JUECES 17 - Qullan Arunaka DC

III. PÄ YAPXATAT ARUNAKA1. Danita sat jaqinakan yaqha markar sarxatapampita, yupaychañ uta utt'ayatampita(17—18)Micaías chachan yupaychañ utapa

1Efraín sata qullunakan mä jaqiw jakäna Micaías sutini,

2-3jupasti mä urux taykaparuw säna:

—Waranqa patakan qullqi lunthatktam uka lunthatar ñanqhachir ist'sma. Nayätwa jumaru uka qullqi lunthatirixa; nayaw katuskta, jichhasti kuttayxämawa, Tatitutak yaqhachatam ist'ta, qullqimpi jawikipat mä ídolo lurayañataki.

Ukat uka qullqi kuttayxäna. Taykapasti sänwa:

—¡Munat wawaxay, Tatituy jumar aski waxt'äwip churpan! —sasa.

4Micaiasax taykapar qullqi kutkatayxatapatsti, jupax qullqi yänak lurir jaqiruw uka pä patak qullqi churäna, qullqimpi jawikipat mä ídolo lurañapataki, lurayasinsti, Micaiasan utaparuw uka ídolo uchäna.

5Micaías chachan utapansti mä chiqaw utjäna yupaychañataki. Jupax efod sat isi lurasïna, ukhamaraki utapankirinakan yaqha diosanakapa, ukatsti maynïr yuqaparuw sacerdotet utt'ayäna.

6Uka urunakansti Israelan reyipax janiw utjkänti, uka laykusti sapa mayniw munañapak lurasipxäna.

7Uka urunakansti, Judá uraqinkir Belén markan mä jayankir waynaw utjäna, jupasti Leví ayllunkirïnwa.

8Uka waynasti Belén markat mistusin yaqha chiqar jakiriw sarxäna, Efraín qullunakanjam sarkasasti Micaías chachan utaparuw purïna.

9Micaías chachasti jiskt'änwa:

—¿Kawkitarak juttasti? —sasa.

Waynasti sänwa:

—Belén markat jutta, nayax Leví ayllunkirïtwa, jakañatak mä chiqa thaqhasaw sarnaqta —sasa.

10Micaías chachasti sarakïnwa:

—Ukhamasti akawjan nayampi qhiparaskam, nayan sacerdotexäyätawa, nayan amuyt'ayirixäyätawa. Nayasti jumarux maran tunka qullqi churäma, isinakampi, manq'añamp kuna —sasa.

11Uka levita waynasti iyawsasaw Micaías chachampi jakañataki qhiparäna, jupatakisti wawapäkaspas ukhamänwa.

12Micaías chachax jupan sacerdotepat utt'ayäna, jupasti ukawjan jakiriw qhiparäna.

13Ukhamasti Micaías chachax, mä levita sacerdotënisax Tatitux jupar jilarkir yänaksa utjayarapkaspa ukham amuyäna.