PROVERBIOS 7 - Qullan Arunaka DC

Jan wali sarnaqir warmin luräwinakapa

1Munat wawaxay, arunakaxarux ist'akimaya;

iwxa arunakax chuymamarupun imam.

2Iwxa arunakaxampiru, yatichäwinakaxampir ist'amaya;

nayranakaman qalaparjamay suma munat imasim, ukatsti jakätawa.

3Ampar luk'anamar chinkatasim jan armasiñamataki,

chuymaman sum katxäsim.

4Yatiñ kankañarusti kullakamarjam uñt'asim.

Ch'ikhi kankañarux jilat masimarjam munasirakim.

5Uka yatiñ kankañampi, ch'ikhi kankañampiw

jan wali warmit qhispiyätam,

iyawsayir muxsa arunakapatsa jark'aqarakïtam.

6Mä urusti nayax

ventanaxan rejanakap taypit uñch'ukiskäyäta,

7jan amuyt'asir walja waynanakaru,

uka waynanak taypinsti,

mayni jan amuyt'asir waynaruw uñjta.

8Jupasti marka thakhi thiyar purisinxa,

maykataruw makhati, uka warmin utap tuqiruw sari.

9Niya jayp'untxänwa,

ch'amakt'xarakïnwa.

10Ukapachaw uka warmix jupar jikxatir mistuni,

jan wali sarnaqir warmjam isthapita,

sallqa chuymani,

11jupasti parlañatakix jan axsariri, jan p'inqasiriwa,

janirakiw utapansa acht'kiti,

12jupax marka thakhinakana, plazanakana,

thakhi muytañanakan sarnaqaski,

khititix uka chiqanjam sarakipkani ukar katuntañatak suyxatasa.

13Uka warmisti waynar jikxatasin qhumanti, jamp'att'araki,

ukat jan axsarasaw saraki:

14“Nayax sumankäwi wilañchanak luqtañatakiw arsüyäta,

jichhasti uka arsutax phuqxtwa.

15Ukatarak nayax jumar jikxatir jutsma;

¡nayax walpun uñjañ munäyäsma, jichhasti jikxatsmawa!

16Ikiñax patxarux

Egiptot apanit suma ikiñampiw janxatanta,

17ukatsti mirra, áloe, canela sat

suma q'apkir qullanakampiw uchanirakta.

18Jutamaya, munart'asiñamp machjayasiñäni;

willjtaniñapkam munasiñamp k'uchirt'asiñäni,

19chachaxax janiw utankkiti,

wali jayaruw saraski;

20jupax walja qullqi apt'ataw sari,

chika phaxsiw utar kutt'asinkani” sasa.

21Uka warmisti waynarux suma muxsa arunakampiw iyawsayi,

22waynasti iyaw sasaw uka warmin qhipap sarawayi,

kamisatix mä urqu vacax khariñatak irpatäki ukhama,

kamisatix tarujax sipitampi katuntat uñjaski ukhama,

23juparusti mä mich'iw chuymar mantasin jiwayxi,

kamisatix mä jamach'ix

jakañap jan apt'asiñap yatisisina sipitar jalt'ki ukhama.

24Jichhasti, munat wawaxay ist'itaya;

iwxa arunakaxar isch'ukim.

25Janiy uka warmi layku amuyunakam saranukuyamti;

janirak jupan qhipap sarañ layku chhaqhañar purimti.

26Jupax waljaninakaruw jiwañar puriyi,

¡jiwayatanakapasti waljaniwa!

27Uka warmin utapar sarañ thakhisti,

jiwañar sarañ thakhiwa.