1 REYES 22 - Qullan Arunaka DC

VI. AHAB REYIN MARKA APNAQÄWIPAN TUKUSITAPA(22.1-40)Micaías profetax Ahab reyin aynacht'añap yatiyi(2 Cr 18.1-34)

1Siria markampi, Israel markampix kimsa maraw jan nuwaskxapxänti.

2Ukampis kimsïr maranxa, Judá marka apnaqir Josafat reyix, Israelan Ahab reyipar tumpt'iriw saräna.

3Israelan reyipasti yanapirinakaparux sänwa:

—Jumanakax yatipxtawa, Galaadankir Ramot markax jiwasankiwa. Jiwasanakasti, ¿janit kuns lurksna sirio reyin amparapat apaqasxañatakixa? —sasa.

4Ukatxa Josafat reyiruw jiskt'äna:

—¿Nayampi chika Galaadankir Ramot marka katuntir sarañ munasmati? —sasa.

Josafat reyisti ukxaruw säna:

—Jumampi, nayampix pachpa markankirïtanwa, ejercitoxampi, caballeriaxampix jumampïpxtwa.

5Ukampis janïr kunäkipan Tatitun arup yatiñatak jiskt'am —sasa.

6Ukatsti Israelan reyipax profetanakaruw tantachäna, jupanakasti niya pusi patakanïnwa, ukat jupanakarux jiskt'äna:

—¿Galaadankir Ramot markar katuntir sariristti, janicha? —sasa.

Profetanakasti ukxaruw sapxäna:

—Nuwasir saraskakim, Tatituw uka marka katuyätam —sasa.

7Ukampis Josafat reyix jiskt'änwa:

—¿Janit aka chiqan Tatitun yaqha profetapax utjki, jupar jiskt'añatakiraki? —sasa.

8Israelan reyipasti Josafatar sänwa:

—Mayniw utjaski, jupa tuqiw Tatiturux jiskt'araksna. Jupasti Micaías satawa, Imlá chachan yuqapawa. Ukampis nayax jupar walpun uñista, jupax janipuniw suma yatiyäwinak yatiykituti, jan ukasti jan walinakak yatiyitu —sasa.

Josafat reyisti sänwa:

—Jan ukham samti —sasa.

9Ukspachaw Israelan reyipax mä yanapiripar jawsasin jupar säna:

—¡Jank'ak Imlá chachan Micaías yuqapax jutpan! —sasa.

10Israelan Ahab reyipasa, Judá uraqinkir Josafat reyisa, Samaria markar mantañ plazan reyi isinakapampi isthapita, reyi qunuñanakapan qunt'atäsipkänwa; profetanakasti taqpachaniw jupanakan nayräxapan jutir urunakan lurasiñapat yatiyasipkäna.

11Quenaaná chachan Sedequías yuqapasti, hierrot mä waxranak lurasitayna, ukatsti jach'at säna: “¡Tatitux akham siwa: ‘Aka waxranakampiw sirionakarux tukjañkam nuwantäta!’” sasa.

12Profetanakax uka pachparak yatiyapxäna, Ahab reyirusti sapxänwa: “Galaadankir Ramot markar katuntaskakim, atipjätawa, Tatituw uka marka jumar katuyätam” sasa.

13Ukchañkamasti, Micaías profetar jawsir sarkatayna uka khithat jaqix Micaiasar sänwa:

—Profetanakax taqpachaniw jutir urunak uñtasax Ahab reyir mä suma yatiyäwi arsupxi. Ukhamasti jumax jupanakjamay reyitak aski suma yatiyäwinak arsurakim —sasa.

14Micaías profetasti ukxaruw säna:

—¡Nayax Tatit laykuw juramento lurta, kuntix Tatitux siskitani ukak arsü! —sasa.

15Ukatsti jupax reyin ukaruw saräna, reyisti jupar jiskt'änwa:

—Micaías, ¿Galaadankir Ramot marka katuntirix sarapxiristti, janicha? —sasa.

Micaiasasti sänwa:

—Katuntir saraskakim, atipjätawa, Tatituw uka marka katuyätam —sasa.

16Ukxaruw reyix säna:

—¿Qawqha kutirak säma, kunatix chiqäki uk Tatitun sutipxar nayar juramentompi yatiyañamatakisti? —sasa.

17Ukat Micaiasax säna:

“Nayax israelitanakar taqpachaniruw

qullunakan ananukutäskir uñjta,

jan awatirin ovejanakar uñtata.

Tatitusti siwa:

‘Akanakax janiw awatirinïpkiti;

sapa maynis sumankañampik utaparkam kutt'pan’ ” sasa.

18Israelan reyipasti Josafatar sänwa:

—¿Janit sisksmaxa, aka jaqix janipuniw suma yatiyäwinak yatiykituti, jan walinakakpun yatiyitu sasaxa? —sasa.

19Micaiasasti saskakïnwa:

—Ukham satamat Tatitun arunakap ist'am: Tatiturux reyi qunuñapan qunt'atäskir uñjta, alaxpachankir angelanakasti taqpachaniw jupa chika sayt'atäskäna, mayninakax kupïxapana, mayninakasti ch'iqäxapana.

20Ukatsti Tatitux jiskt'änwa: “¿Khitirak Ahab reyir amtayiri saraspa, Galaadankir Ramot markar katuntañapataki, ukan jiwañapatakisti?” sasa. Mayninakax mayja parlapxäna, mayninakasti mayjarak parlapxäna.

21Ukampis mä ajayuw Tatitun nayraqatapar jutasin säna: “Nayaw Ahab reyir amtayanï” sasa. Tatitusti juparux jiskt'änwa: “¿Kunjämsa lurätaxa?” sasa.

22Ajayusti sänwa: “Reyin taqpach profetanakaparux k'arinak parlayä” sasa. Ukat Tatitux sarakïna: “Ukhamatxa k'arintätawa, ukhamax saramay uk luriri” sasa.

23Jichhasti yatxtawa, Tatitun taqi aka profetanakaru mä k'ari ajayu khithanitapa, k'arinak arsupxañapataki, ukatsti juman aynacht'añam amtataparaki —sasa.

24Ukat Quenaaná chachan Sedequías yuqapax, Micaías profetar jak'achasisin ajanupat may t'axllintäna, ukat sarakïna:

—¿Kawkinjamsa Tatitun ajayupax nayat mistuwayi, jumar parlañatakisti? —sasa.

25Micaías profetasti sänwa:

—Kunürutix jumax imantasiñatak utat uta jalnaqkäta uküruw yatïta —sasa.

26Ukat Israelan reyipax säna:

—¡Micaiasar katuntapxam, ukatsti marka apnaqir Amón jilïrin nayraqatapampiru, Joás yuqaxan nayraqatapampir katuntat apapxam!

27Jupanakarusti sapxätawa: “Reyix akham siwa: ‘Carcelar uchantapxpan, mä jisk'a t'ant'ampi, mä juk'a umampik churapxpan, nuwasïwit nayan jan kamacht'at kutt'aniñaxkama’ ” —sasa.

28Micaías profetasti saskakïnwa:

“Jumatix nuwasïwit jan kamacht'at kutt'anïtaxa,

Tatitux janiw naya tuqi parlkpachati, sañ munani” sasa.

Ukxarusti sarakïnwa: arunakaxar ist'apxam, sasa.

29Ukhamaw Israelan reyipampi, Judá uraqinkir Josafat reyimpix Galaadankir Ramot marka nuwantir sarantapxäna.

30Israelan Ahab reyipasti Josafat reyirux sänwa:

—Nayax yaqhat isthapitaw nuwasïwir mantä, jumasti reyi isimamp uchasiwayaskakim —sasa.

Ukhamaw Israel reyix nuwasïwir yaqhat isthapit mantäna.

31Ukampis Siria markan reyipax sataynawa, carronakap apnaqir kimsa tunka payan capitananakaparu: “Janiw khitirus katuntapxätati, Israelan reyiparukiw katuntapxäta” sasa.

32Ukatsti capitananakax Josafat chachar uñjasin sapxäna: “Jupäpachaw Israelan reyipaxa” sasa. Ukhamasti katuntañatakiw muyuntapxäna, ukampis Josafat reyix yanapayasiñatakiw arnaqasïna,

33jupanakax Israelan jan reyipätap uñjasaxa, janiw arktkxapxänti.

34Ukampis mä soldadow inach'usar mä mich'i antutt'asin, Israelan Ahab reyipar wakt'ayäna, jark'aqasiñ isipan ch'ukupat mantayasa. Ukat reyix carro apnaqiripar säna:

—Qhipar kutt'xam, aka nuwasiñ taypit apsxita, sinti jan wali chhuxriñchjatätwa —sasa.

35Uka urusti nuwasiñax walt'atapunïnwa, reyirusti carropxanak sayt'ata uñjapxäna, sirionakat jark'aqasisina. Ukampis jayp'urux jiwxänwa, reyin chhuxripat mistur wilasti carro patxan walpun jaläna.

36-37Intix jalantañampïxän ukkhasti, soldadonak taypin arux ist'asïna: “¡Reyix jiwxiwa! ¡Sapa maynis markaparkama, uraqiparkam sarxpan!” sasa.

Ukatsti reyin amayapxa Samariaruw apxapxäna, ukan imt'xapxarakïna.

38Uka qhipatsti reyin carropxa, Samarian utjir uma phuch'un jariqxapxäna, kawkintix chachanakampi sarnaqir jan wali warminakax jarisipxirïkän ukkhana, ukatsti anunakaw Ahab reyin wilap jallq'äna, kunjämtix Tatitux yatiykatayna ukhamarjama.

39Ahab reyin ukat ukxar sarnaqäwipasa, taqi luratanakapasa, marfilat lurat reyi utatsa, markanak sayt'ayatapatsa, Israelankir reyinakan luräwinakapa qillqatankiwa.

40Ahab reyin jiwatapatxa, Ocozías yuqapaw jupa lantix marka apnaqäna.

VII. JUDÁ MARKANKIR JOSAFAT REYIMPI, ISRAEL MARKANKIR OCOZÍAS REYIMPI(22.41-53)Josafat reyin Judá marka apnaqatapa(2 Cr 20.31-37)

41Ahab reyix pusi mara Israel marka apnaqaskän ukkhaw Asá chachan Josafat yuqapax Judá marka apnaqañ qalltäna.

42Jupasti ukkhaxa, kimsa tunka phisqan maranïnwa, Jerusalén markanxa pä tunka phisqan maraw marka apnaqäna. Taykapax Azubá sutinïnwa, jupasti Silhí sat chachan phuchhapänwa.

43aJosafat reyin sarnaqäwipax askïnwa, kunjämtix Asá awkipax askin sarnaqkäna ukhama. Jupan luratanakapax Tatitu nayraqatan chiqapänwa.

43b 43b (44) Ukampisa, qullunakan utjir yupaychañ utanakaxa, kawkhantix jaqinakax wilañchanakampi, incienso nakt'ayatanakamp idolonakar luqtapxirïkän ukanakax, janiw t'unjatäkänti.

44 44 (45) Josafat reyisti Israelan reyipampix sumankañ arust'äwi luräna.

45 45 (46) Ukat ukxar sarnaqäwipatsa, atipjäwinakapatsa, nuwasïwinakapatsa, Judá uraqinkir reyinakan luräwinakapa qillqatankiwa.

46 46 (47) Josafat reyiw uka uraqit jaqunuküna, khitinakatix diosanakaparus yupaychapkaspa uka amuyumpi q'añusiñanakan sarnaqasa jan wali lurapkäna uka jaqinakaru, uka jaqinakasti Asá awkipan urunakapatpach qhiparasipkatayna.

47 47 (48) (Uka urunakansti Edom markanxa janiw reyix utjkataynati, jan ukasti mayni jilïrikiw marka apnaqäna.)

48 48 (49) Josafat reyix Tarsisankir barconakjamarak luratayna, Ofir chiqat quri apaniñataki; ukampis uka barconakax janiw Ofir markar purkxänti, Esión-guéber chiqan jisk'a jisk'ar tukusitap layku.

49 49 (50) Ukat Ahab chachan Ocozías yuqapax Josafat reyir säna: “Barco apnaqir jaqinakaxar irparapita, juman barco apnaqir jaqinakamamp chika” sasa. Ukampis Josafat reyix janiw munkänti.

50 50 (51) Josafat reyisti jiwxänwa, juparusti nayra awkipa Davidan markapan imt'xapxäna. Uka qhipatsti Joram yuqapaw jupa lanti marka apnaqäna.

Ocozías reyin Israel marka apnaqatapa

51 51 (52) Josafat reyix tunka paqallqun mara Judá marka apnaqkäna ukkhaw, Ahab reyin Ocozías yuqapax Samaria markan Israel marka apnaqañ qalltäna, jupasti pä maraw marka apnaqäna.

52 52 (53) Ukampis jupan luratanakapax Tatitun nayraqatapan janiw walïkänti, jupasti kunjämtix awkipasa, taykapasa, ukhamarak Nabat chachan Jeroboam yuqapas Israel markar juch luraykäna ukhamarak luräna.

53 53 (54) Ukhamarusa, Baal diosaruw yupaycharakïna, kunjämtix awkipax nayrapachan lurkatayna ukhama, ukampi Israelan Tatit Diosapar q'apisiyasa.