JEREMÍAS 14 - Qullan Arunaka DC

Jach'a waña pacha

1Mä jach'a waña maranak utjatapatsti, Tatitux Jeremiasaruw parläna, akham sasa:

2“Judá markax llakisiñat jachi,

markanakapasti llakt'atkamakiwa,

jaqinakapas uraqir liwirtatkamakiwa;

Jerusalenansti taqiniw wal jachapxi.

3Qamirinakax uywatanakaparuw

um aptir khithapxi;

uywatanakasti uma phujunakaruw sarapxi,

ukampis janiw um jikxatapkiti,

ch'usa wakullanak apt'atakiw kutt'anxapxi;

mayjt'ata, p'inqachjataw

p'iqinakapsa imxatasipxi.

4Pampa tuqin utjirinakax

mayjt'ataw uñjasipxi,

jallun jan puritapata,

uraqin q'ala wañsutätapatxa,

p'iqinakapak imxatasipxi.

5Pampankir tarujanakasa,

manq'añatak chhuxllan jan utjatapatxa,

jichha wawachat qallunakapsa apanukuwayxapxiwa.

6Monte asnonakasti,

wasar qullu patanakan sayarasaxa,

qamaqinakar uñtataw mukt'apxi;

ukampis manq'atjamaw thayarapxi

chhuxllanakan jan utjatap layku.”

Jeremías profetax markankirinakan sutipxaruw Tatitur mayi

7¡Tatay, jan wali luratanakaxas

nanakar juchañchapkchitu ukasa,

sutim laykusay nanakat arxatt'asipxita!

Walja kutiw nanakax jan jumatakjam sarnaqapkti,

juma nayraqatan jucha lurapxarakta.

8Israelan suyt'äwipa,

jan walt'añanakan nanakar qhispiyiri,

¿kunatsa nanakatakix mä jaya jaqïkasmas ukham tukta,

thakhi sarir jaqix mä jayp'uki ikt'awayi ukhama?

9¿Kunatsa mä luqhirat jaqjam tukta,

ch'axwan nuwasir jaqir uñtat jan yanapt'asa?

Ukampis Tatay, jumax nanak taypinkasktawa,

nanakan juman markamätax taqiniw yatipxaraki;

¡janikiy nanakar apanukt'asipxistati!

10Tatitux akham siw Israel markatxa: “Aka markax maysat maysar sarnaqañpun muni. Ukat nayax juparux jan taqi chuyma uñtkti. Jichhax juchanakapat amtasaw jupanakarux mutuyarakï.”

11Tatitusti sarakituwa: “Jan aka markan askinkañapatak mayistati.

12Qawqhas ayunasipkpan, janiw mayisitanakap ist'käti; qawqhas wilañchanaka, grano waxt'äwinakap apasinipkpan, janiw ukxa taqi chuymampi katuqkäti. Nuwasiñampi, mach'ampi, kunayman usunakampiw jupanakarux tukjarakï.”

13Nayasti ukxarux saraktwa: “Tatay, profetanakax jaqinakarux janiw nuwasiñasa, mach'as utjkaniti sasipkiwa, juma, Tatituw suman jakasiñ akawjan churani sasipkarakiwa.”

14Ukatsti Tatitux sarakituwa: “Uktix profetanakax nayan sutixar sasipkchixa, ukham parlatanakapampix k'arisipxiwa. Janiw nayax jupanakarux khithankti, janiw ukham sapxañapatakis maykarakkti, janirakiw jupanakarux kunsa siskaraktti. Ukanakax k'ari yatiyäwinakawa, k'ari uñjäwinakak parlapxaraki, jupanakan amtatanakapar parlapxatapakiwa. Ukanakpï uka profetanakax yatiyapxtamxa.

15Naya, Tatitusti saraktwa: Uka profetanakaruxa, khitinakatix nayan sutixar jan nayan khitkat parlapki, aka markan janiw nuwasiñax utjkaniti sapxaraki ukanakarux sistwa: Uka profetanakax manq'atjamaw jiwarapxani, jan ukax nuwasïwin tukusipxani.

16Janiw jupanakakit jiwarapkani, jan ukasti, kawkïr markarutix uka yatiyäwinak yatiyapki ukankirinakas manq'atjam nuwasïwin jiwarapxarakini, warminakapampi, wawanakapampi kuna. Jiwat janchinakapasti Jerusalén marka thakhinakan jaqtatäniwa, janirakiw jupanakarux khiti imt'iris utjkaniti. Ukhamat juchap uñt'asiyä.

17Jupanakarusti sarakim:

‘Nayranakaxatxa,

jachanakax uruy aruma

jan t'akt'as warasitpan,

markaxan aynacht'atap layku,

jach'a chhuxrip layku.

18Pamparuw mistta,

ukansti nuwasïwin jiwaririnakan janchipak uñjta,

markaruw mantanta,

ukansti manq'atjam jiwaraskir jaqinakarukiw uñjarakta.

Profetanakasa sacerdotenakasa,

jan uñt'at jaya markanakaruw sarxapxaraki.’ ”

Jeremías profetax Tatitumpiw parli

19Tatay, ¿Judá markarux q'alpunti apanukxta?

¿Jerusalén markampisa qaritäxaraktati?

¿Kunatarak ukham jan qullkañ chhuxriñchjapxistasti?

Nanakax sum sarnaqañ suyt'asipkäyäta,

ukampis jan walt'añakiw purinirapipxitu.

K'umar sarnaqasiñ suyt'apxäyäta,

ukampis jichhax axsarañakiw utjxi.

20Tatay, nanakax juchanakax uñt'asipxtwa,

nayra awkinakaxan juchapsa uñt'apxaraktwa;

juma nayraqatan jucha lurapxta.

21¡Sutiman jach'ätap laykukisay

nanakat khuyapt'ayasipxita;

kawkha markankkitix suma k'ajkir qunuñamaxa,

uka markarux janikiy jisk'achañampi uñjamti!

¡Kuna arust'äwtix jumax nanakampi lurkta uk amtt'asikimaya,

janikiy uka arust'äwir phuqhañ armt'asimti!

22¿Uka k'ari diosanak taypin utjiti mayni jallu puriyirixa?

¿Alaxpachasti jupapachakiti jallu puriyanixa?

¡Janiwa, nanakan Dios Tatituxay!

Jumaw jallxa apayanta,

jumaw taqi ukanak lurta;

¡ukat jumaruki suyt'apxsma!