayraqatapan jan juchañchkayänwa.

Jaqin Yuqapampi, suxta angelampi

6Ukxarusti yaqha angelaruw alaxpachan tuyunaqaskir uñjta, jupasti wiñay suma yatiyäwi apt'atänwa, uraqin jakir jaqinakar yatiyañataki, taqi markanakaru, kunayman jaqinakaru, kunayman parlan jaqinakar yatiyañatakiraki.

7Jupax wali jach'a arumpiw art'äna: “Diosar axsartapxam, jupar yupaychapxarakim, taripañap urux purinxiwa. Alaxpacha, akapacha luririr yupaychapxam, qutanak luririru, uma jalsunak luririr yupaychapxam” sasa.

8Uka angelarusti yaqha angelarakiw arkäna, akham sasa: “¡Aynacht'xiwa, aynacht'xiwa, jach'a Babiloniaw aynacht'xi, taqpach markanakar jucha lurañanak yatichiri, k'ari diosanakar jaysañ yatichir markax t'unjataw uñjasxi!” sasa.

9Ukxarusti kimsïr yaqha angelarakiw jupanakar arktäna, wali jach'at art'asisa: “Khititix uka jach'a axsarkañ animalar yupaychkani, ukar uñtasit lursutarus yupaychkani, uka axsarkañ animalan chimpupampi amparaparusa, jan ukax, paraparus uchayaskani ukaxa,

10Diosat jutkani uka jach'a mutuyäwi katuqani, q'apisiñapasti wakichatawa; azufrempi ninampi t'aqhisiyataw uñjasini, qullan angelanakampi, Corderompiw mutupxatap uñjapxani.

11T'aqhisiykani uka ninan jiwq'ipasti wiñayapuniw jiwq'ini, uka jach'a axsarkañ animalar yupaychirinakampi, ukar uñtasit lursutar yupaychirinakampi, amparaparus, paraparus uka animalan sutipampi chimpt'ayasirinakax, wiñayaw t'aqhisipxani, janirakiw urus arumas samarañ jikxatapkaniti” sasa.

12¡Taqi akanakan yatisini, Diosan qullan markapan ch'amanïtapasa, kamachi arunakapar phuqhirinakan ch'amanïtapasa, Jesucristor iyawsañanïtapasa!

13Ukapachaw mä aru ist'ta, alaxpachat art'asisinkiri: “Aka arunak qillqantam: ‘Khitinakatix akat uksar Tatitur iyawsas jiwapki ukanakax kusisiñanïpxiwa’ ” sasa.

Diosan Ajayupax siwa: “Ukhamawa,” jupanakax taqi t'aqhisiñanakapata, jan walt'añanakapat samarxapxani, Diosasti jupanakar taqi aski luratanakapat waxt'äwip churani” sasa.

14Ukatsti uñtasin mä janq'u qinay uñjta, uka qinayxansti mayniw qunt'atäskäna, jupasti Jaqin Yuqapar uñtatänwa. P'iqiparux quri pillumpi asxatatänwa, amparaparusti yawiñ ayt'atarakïnwa, uka yawiñasti wali arïnwa.

15Ukatsti Tatitun utapat yaqha angelaw mistunïna, ukat uka qinay patan qunt'atäkis uka angelar jach'at art'äna: “¡Yawiñamampi yawthapiñ qalltam, apthapiñ urüxiwa, yapusti q'illuratäxiwa!” sasa.

16Ukspachaw qinay patan qunt'atäkän ukax, yawiñapampi yapunak apthapi aka uraqina.

17Ukatsti yaqha angelarakiw Tatitun utapat mistunïna, jupasti mä ari yawiñ ayt'atänwa.

18Yaqha angelasti altarat mistunirakïna. Uka angelasti ninar apnaqañatak munañanïnwa, ukatsti ari yawiñ ayt'atäkänsa uka angelaruw jach'at art'äna: “¡Uka ari yawiñamampi yawirañ qalltam! ¡Uraqin utjir uva yapunakat uva achunak apthapim, uvasti puquratäxiwa!” sasa.

19Angelasti yawiñapampiw uraqin utjir uva yapunakan achunakap yawthapïna, ukatsti mä jach'a uchañaruw warantäna, ch'irwsutäñapataki, ukasti Diosan mutuyäwipax ukhamäniwa sañ muni.

20Uka uvanakasti marka anqäxan ch'irwsutänwa, uva uchañatsti wilax waljapuniw mistunïna, kimsa metro chikatankam makhatasa, kimsa patak kilómetro ukch'ar llumitatasa.