2 SAMUEL 20 - Qullan Arunaka DC

Sebá chachan Davidatak sayt'asitapa

1Benjamín ayllun mayni qhuru jaqiw utjäna, Sebá sata, Bicrí jaqin yuqapänwa, jupasti Guilgal markan jikxatasïna. Uka Sebá jaqisti markachirinakaruw sayt'asiñatak amtayäna, akham sasa: “¡Jiwasan janiw Davidampi kuna lurañasas utjkiti! ¡Israelit jaqinaka, utanakamar kuttxapxam!” sasa.

2Uk ist'asasti, israelita jaqinakax Davidar apanukuwayasin Sebá jaqiruw arkapxäna. Ukat sipan, Judá uraqinkirinakax taqi chuymaw David reyipar arkapxarakïna, Jordán jawirata, Jerusalén markakama.

3Kunapachatix Davidax Jerusalenan utjir reyi utapar purkän ukapachasti, reyi uta uñjapxañapatak jaytawaykatayna uka tunka uñt'at warminakaparux, mä utaruw irpantayäna, ukarusti uñch'ukirinak ucharakïna. Davidax ukan jupanakarux uñjayaskäna, ukampis janiw maynirus warmiskänti. Ukhamaw jupanakax ukan jist'antatäpxäna, ijma warminakjamarakiw jiwañ urunakapkam jakapxäna.

4Uka qhipatsti reyix Amasá jaqiruw säna:

—Judá uraqinkir jaqinakar jawsayam, ukatsti, akat kimsa ururuw jupanakamp akar uñstanïta —sasa.

5Amasá jaqisti jaqinakar tantacht'iriw saräna, ukampis qawqha urutix jupar satäkän ukat juk'amp qhiparxatayna.

6Ukat Davidax Abisai jaqir säna:

—Sebá jaqix Absalonat sipansa juk'ampi jan walinak luristani. Ukhamasti jichhpach jumax soldadonakaxan jilïripat sayt'asin jupar arktam, inampis jupax pirqanakan muyuntayat markanakan imantasisin jiwasat jaltxchispa —sasa.

7Abisai jaqisti Jerusalén markat mistuwayasin Sebá chachar arktiriw saräna, Joab chachan jaqinakapampi, ukhamaraki cereteo, peleteo jaqinakampi, reyin utap uñjirinakampi, jan axsarir jaqinakamp chika.

8Kunapachatix Gabaón chiqan utjir jach'a qarqa jak'ar purisipkän ukkhaw Amasá jaqix jupanakar jikxatäna. Joab jaqix nuwasiñ isipampi isthapitänwa, wak'apansti mä espada warkt'atänwa, uka espadasti imañapat jasak aynach tuqir jiyt'as apsuñakïnwa.

9Joab jaqisti Amasá jaqirux kupi amparapampiw jamp'att'añatak sunkhapat waythapïna, ukat jiskt'arakïna:

—¿Jilata, walikïsktati? —sasa.

10Amasá jaqisti janiw amuyaskänti, Joab jaqin maysa amparapan espada ayt'atätapxa. Ukatsti akatjamat Joab jaqix uka espadampi Amasá jaqir purakapat chhuqhuntäna, jiphillanakapasti uraqiruw qutstäna, Amasá jaqisti ukspachaw jiwt'awayxäna. Uka qhipatsti Joab jaqimpi, Abisai jilapampix, Bicrí jaqin Sebá yuqapar arktasipkakïnwa.

11Ukatsti Joab jaqin soldadonakapat mayniw Amasá jaqin jiwat janchip jak'ar sayt'asisin säna:

—¡Khititix Joab chachampïki, Davidampïki ukanakax Joab chachar arkpan! —sasa.

12Ukampis Amasá jaqix chika thakhinkaskakïnwa, pachpa wilapar qurumsusa; mayni soldadosti jaqinakar uka chiqan uñch'ukiñatak sayt'apxatap uñjasinxa, Amasá jaqin janchip thakhi thiyaruw jitt'ayxäna, ukatsti mä isimpiw janxatarakïna, jupasti amuyarakïnwa taqi khitinakatix purinipkän ukanakan uka jak'aruk sayarapxatapa.

13Amasá jaqin janchip thakhit maysar jittayxatatsti, Joab chachar arkirinakax taqiniw uka chiqa sarakipapxäna Sebá jaqir arktasa.

14Ukchañkamasti, Sebá jaqix taqi israelit ayllunak chiqaw sarawayäna, Abel-bet-maacá markar puriñkama, ukansti Bicrí jaqin wila masinakapax tantacht'asisin jupan qhipap markar mantawayapxäna.

15Kunapachatix Joab chachan jaqinakapax Abel-bet-maacá markar puripkän ukkhasti, uka markar mantañatakix anqa pirqa jak'aruw mä makhatañ lurapxäna, markar katuntañataki, ukatsti taqpachaniw markar uyuchrantat pirqxa tinkuyañ yant'apxäna.

16Ukatsti, akatjamat sallqantir ch'ikhi warmix marka pirqa patat art'asinïna:

—¡Ist'apxita, ist'apxita, Joab chachar sapxam, aka pirqar jak'achasinpan, nayax jupampiw parlañ munta! —sasa.

17Ukatsti Joab chachax pirqar jak'achaskipan, warmix jupar jiskt'äna:

—¿Jumätati Joab chachaxa? —sasa.

—Jïsa, nayätwa —sasaw Joab chachax säna.

Warmisti sarakïnwa:

—Juman uywataman arunakap ist'amaya —sasa.

Joab chachasti ukxaruw sarakïna:

—Ist'ämawa —sasa.

18Warmisti saskakïnwa:

—Nayrapachanakan mä säwiw utjäna: “Khititix mä kunsa yatiñ munki ukaxa, Abel markar jiskt'pan” sasa, ukhamat taqi kunas askichasirakirïna.

19Nanakan markaxax janiw nuwasiñ munir markäkiti, ukhamarus Israel uraqin chiqap markawa, markanak taypinsti ¡mä jach'a markarakiwa! Ukampis jumax tukjañ munasktaxa. ¿Kunatarak jumasti Tatitunkki ukanak t'unjañ muntasti? —sasa.

20Joab chachasti ukxaruw säna:

—¡Janiw nanakax uk amtapkti! Janiw nayan amtañaxax aka marka t'unjasin apanukuñäkiti.

21Janiw nayax uk lurir jutkti, Efraín qullunak tuqinkir Sebá sat mä jaqiw David reyitak sayt'asi. Jichhax uka jaqiruki katuyapxita, ukat nayax aka markat sarawayxäwa —sasa.

Warmisti Joab chacharux sarakïnwa:

—Ukhamächi ukaxa, jichhpachaw Sebá chachan p'iqip nanakax pirqa patatpach liwt'anipxäma —sasa.

22Ukatsti ukspachaw warmix jalasin taqpach markachirinakar wali ch'ikhi kankañapamp amtayäna, Sebá jaqin p'iqip apaqañataki, ukat Sebá jaqin p'iqip apaqasinxa, Joab chacharuw uka p'iqi pirqa patatpach liwt'anxapxäna. Ukat Joab chachax trompeta phust'ayarakïna, soldadonakasti taqiniw uka markat jithiqtawayxäna, sapa maynis utaparkamaw sarxapxäna. Joab chachasti Jerusalén markaruw reyimp parlir kuttxäna.

Davidan yanapirinakapa(2 S 8.15-18; 1 Cr 18.14-17)

23Ukhamaw Joab chachax Israel markan taqpach ejercitopan jach'a jilïripat sayt'äna. Joiadá jaqin Benaías yuqapasti, cereteo, peleteo jaqinakan jilïriparakïnwa.

24Adoram sat jaqisti, ch'ama lurañanaka irnaqir jaqinakar uñjañatak uskutänwa, Ahilud jaqin Josafat yuqapasti reyin qillqiripänwa.

25Sevá jaqisti taqi kunanakatix luraskän ukanak qillqirïnwa; Sadoc, Abiatar jaqinakasti sacerdotenakäpxänwa.

26Jair markankir Irá sat jaqisti Davidan sacerdoteparakïnwa.